VOV4.Bahnar – Hăm tơdrong hơbuh hli hlơt đơ̆ng pơrang jĭ Covid 19, Anih tơm Pơgơ̆r Ƀô̆ đô̆i vei xơlam teh dôm dêh char, plei tơm lơ̆m jâ̆p teh đak atŭm hăm khul jang đei tơrĕk hlôi păng tŏk bŏk jang kơjăp tơdrong vei lăng bơngai mơ̆t lĕch găn xơlam teh, tang găn pơrang tơpoh găn trong xơlam teh. Lơ̆m noh, tơlĕch jang kơjăp hơlen tơ̆ dôm ‘măng xơlam teh, dôm anih găh hơlen kiơ̆ trong teh pơih rok jăl trong xơlam.  

Dang ei, Anih tơm Ƀô đô̆i vei xơlam teh tŏk bŏk oei pơtoi jang tơ̆ hloh 1.600 anih gak hơlen hăm hloh 7.500 kang ƀô̆ linh jang atŭm hăm 3.000 ‘nu bơngai kơ anih jang kơpal nai; atŭm hăm noh, pơih lơ tơdrong tơroi tơbăt găh tang găn păng tơjră pơrang jĭ Covid 19 lơ̆m jâ̆p tơring xơlam teh hăm hloh 6.000 ‘măng ăn jê̆ 1 trĭu ‘nu kon pơlei; axong pơhlom 1 trĭu hla bar tơbang atŭm hăm 2.700 kơsâ̆p hla bar chih tơbang găh pơrang jĭ Covid 19, duh nhen tang găn păng tơjră tơdrong mơ̆t lĕch glăi găn xơlam teh. ‘Nguaih kơ noh, dôm tơdrong tơroi tơbăt duh tơbang pơre nơ̆r jê̆  6.000 kơtơ̆ng ang, ƀai chih găh pơrang jĭ, trong jang tang găn truh hăm kon pơlei jâ̆p jang.  

Kiơ̆ Thiếu tướng Lê Đức Thái –Kơdră Anih tơm pơgơ̆r Ƀô̆ đô̆i vei xơlam teh, đơ̆ng blŭng xơnăm truh dang ei, Ƀô̆ đô̆i vei xơlam teh hlôi ƀôh băt, xek tơlang jê̆ 14.000 ‘nu mơ̆t lĕch glăi truh Việt Nam, tơgop tih tên lơ̆m tơdrong tang găn, tơjur tơdrong tơpoh pơrang jĭ Covid-19 rok kiơ̆ jăl trong xơlam teh kơ teh đak bơ̆n: Truh dang ei hlôi tŏk 1 xơnăm minh puơ̆t, kang ƀô̆ linh vei xơlam teh atŭm hăm khul kơpal, rim tơring rok kiơ̆ xơlam teh tơlĕch tơdrong vei lăng kơjăp xơlam teh, tang găn păng tơjră mơ̆t lĕch glăi găn xơlam teh vă tang găn păng tơjră pơrang jĭ. Jăh vă akhan ‘nhŏng oh hlôi dăp đon dăp bơnôh kơ ‘nôh dơh po vă jang kiơ̆ xơnong kăp gĭt âu lơ̆m khei năr tơnap tap hli hlơt, jô̆ hloi tơdrong oei xa, hơyuh tô̆ ‘mi, găh tơdrong vei xơđơ̆ng erih xa păng đon bơnôh.

Lơ̆m tơdrong adrin tang găn pơrang jĭ Covid 19 tơpoh găn xơlam teh, khei năr truh, Ƀô̆ đô̆i vei xơlam teh pơtoi hơtŏk hơlen tơ̆ dôm ‘măng xơlam, trong teh, hơbong đak rok kiơ̆ xơlam teh, tơring đak dơxĭ, akŏm dôm tơring tơm, tơnap tap. Atŭm hăm noh, jang atŭm hăm dôm khul băt hơdăh tơdrong vă tơroi tơtom ăn dôm jăl jang kơpal, jơnŭm pơgơ̆r tơring vă đei trong tơjră trŏ ƀlep hăm rim tơdrong hơbuh đơ̆ng pơrang jĭ, tơguăt hăm tơdrong đei ƀôh tơ̆ tơring.

