Tơdrong akŏm pơma dơnuh hăm bơngai đang măt kơ jơhnơr hơrih đei 2 apăng “Tơdrong tơm tang hơkou” păng “Chih akŏm ƀai hơri nuih mơng”. Tơdrong akŏm hlôi pơm hơrih dơ̆ng tơdrong đei ƀôh ah mă Hơnih tơm oei lơ̆m khei năr Jơ̆p teh đak iung tơjră kơtang ah sơnăm 1946, khul linh păng kon pơlei Hà Nội nuih mơng iung tơjră lơ̆m 60 măng năr vă phă tơpăi tơdrong pơhlŭ pơhlôm “tơdrŭt tenh, đei jơnei tenh” đơ̆ng khul hơyăt Phalăng, vei lăng sơđơ̆ng ăn hơnih jang Đảng, Jơnŭm pơgơ̆r teh đak athei jăk oei tơ̆ kơdrăn tơblah, pơm trong ăn tôm kon pơlei akŏm iung tơjră đunh khei năr. Chih akŏm dôm tơdrong nuih mơng, jing kon pơlei Hà Nội, đe linh “Tang hơkou po ăn teh đak gơh đei jơnei sơđơ̆ng”.

Vang akŏm tơblah đơ̆ng oei hơ-ioh, linh so Phạm Đình Luận, sơ̆ 'noh linh Trung đoan Thủ đô ƀlŏk hơdơ̆r:  “Khei năr noh hnam inh tơ̆ kơphô̆ phố Hàng Bông. Phalăng chă pơm lơ tơdrong chư̆ kơnê̆. Ah mă jơ̆p teh đak akŏm iung tơblah kiơ̆ nơ̆r krao hơvơn đơ̆ng Ƀok Hô, tôm kon pơlei hăm ƀô̆ đô̆i, đe kră, đe hơdruh tơdăm, hơ-ioh iĕ adoi vang akŏm tơblah tơ̆ Hà Nội... Khei năr 'noh inh lăp 9 sơnăm đĕch, păng oei lơ̆m Trung đoàn Thủ đô ưh kơsĭ hơdrô̆ đĕch ôh 'lơ̆p, mă oei lơ bơngai jang tơ̆ khul nai dơ̆ng”

Lơ̆m tơdrong pơma dơnuh, tơdrong pơdah um rup hăm dôm tơdrong tơroi tơpă đơ̆ng rim bơngai đang măt ƀôh tơdrong, đe kang ƀô̆, khul linh kơ Hơnih tơm khul linh Hơnih tơm hlôi pơm hơrih dơ̆ng tơdrong tơblah tơ̆ rơvơ̆ng plenh Hà Nội lơ̆m 12 măng năr pơjing đei “Tơdrong tơblah Điện Biên Phủ tơ̆ rơvơ̆ng plenh” ah sơnăm 1972. Pơtoi kơ noh jing um rup kơ dôm yak jơ̆ng iung năm jang ah chăl rơngei hiôk hian đơ̆ng đe kang ƀô̆ linh lơ̆m tơdrong jang tang găn păng tơjră 'mi kial đak hơbông pơrăm, tơgŭm dŏng sar bar, vei sơđơ̆ng ăn rim kueng ƀôt, jăl trong vih vơ̆t.

Kiơ̆ đơ̆ng noh pơlan să tơdrong pơ-ư pơ-ang, tơ-iung jơhngơ̆m đon hơpơi 'meh plang jơhngơ̆m đơ̆ng kôn mon kon sou hrei ou pơtoi kơ tơdrong “Tang hơkou po ăn teh đak gơh đei jơnei sơđơ̆ng”, pơtoi chih gah tơdrong nuih mơng hăm dôm tơdrong jang hơdah, atŭm jơhngơ̆m vei sơđơ̆ng tơdrong rơngei hiôk hian, pơjing Hơnih tơm Hà Nội dơnưp 'lơ̆ng gơh hơgei. Vang truh akŏm pơma đam, tơdăm Nguyễn Viết Thịnh, oei tơ̆ phương Ô Chợ Dừa tơroi: “Đe mih ma vei lăng teh đak sơ̆ hlôi plang dơh sĕch pham po, vă vei sơđơ̆ng ăn rim kueng ƀôt, rim bơbŭng hnam. 'Noh chăl sơnăm mơlôh nhôn hrei ou athei yua jơhngơ̆m pran, kơ̆l 'ngok hơgei kơ po vă vei lăng Hơnih tơm Hà Nội roi pơdrŏng jơnap, gơh hơgei păng sơnêp sơnoi”