Pơma ah pơtôch hop akŏm, Tổng Bí thư, Kơdră teh đak bơ̆n Tô Lâm ră hơdah, pơtoi kơ dôm tơchơ̆t đơ̆ng blŭng jăl jang, Hop akŏm 'măng mă ou pơm hơdah Tơchơ̆t Hop akŏm 'măng mă 14 kơ Đảng, tơguăt pơ-'lơ̆ng Đảng hăm tơdrong vei lăng păng hơtŏk tơ-iung teh đak. Trung ương hlôi drơ̆ng nơ̆r sơkơ̆t trong hơlen akŏm dôm tơdrong jang đơ̆ng Đảng păng jăl trong hơtŏk tơ-iung đunh đai kơ teh đak.  

Tổng Bí thư, Kơdră teh đak bơ̆n ăn tơbăt, Trung ương hlôi tơchơ̆t dôm trong jang 'nao gah hơtŏk hơgei ăn tơdrong tơplih 'nao, kơdih hơmet đơ̆ng Đảng păng hơnih jang chĭnh trĭ. Trung ương hơlen Tơchơ̆t gah hơtŏk hơmet pơ-'lơ̆ng Đảng păng tơdrong jang chĭnh trĭ hlăng 'lơ̆ng kơjăp kơtang, tôm tơdrong, pơtrŏ hăm tơdrong kăl hơtŏk tơ-iung kơ teh đak lơ̆m chăl jang 'nao. Trung ương hlôi tơchơ̆t tơplih 'nao tơdrong jang kang ƀô̆ păng tơlĕch chă hơvơn, iŏk yua bơngai hơgei hơmŏ ăn khul jang pơtrŏ hăm tơdrong kăl hơtŏk tơ-iung kơ teh đak. Đơ̆ng rŏng kơ Hop akŏm, Tổng Bí thư, Kơdră teh đak bơ̆n Tô Lâm athei jang hơdah tôm tong, tơtom pơm kiơ̆ dôm tơchơ̆t, keh đang kơjung hloh sơnong jang kơ sơnăm 2026, pơm trong vă ăn sơnăm 2027 hơtŏk tơ-iung kơtang; hơtŏk chă hơlen lăng tơdrong jang pơm kiơ̆ păng iŏk yua sơnong jang đơ̆ng kon pơlei.