Kơdră chĕp pơgơ̆r Tĕh đak bơ̆ jang hăm Khŭl bơngai jo jăn đơ̆ng ƀrơ̆m phao pơgang dioxin Việt Nam păng Khŭl tơgŭm djru ŭnh hnam đei bơngai loch dŏng tĕh đak Việt Nam

VOV4.Bahnar - Ƀlep lơ̆m năr Tơbăt 74 sơnăm năr Bơngai rơka-Lôch dŏng tĕh đak (27/7), 60 sơnăm tơdrong răm ƀrơ̆m phao pơgang dioxin Việt Nam, Kơdră chĕp pơgơ̆r Tĕh đak hlôi bơ̆ jang hăm bơngai tang măt ăn Khŭl tơgŭm djru ŭnh hnam đei bơngai loch dŏng tĕh đak păng Khŭl bơngai jo jăn đơ̆ng ƀrơ̆m phao pơgang dioxin Việt Nam.

Kơdră chĕp pơgơ̆r Tĕh đak pôk tơmam drăm ăn Khŭl tơgŭm djru ŭnh hnam bơngai lôch dŏng tĕh đak Việt Nam

Kơdră chĕp pơgơ̆r Tĕh đak hôn bơnê kơtang rim Khŭl hlôi pơgơ̆r lơ tơdrong jang ‘lơ̆ng hơ iă, tơgop jang kiơ̆ trong bơ̆ jang đơ̆ng Đảng, khôi luơ̆t Tĕh đak găh tơgŭm djru rim bơngai rơka, ŭnh hnam bơngai lôch dŏng tĕh đak, bơngai đei iŏk yua ăn tĕh đak păng rim bơngai jo jăn đơ̆ng ƀrơ̆m pơgang dioxin Việt Nam. Kơdră chĕp pơgơ̆r Tĕh đak pơma hơdăh, lơ̆m rim ‘măng iung tơblăh vei lăng Tĕh đak, đei lơ kon hơ ‘lơ̆p kơ tĕh đak hlôi nuih mơng plang akau lôch răm kơ yuơ rơngei hiôk hian, pơm tơm kơ dĭh kơ Tĕh đak. Kơ yuơ lơ lŏh, tơdrong ƀlŏk hơdơ̆r hôn bơnê rim tơdrong tơgop tĭh tên, tơdrong hiong răm ‘nŏh jing nhă đak chăm kơ tu kơ hơdrĕch hơdrung bơ̆n, jing trong bơ̆ jang gĭt kăl đơ̆ng Đảng bơ̆n. Trŭh dang ei, Tĕh đak hlôi pơjing đei lơ khôi luơ̆t vă tơgum djru rim ŭnh hnam đei iŏk yua ăn kech mang, ŭnh hnam bơngai rơka, lôch dŏng tĕh đak, rim bơngai jo jăn đơ̆ng ƀrơ̆m phao pơgang dioxin pơm ăn.

Tơblơ̆ nơ̆r: Amazưt