Lăp đơ̆ng rŏng kơ lêh sơng, Thủ tướng Lê Minh Hưng păng Thủ tướng Saleumxay Kommasith hlôi pơgơ̆r pơma đam. Ƀar Thủ tướng tơroi ăn băl găh tơdrong tơ̆ rim tĕh đak, trong jang, tơdrong vă jang tŏk tơ̆ hơnăp kơnh păng dôm tơdrong tơm vă tơlĕch jang kiơ̆ tơdrong tơchơ̆t đơ̆ng Hop akŏm Đảng kơ rim tĕh đak. Ƀar Thủ tướng tơƀôh jơhngơ̆m đon hơiă tơ̆ hơnăp dôm hơyak tŏk pran 'lơ̆ng păng tôm tơdrong đơ̆ng tơdrong pơvei 2 pang lơ̆m khei năr âu ki; hơnơ̆ng chih hơdăh tơdrong pơvei gĭt kăl Việt Nam – Lào 'noh tơdrong vă pơ ‘nhŏ bơ̆ jang hơdrol hlŏh lơ̆m trong jang tơbôl đơ̆ng 2 teh đak.

Găh mŭk drăm, ƀar păh lăng 'lơ̆ng jang hơdoi, tơmơ̆t jên jang hơnơ̆ng jing tơdrong 'lơ̆ng hơiă lơ̆m tơdrong pơvei 2 pang. Việt Nam dang ei đei dang 300 tơdrong tơmơ̆t jên jang tơ̆ Lào hăm đĭ đăng kơsô̆ jên đei kĭ pơkăp vă jang 7 ti USD. Ƀar păh drơ̆ng nơ̆r hơnơ̆ng adrin pơjing đei tơdrong 'lơ̆ng, hơtŏk tơdrong tơgŭm băl păng tơgoăt trong jang hơdoi mŭk drăm đơ̆ng 2 păh; vang pơjing trong jang păng dôm tơdrong vă pơ ‘nhŏ jang hơdrol mă hơdăh, khŏm hơnhăk jên tĕch mơdro 2 pang đei 5 ti USD. Ƀlep ƀât ‘măng mă âu, Thủ tướng Lê Minh Hưng pơma hơdăh Việt Nam vă man ăn kon pơlei Lào 2 tŏ hnam trưng, đei kơjă dang 2 trĭu USD.

Lăp đơ̆ng rŏng pơma đam, 2 Thủ tướng vang dơ̆ng lăng lêh pơjao 11 hla ar chih tơbăt jang hơdoi găh dôm tơdrong jang vei sơđơ̆ng, tư phap, jên hu, ŭnh hơyŭh, pơtho pơhrăm, hơdrĕch kon kông, tơdrong lui khop păng jang hơdoi đơ̆ng rim tơring kơ 2 tĕh đak; vang truh Pơm lêh tơlĕch tơdrong jang man Hnam trưng Đăi hŏk Lào - Việt./.