Atŭm hăm noh, hơtŏk jang hadoi lơ̆m kơpal teh, jang atŭm vei xơlam teh; tơlĕch pơma đam, tơroi dih băl hăm khul vei lăng xơlam teh kơ dôm teh đak tơjê̆ vă drơ̆ng nơ̆r tang găn, xek tơlang tôm tơdrong trŏ hăm tơchơ̆t; hơtŏk tơroi tơbăt, hơvơn kon pơlei tơ̆ tơring xơlam, tơring đak dơxĭ ưh đei tơgŭm, ‘nhăk bơngai mơ̆t lĕch glăi găn xơlam teh. Đại tá Trần Tiến Hiền, Phŏ Kơdră Anih tơm pơgơ̆r Ƀô̆ đô̆i vei xơlam teh dêh char Quảng Nam ăn tơbăt: Hăm tơdrong đei ƀôh tơ̆ tơring xơlam teh Việt Nam- Lào, mă hăt noh găh teh đak Lào tơnap tap hli hlơt hloh, Anih tơm pơgơ̆r linh hlôi pơgơ̆r rim anih linh, mă kăl noh hơtŏk khul jang hơlen tơring xơlam teh vă tang găn păng tơjră pơrang jĭ. Pơtoi hơlen kơjăp dôm anih gak hơlen, dôm jăl trong teh, hơlen tơ̆ jâ̆p jăl trong vă tang găn tơdrong mơ̆t lĕch glăi găn xơlam teh truh Việt Nam. Tơroi tơbăt, hơvơn kon pơlei hơtŏk hlôh vao, tơtom ƀôh băt bơngai mơ̆t lĕch glăi vă tơroi hăm khul jang kơpal rôp vei tơmơ̆t lơ̆m anih pơkăp oei tơklăh, xek tơlang trŏ ƀlep tơchơ̆t.

Lơ̆m ‘măng năm pơm jang tơ̆ dêh char An Giang yơ̆ng âu ki, Phŏ Kơdră teh đak bơ̆n Võ Thị Ánh Xuân xơkơ̆t: dôm dêh char, plei tơm găh pơbăh, mă hăt noh An Giang đei tơring tơkuh hăm xơlam teh kơ dôm dêh char teh đak đe ƀôh hơbuh pơrang jĭ hli hlơt, noh tơdrong hơlen xơlam teh, tang găn păng tơjră jĭ jing kăp gĭt tih tên lơ̆m tơdrong tang găn păng tơjră pơrang jĭ kơ jâ̆p teh đak. Phŏ Kơdră teh đak bơ̆n Võ Thị Ánh Xuân ră hơdăh: Lơ̆m khei năr truh, pơkăl dôm anih jang, minh păh noh athei pơm kiơ̆ kơjăp pơkăp đơ̆ng Đảng, Teh đak, tơjê̆ âu hloh noh Tơchơ̆t đơ̆ng Thủ tướng noh xơnong jang hadoi lơ̆m tang găn păng tơjră pơrang jĭ. Hăm tơdrong tang găn păng tơjră pơrang jĭ pơm kiơ̆ pơkăp 5K hơkŏp vaccine. Kơyuơ pơrang jĭ tơ̆ ‘nguaih oei hơbuh hli, hăm tơdrong pơgơ̆r đơ̆ng Anih tơm Ƀô đô̆i Vei xơlam teh, Anih tơm linh Quân khu 9, pơtoi hơlen kơjăp xơlam teh, ưh adrô̆ kâ̆m mơ̆t lĕch glăi găn xơlam teh, mă oei vei lăng xơlam teh lơ̆m khei năr dang ei; tơjră tĕch pơdro tơtông ôn, păng tơjră dôm tơdrong pơm yoch nai.

Dang ei, vă vei xơđơ̆ng xơlam teh, tơgop tang găn tơdrong tơpoh đơ̆ng pơrang jĭ Covid 19, rim Anih Linh vei xơlam teh hlôi tơgŭm, jang hadoi hăm dôm anih jang kơpal, jơnŭm pơgơ̆r tơring tơlĕch tơdrong jang “Tôm kon pơlei vang tang găn păng tơjră pơrang jĭ Covid 19 păng mơ̆t lĕch glăi găn xơlam teh”. ‘Nguaih kơ noh, tơgŭm hăm jơnŭm pơgơ̆r tơring pơjing “Kơthŭng ‘măn kơthơ tơkêng tơhlâu mơ̆t lĕch glăi găn xơlam teh” tơ̆ Anih vei lăng kon pơlei xăh, phương vă chĕp vei xơnong, jơhngơ̆m pran đơ̆ng tơpôl kon pơlei.

Ưh adrô̆ tơlĕch tơdrong jang, Ƀô đô̆i Vei xơlam teh dôm dêh char, plei tơm oei pơgơ̆r rim anih linh vei xơlam teh jang hadoi hăm kŏng ang lơ̆m tơring truh rim unh hnam kon pơlei vă chă tơroi, chih hla bar pơkăp ưh đei tĕch pơdro tơtông ôn păng xơng ‘nhăk bơngai mơ̆t lĕch glăi găn xơlam teh. Hăm pơkăp “tơjră pơrang nhen tơjră ayăt” păng đei hơtŏk khul jang, tơmam drăm âu to, Ƀô đô̆i Vei xơlam teh pơkăp khŏm mă atŭm hăm rim khul jang, mă kăl noh kon pơlei kon kông, pơjing "anih pơgăn mam" tang găn păng tơjră pơrang jĭ Covid-19 lơ̆m dôm tơring xơlam kơ Teh đak.

Lan chih păng pơre nơ̆r