VOV4.Bahnar - Pơ gê ‘năr 22/4, Anih jang Mặt trận tổ quốc Việt Nam dêh char Kon Tum tơ lĕch jang ‘Măng krao hơ vơn vă tơ plih trong tơ chĕng, trong jang đơ̆ng kon pơ lei kon kông, tơ gŭm kon pơ lei hơ drin klăih dơ nuh hin kơ jăp. Dêh char Kon Tum đei hloh 53% kơ sô̆ kon pơ lei ‘noh bơ ngai kon kông tơ drong arih sa oei lơ mơ mat tat. Tơ drong tơm yua đơ̆ng ư̆h kơ hlôh vao, oei tơ chĕng răp gô, pơ mơ̆ng lơ̆m tơ drong tơ gŭm đơ̆ng teh đak, tam mă băt trong tơ mơ̆t yua khoa hŏk, ki thuơ̆t lơ̆m jang sa.

Kĭ pơ kăp pơ jei băl bơ̆ jang kiơ̆ ‘măng krao hơ vơn

Vă tơ plih trong tơ chĕng, trong jang đơ̆ng kon pơ lei kon kông, pơm ăn kon pơ lei kon kông hơ drin yak hloh klăih đơ̆ng dơ nuh hin kơ jăp, Anih jang mặt trận tổ quốc Việt Nam dêh char Kon Tum băt hơ dăh 5 tơ drong jang tơm ‘noh jĭ: Tơ roi tơ băt dôm trong jang, tơ drong tơ gŭm mă loi ‘noh jĭ tơ drong jang teh, tơ jur dơ nuh hin kơ jăp, pơ jing tơ ring tơ rang ‘nao truh hăm kon pơ lei kon kông; tơ roi tơ băt rim tơ drong jang hơ iă, trong jang đei iŏk yua; pơ tho kon pơ lei kon kông dơ nuh hin păng vă jê̆ dơ nuh hin iŏk yua đei jơ nei jên đơ̆ng ŭnh hnam, jên tŏk iŏk vă hơ tŏk tơ iung mŭk drăm; pơ tho kon pơ lei tơ plih dôm kơ loăi ‘long, kon tơ rong; hơ drin vang pơ tăm bri, vei lăng bri.

Thuem: Tơ blơ̆