Hla bơar tơbăt bơ̆ jang chinh trĭ hop akom tơbăt, jăl jang 2020–2025, Đảng ƀô̆ Binh đoàn 15 hlôi iung jang kơtang, tơchăr hơ iă, yak hloh lơ tơdrong tơnap tap, tơdrong long vă jang keh đang rim tơdrong jang chinh trĭ đei pơjao. Bơ̆ jang pơtho pơhrăm tơblăh, pơjing trong kơchăng iung tơblăh đei tơlĕch jang kơjăp, atŭm hăm trong iung jang tang găn hơlou kơjăp ‘lơ̆ng lơ̆m tơring kăl Tây Nguyên. Iung pơma pơrô̆ jang tơ̆ Hop akŏm, Thượng tướng Huỳnh Chiến Thắng -Kơ ieng Kơdră Pơchoh trong Khul Ƀô̆ đô̆i kon pơlei Việt Nam hôn bơnê kơtang dôm tơdrong jơnei mă Binh đoàn iŏk đei lơ̆m jăl jang ou ki păng athei Đang ƀô̆ hơnơ̆ng vei kơjăp hơnăp jang kăl ‘noh khul ƀô̆ đô̆i tơm dơnơm lơ̆m jang kiơ̆ tơdrong jang vei lăng teh đak-jang mŭk drăm lơ̆m tơring kăl Tây Nguyên. Jăl jang 2025–2030, Binh đoàn 15 sơkơ̆t hơdăh atŏk kơtang iŏk đei jơnei choh jang sa, pơm tơlĕch-tĕch mơdro; hơmet pơ ‘lơ̆ng tơdrong hơrih sa ăn bơngai jang; vei kơjăp ‘lơ̆ng trong bơ̆ jang, adoi tơplih ‘nao, atŏk kơtang kĕ chĕp pơgơ̆r, jơhngơ̆m pran iung tơjrră kơ khul Đảng tơklep kơjăp hăm tơ iung pơjing hơnih jang “Pran kơtang, gơh hơgei”.