Mĭnh năr bơ̆ jang đơ̆ng mŏ Phan Thị Lý, bơngai jang lơ̆m Anih vei lăng mŭk drăm xăh Quảng Phú, dêh char Đắk Lắk pơdui đunh đơ̆ng pơgê hrôih truh drâm kơsơ̆. Tơdrong jang đơ̆ng mĭnh 'nu bơngai jang kê̆ toan, tơmât jên jang kơ teh đak, chih jô̆, roi tơbăt mŭk drăm - tơpôl, chih pơjing dôm tơdrong hơgăt găh tơdrong jang tŏk… mŏ Lý gơ̆h adrin jang đang lơ̆m jơ jang rim năr. Mă lei hăm tơdrong ưh kơmăh bơngai jang, mŏ athei tơgŭm ăn tơdrong choh jang xa, dăr hơlen unh hnam tơnuh păng sek tơlang dôm tơdrong găh teh tơ̆ tơring hai. Yoa thoi noh, ƀât lăp hlŏh 7h kơmăng ‘mơ̆i mă mŏ gơ̆h vih tơ̆ hnam: “Tơ̆ lăm inh jang bu bu kŭm jang tôch trăp, mĭnh ‘nu inh dang ei iŏk jang 5-6 tơdrong jang, oei jang tơdrong ‘nâu ‘nŏh athei jang tơdrong to hai, hơnơ̆ng thoi noh. Kŭm ưh kơ đei jô̆ măng năr dăh mă năr 6, năr 7, pơma atŭm athei jang đĭ tơdrong jang dăh mă mưh lap dêh ‘mơ̆i mă pơdơh. Nhen ‘năr brei athei bơ̆ jang truh hloh 12h kơmăng.”

Tơdrong gleh hrat, trăp trĭn tơ̆ anih jang ưh lăp hơdrô̆ tơdrong jang mŭk drăm dăh mă teh đĕch, mă đei tơ̆ dôm tơdrong jang pơm hla ar vei lăng - tơpôl hai. Yă Hà Tường Vi, Chánh Văn phòng Anih vei lăng kon pơlei xăh Ea Súp dêh char Đắk Lắk ăn tơbăt, tơring iŏk jang hloi lơ tơdrong jang đơ̆ng apŭng, sơng iŏk, pơm hơmet lơ hla ar hô sơ đơ̆ng kon pơlei, hơdai hăm vei lăng dôm tơdrong jang nhen tang găn xa pơgơ̆m pơjĭp, pơm glăi; tơlĕch jang kiơ̆ nơ̆r pơma đơ̆ng ‘măng dăr hơlen păng tơdrong jang nai hai. Lơ̆m noh đei lơ tơdrong ‘nao, kăn ƀô̆ tơ̆ xăh tam mă băt trong jang: “Mĭnh năr iŏk đei đơ̆ng 70 truh 100 blăh hla ar, păng kơsô̆ hla ar gơih ăn kŭm lơ, kơsô̆ 'măng hop akŏm lơ̆m giĕng bơ̆ jang hăm dôm anih jang kơpal, anih sek tơlang bơ̆ jang đơ̆ng 3 truh 5 'măng hop akŏm mĭnh năr, oei dôm hla ar ƀơm truh hô sơ, trong jang athei bơ̆ jang nhen thoi apŭng hơdrol ki đĕch.”

Tơdrong ưh kơ măh kăn ƀô̆ juăt jang tŏk bŏk jing tơdrong đei atŭm tơ̆ đĭ đăng rim xăh, phường tơ̆ dêh char Đắk Lắk. Anih chĕp kơ̆l đảng dêh char Đắk Lắk akhan, 'nâu jĭ tơdrong athei năng ƀôh tơ̆ yăn âu păng đei trong jang mă tơgăl vă gơ̆h tơgŭm ăn trong jang Khul kơdră pơgơ̆r tơring 2 tăl đei yoa 'lơ̆ng nhen tơdrong 'mĕh vă. Trong jang ƀât măt dang ei 'nŏh krao akŏm, iŏk bơngai jang đơ̆ng dêh char jur, atŭm hăm 'nŏh set hơlen, hơmet ming khul kăn ƀô̆ xăh bơ̆ jang mă gơ̆h hơgei./.