VOV4.Bahnar - Vei kơ jăp tơ ring sơ lam ưh lăp tơ drong jang đơ̆ng khul linh đĕch mă oei jing hơ năp jang đơ̆ng kon pơ lei hai. Tơ drong hlôh vao ‘nŏh đei Kơ đông linh Đắk Tiên, khul kơ dră pơ gơ̆r tơ ring, kon pơ lei xăh Thuận Hà, apŭng Đắk Song, dêh char Đắk Nông jang kiơ̆ ‘lơ̆ng, vang akŏm jơ hngâm vei kơ jăp tơ ring sơ lam tĕh đak.

Hơ nơ̆ng 1 khei 1 ‘măng, ƀok Trần Bá Tuyết kŭm hăm dôm bơ ngai jang lơ̆m Grŭp vei lăng trong, jrăng sơ lam thôn 8, xăh Thuận Hà kŭm hăm đe kăn ƀô̆ linh đơ̆ng Kơ đông Đắk Tiên chong pơ ‘ngoăih ‘ngiĕt, dăr joang vei lăng trong sơ lam tơ̆ tơ ring. Ƀok Trần Bá Tuyết tơ chĕng akhan: “Tơ drong vang vei lăng sơ đơ̆ng tơ̆ tơ ring sơ lam ‘nŏh vang vei lăng tơ drong pơm tơm tĕh đak, tơ drong jơ nei đơ̆ng choh jang xa kơ dih. Yoa thoi nŏh kon pơ lei ling lang jang hơ doi hăm khul linh chă dăr joang, chong pơ ‘ngoăih trong sơ lam. Kơ dih inh kŭm hơ nơ̆ng krao hơ vơn, roi tơ băt ăn kon pơ lei găh hơ năp jang, tơ drong kăl đơ̆ng vei lăng tơ ring sơ lam păng tang găn dôm tơ drong yoch".

Kiơ̆ Đại úy Lương Văn Phú, Phŏ Kơ dră jang Chinh trĭ Kơ đông Đắk Tiên, tơ drong jang hơ doi, vang dăr joang, chong pơ ‘ngoăih trong sơ lam đei khul linh păng dôm grŭp vei lăng jang ‘lơ̆ng, tôch đei yoa. Dôm bơ ngai jang vang bơ̆ jang tôch pơ nĕh, năng ‘nâu jĭ hơ năp jang đơ̆ng kơ dih. Ưh lăp thoi nŏh đĕch, rim ‘măng năm jang tơ̆ mir, tơ dăh ƀôh tơ drong kiơ, ƀôh bơ ngai đơ̆ng nai truh kon pơ lei năm tơ roi ăn Khul kơ dră pơ gơ̆r tơ ring, tơ roi ăn ƀô đô̆i hloi.

Kon pơ lei kŭm hăm ƀô đô̆i dăr joang tơ̆ trong sơ lam

Trong sơ lam Việt Nam - Campuchia yoa kơ đông linh Đắk Tiên vei lăng kơ jung dang 10 km. Chih hơ dăh tơ drong vei kơ jăp tơ ring sơ lam ưh lăp tơ drong jang đơ̆ng khul linh đĕch mă oei jing hơ năp jang đơ̆ng đĭ đăng kon pơ lei hai, kơ đông hơ nơ̆ng tơ rĕk truh tơ drong roi tơ ƀôh ăn anih jang đảng, khul kơ dră tơ ring hơ tŏk tơ drong jang kon pơ lei vang vei lăng tơ ring sơ lam, jrăng sơ lam, vei lăng sơ đơ̆ng pơ lei pơ la.

Kiơ̆ Trung tá Nguyễn Huy Hiếu, Yŏng kơ đông Đắk Tiên, hăm trong jang oei xa hơ dai ‘lơ̆ng, hlôh vao tơ drong juăt, tơ drong arih xa kơ kon pơ lei, đơ̆ng kơ dră chĕp kơ̆l đảng, ƀok yŏng truh kăn ƀô̆, linh, mă loi jĭ Khul krao hơ vơn kon pơ lei, mưh bơ̆ jang ‘nŏh hơ nơ̆ng jang hơ doi hăm anih jang đảng, khul kơ dră pơ gơ̆r, dôm khul grŭp tơ pôl tơ̆ tơ ring hơ tŏk tơ drong roi tơ băt ăn kon pơ lei găh dôm tơ drong hơ găt ƀơm truh tơ ring sơ lam tĕh đak.

