VOV4.Bahnar - Lơ̆m ‘năr 9/11, Kuô̆k hô̆i pơ ma nuh găh tơ drong thu mong, tơ lĕch jên jang kơ t/đ sơ năm 2021, tơ drong vă thu mong, tơ lĕch jên jang tĕh đak, trong klăih song jên trung ương sơ năm 2022 păng Trong jang jên hu kơ tĕh đak 3 sơ năm (2022-2024). Trong jang vă atŏk tơ iung mŭk drăm, tơ pôl, mă loi ‘nŏh klăih song jên jang đơ̆ng Trung ương sơ năm 2022 thoi yơ vă gơ̆h iŏk yoa ‘lơ̆ng jên jang kơ tĕh đak, ‘nâu jĭ tơ drong đei lơ bơ ngai tang măt hơ nơ̆ng tơ lĕch pơ ma nuh. Mĭnh ƀar nơ̆r pơ ma akhan, tơ drong bơ̆ jang dôm tơ drong jang tơm kơ tĕh đak oei hiơ̆ hyĭn.

Bơ ngai tang măt drơ̆ng nơ̆r athei iŏk 16 rơ bâu ti hlak jên đơ̆ng sơ năm 2021 ăn sơ năm 2022 vă akŏm jên Trung ương bơ̆ jang dôm tơ drong jang tơm kơ tĕh đak lơ̆m sơ năm 2022 ‘nŏh truh 24 rơ bâu ti. Tơ drong ‘nâu pơm ‘lơ̆ng kơ sô̆ jên vă bơ̆ jang dôm tơ drong jang hlôi tơ lĕch, pơm lăp hăm tơ drong ‘mĕh vă đơ̆ng kon pơ lei, bơ ngai tăh hla tơ̆ dôm tơ ring groi kông, tơ ring mơ mat tat. Dôm bơ ngai tang măt akhan, klăih song hơ dăh hơ năp jang ‘nŏh jĭ trong jang tôch ‘lơ̆ng vă klăih song jên jang hrĕnh, tơ tom, đơ̆ng nŏh jăh tơ lĕch jên jang hloi. ‘Nâu kŭm jing nơ̆r athei vă tơ lĕch hrĕnh jên jang kơ tĕh đak đunh păh lăp, vă iŏk tơ drong tơ mât jên jang đơ̆ng tĕh đak pơm tơm, tơ iung tơ drong jang xa tơ mat jên jang lơ̆m tơ pôl.

Dơ̆ng: Tơ blơ̆