Đơ̆ng kơmăy điên thoăi lăp vă mơ̆ng, krao hmă đĕch, yă H’Bé Êban, tơ̆ plei Tah B, xăh Cuôr Đăng, dêh char Đắk Lắk, dang ei đĭ băt trong pơih lăng tơdrong tơroi găh khăm, hơmet jĭ hăm ƀao hiêm pơgang păng pơm 1,2 kơloăi hla ar trư̆k tuyê̆n. Tơdrong tơplih ‘nâu đei đơ̆ng dôm ‘măng kăn ƀô̆ pơlei năm truh tơ̆ hnam pơtho tơƀôh ăn, tơgŭm ăn yă pơm juăt hăm kơmăy kơmŏk.

Plei Tah B, xăh Cuôr Đăng, dêh char Đắk Lắk đei hlŏh 340 unh hnam, lơ̆m noh đei hlŏh 90% jĭ kon pơlei kon kông. Tơdrong găn trong đơ̆ng nơ̆r pơma pha ra kŭm hăm jơhngâm đon ơm, ưh gan 'mĕh iŏk yoa kơmăy kơmŏk pơm ăn lơ bơngai jing ưh tam mă băt trong iŏk yoa kơmăy sô̆. Bơngai jang lơ̆m Khul jang kơmăy sô̆ tơpôl năm truh tơ̆ rim hnam, pơtho tơƀôh hăm nơ̆r Rađe păng pơih pơm kơtă lơ̆m điên thoăi ăn kon pơlei.

Mŏ H’Gói Niê, Bơngai vei lăng Khul jang kơmăy sô̆ tơpôl kơ plei Tah B ăn tơbăt: “Ba năm truh tơ̆ rim hnam chă pơtho tơƀôh ăn kon pơlei yoa điên thoăi, pơih ứng dụng VNeID, chih tơmât mât khâu, kơsô̆ điên thoăi păng roi tơƀôh dôm trong pơm hla ar trư̆k tuyê̆n. Ba pơtho vă mih ma duch nă gơ̆h pơm kơdih, atŭm hăm ‘nŏh roi tơbăt vă rim bơngai hlôh vao đơ̆ng rŏng kơnh gơ̆h pơm hla ar kơtă lơ̆m điên thoăi”.

Tơdrong adrin păng jang tơnăp đơ̆ng dôm khul jang kơmăy sô̆ tơpôl oei tơgop pơm tơplih trong iŏk yoa kơmăy kơmŏk, pơm dôm kơloăi hla ar vei lăng păng pơjing tơdrong juăt iŏk yoa kơmăy sô̆. Yă H’Kơm Êban, yă pơgơ̆r plei Tah B, akhan: “Mih ma duch nă lơ̆m pơlei băt trong iŏk yoa điên thoăi rơgei, pơih ứng dụng VNeID, pơih QR, kla jên điên păng pơm hla ar trư̆k tuyê̆n. Ưh lăp iŏk yoa kơmăy rơgei đĕch, mă kon pơlei oei dar deh pơm kơdih dôm tơdrong adrol ki athei gô đe nai pơm tơgŭm ăn ngăl."

Đơ̆ng tơring, tơdrong jang “Đĭ đăng kon pơlei iŏk yua kơmăy sô̆” tŏk bŏk đei tơlĕch jang jơ̆p jang tơ̆ Đắk Lắk. Hloh 2.000 Khul jang Kơmăy sô̆ tơpôl hăm vă jê̆ 12.000 ‘nu bơngai jang đei pơjing, tơgŭm kon pơlei gơh băt pơm hla ar trư̆c tuyê̆n, kla jên ưh kơ yua jên măt păng dôm kơmăy sô̆ kăl nai. Ƀok Bùi Thanh Toàn, Kơdră Anih jang Khoa hŏk păng Kơmăy kơmŏk dêh char Đắk Lắk ăn tơbăt, tơdrong jang đơ̆ng dôm khul jang kơmăy sô̆ tơpôl, tŏk bŏk tơgop hơtŏk ‘lơ̆ng tơdrong jang gơh yua kơmăy kơmŏk đơ̆ng lơ kon pơlei:

“Tơplih kơsô̆ mă hơdrol athei pơtơm blŭng đơ̆ng tơdrong tơplih đon tơchĕng, trong  tơchĕng păng trong jang. Khei ‘năr âu ki, khŭl kơdră chĕp kơ̆l tơring hăm dôm bơngai đei kon pơlei lui yom tơ̆ tơring hlôi kơtă vang jang, păr ang tơdrong jang “Đĭ đăng kon pơlei gơh yua kơmăy sô̆” ‘moi kiơ̆ puăn tơdrong jang pơlong: xăh kơsô̆, phường kơsô̆, pơlei pơla kơsô̆ păng kon pơlei kơsô̆. Lơ tơring kơchăng hơnhăk dôm trong jang hăm kơmăy sô̆ lơ̆m tơdrong jang vei lăng păng tơdrong hơrih sa, pơm tơdrong ‘lơ̆ng ăn tơplih kơsô̆ kơ dêh char tơ̆ hơnăp kơnh’.