Lơ̆m dôm sơ năm tơ jê̆ âu, bơ̆ jang kiơ̆ tơ drong tơ chơ̆t 01 đơ̆ng Thủ tướng tĕh đak găh pơ gơ̆r tơ drong jang "Đĭ đăng kon pơ lei vang vei lăng tơ drong pơm tơm, tơ drong sơ đơ̆ng tơ̆ tơ ring sơ lam tĕh đak lơ̆m chăl ‘nao” păng Tơ drong tơ chơ̆t 33 đơ̆ng Anih tơm Chinh trĭ găh "Trong jang đunh đai vei lăng tĕh đak lơ̆m chăl ‘nao", Kơ đông hlôi jang ‘lơ̆ng tơ drong tơ roi tơ băt, krao hơ vơn kon pơ lei jang kiơ̆ trong jang đơ̆ng Đảng, khôi luơ̆t tĕh đak. Atŭm hăm 'nŏh, dôm khul vei lăng jrăng sơ lam đei pơ jing, bơ ngai jang lơ̆m khul 'nŏh jĭ kon pơ lei, đei hơ năp jang kŭm hăm khul linh khul linh vei lăng tơ ring sơ lam vei kơ jăp tơ ring sơ lam tĕh đak.

Kơ đông oei ăn 1 ‘nu kăn ƀô̆ vang mât jang lơ̆m Anih jang đảng xăh păng athei lơ đảng viên jur hŏk hôp tơ̆ dôm chi ƀô̆ pơ lei pơ la, vei lăng unh hnam kon pơ lei. Dôm khul, grŭp bơ̆ jang tơ̆ tơ ring tơ gĕch năm tơ̆ đe kră pơ lei, ƀok pơ gơ̆r pơ lei đei kon pơ lei lui yom vă roi tơ băt, krao hơ vơn, tơ gŭm ăn kon pơ lei băt hơ dăh dôm tơ drong tơ̆ trong sơ lam, jrăng sơ lam, vă băt hơ dăh hơ nih kơ dih vei lăng, roi tơ băt tơ tom dôm tơ drong pơm glăi tơ̆ tơ ring…

 Kon pơ lei vang vei lăng jrăng sơ lam

Sơ năm 2020, bơ̆ jang 2 tơ drong jang tơm, vei lăng tơ ring sơ lam hai, tang găn jĭ Covid-19 hai, Kơ đông linh Đắk Tiên pơm 3 anih gak păng hơ nơ̆ng jang hơ doi hăm dôm khul linh, grŭp vei lăng, dăr joang, gak vei trong iĕ, vei kơ jăp ưh ăn đei bơ ngai mât lĕch lơ̆m tĕh đak glăi luơ̆t.

Kơ đông linh Đắk Tiên oei tơ gŭm ăn kon pơ lei choh jang xa, kăt yoă ƀa, năm ngôi, hơ păh tơ mam, khăm hơ met jĭ, tơ gop jên ăn dôm anih mong jên tơ̆ tơ ring. Kơ đông hơ păh rơ mo yŏng ăn bơ ngai tơ nuh tơ̆ xăh Thuận Hà păng iŏk rong 1 ‘nu hŏk tro đei tơ drong arih xa mơ mat tat, tơ gŭm ăn 2 ‘nu hŏk tro tơ nuh hŏk rơ gei… Dôm tơ drong jang tôch đei yoa rim năr đơ̆ng kăn ƀô̆, linh tơ̆ Kơ đông linh Đắk Tiên hlôi hơ met kơ jăp đon lui đơ̆ng kon pơ lei hăm Đảng, Tĕh đak, khul linh, tơ gop pơ jing đei jơ hngâm pran đĭ đăng kon pơ lei vang vei kơ jăp ‘lơ̆ng tơ drong sơ đơ̆ng tơ̆ tơ ring sơ lam.

Ƀok Trần Lê Cường, Bí thư Đảng xăh Thuận Hà, apŭng Đắk Song, dêh char Đắk Nông pơ ma hơ dăh: “Yak hơ doi hăm kon pơ lei pơ jing tơ ring tơ rang ‘nao, kăn ƀô̆, linh Kơ đông Đắk Tiên hlôi tơ gŭm ăn tơ ring lơ tơ drong tôch đei yoa. Lơ̆m nŏh, gơ̆h jô̆ truh tơ drong pơ jing anih jang chinh trĭ tơ̆ tơ ring, atŏk tơ iung đảng viên ‘nao, tơ gŭm kŏng jang, pơm trong, man hơ bong đak, tơ lĕch lơ trong tơ gŭm ăn kon pơ lei jang xa. Đơ̆ng noh, rim kon pơ lei roi đei đon tơ năp ƀiơ̆ mưh vang vei lăng tơ drong pơm tơm tĕh đak, vei sơ đơ̆ng tơ̆ tơ ring sơ lam, pơ jing đei đon lui kơ jăp đơ̆ng kon pơ lei".

Dơ̆ng: Tơ blơ̆