Tơ̆ hơnăp tơdrong tŏ ‘mi kial tơplih roi kơnê̆, Anih vei lăng kon pơlei dêh char Đắk Lắk ‘nao tơlĕch Nơ̆r athei dôm anih jang kơpal păng tơring tơrang kơchăng tang găn ‘mi kial hơbŭt, đak lơ̆p, teh hơlih lơ̆m dôm khei hơtuch sơnăm; atŭm hăm ‘nŏh hơmet hiă trong tơjră tang găn hăm tŏ phang pơđang, ưh kơmăh đak, đak ƀoh mât păng unh xa bri lơ̆m pơyang phang 2026-2027.

Dêh char athei tơplih mă brĕ đơ̆ng ưh kơchăng jing kơchăng tang găn, bơ̆ jang ‘lơ̆ng kiơ̆ trong jang “4 kơtă”; hơlen năng dôm tơring hơmơt đei đak tơjroh, teh hơlih, đak lơ̆p jrŭ, kơsô̆ unh hnam kăl đei pôk rĭ, anih tŏk oei pơgia păng khul bơngai jang, tơmam drăm gơ̆h krao akŏm đei. Kơdră vei lăng kon pơlei dêh char Đỗ Hữu Huy pơma hơdăh: Trong jang sơnăm ‘nâu ‘nŏh tang găn jĭ tơm, kơchăng đơ̆ng hrôih, đơ̆ng hơtaih, ưh đei gô đei đak lơ̆p dăh mă đei ‘mi ‘mơ̆i mă tơlĕch jang. Mă kăl athei hơlen năng hloi dôm anih hơmơt đei teh hơlih, đak lơ̆p, roi tơƀôh trong sek tơlang hloi dôm anih krê hơmơt pơrăm truh tơdrong arih kơ kon pơlei.