Kiơ̆ kơ noh, tơdrong pơih să jăl trong truh 24,75m, man keh đang ăn 4 tong gre kơdou hơdoi tơ̆ jăl trong kơdou hrenh, đei hơnih pơdơh kăl hloh, kơdou hrenh truh 100 km/h. Tơdrong hơmet asong jang drơ̆ng minh, hơtŏk tơdrong iŏk yua đei jơnei păng đunh đai jăl trong ou. Jăl trong ming man hơtaih jê̆ 74 km, hơnih pơdơh mă blŭng noh tơ̆ phương 1 - Bảo Lộc, pơtoi hăm jăl trong kơdou hrenh Tân Phú - Bảo Lộc; hơnih mă hơtuch noh tơ̆ xah Hiệp Thạnh, tơkuh hăm jăl trong kơdou hrenh Liên Khương - Prenn. Atŭm hăm pơih să jăl trong, adoi asong ming man atăm jăl trong tơkuh Gia Hiệp păng tơring kon pơlei oei xa, hơtŏk tơdrong vih vơ̆t hiôk hian păng sơđơ̆ng ăn kon pơlei.

Hăm dôm tơdrong hơmet ou, kơsô̆ jên asong ming man trong kơdou hrenh Bảo Lộc - Liên Khương tŏk jê̆ 19.000 tih hlj. Lơ̆m noh, jên mong teh đak đei hloh 47%, oei dôm to noh kơyuơ hơnih iŏk ming man chă hơvơn. Tơdrong ming man adoi đei hơmet, hơmŏ vă ăn gre kơdou hơlen lăng kih thuơ̆t ah jăl 3 sơnăm 2028, keh đang păng tơmơ̆t yua lơ̆m jăl 4 sơnăm 2028. Ah keh đang, jăl trong kơdou hrenh Bảo Lộc - Liên Khương gô jing jăl trong kơdou hrenh tơroh tơring Đông Nam Bộ păng tơring groi kông Lâm Đồng, hơtŏk jang mŭk drăm, tơmang pơhiơ̆ păng hơvơn asong jang.