Pơma pơih blŭng hop akŏm, ƀok Lưu Văn Trung, Kơdră Jơnŭm pơgơ̆r kon pơlei dêh char Lâm Đồng, pơma hơdăh, yak hlŏh lơ tơdrong pơmat tat, pơlong nol sơnăm 2025 mŭk drăm dêh char Lâm Đồng tŏk pran hơnơ̆ng, hăm 16/19 tơdrong hơgăt jang đei păng lơ hlŏh kơsô̆ hơgăt; thu mong jên ăn teh đak tơ̆ dêh char đei hlŏh 31.200 ti hlak jên, tŏk 11% trong jang đơ̆ng tơring pơjao păng tŏk 17% pơting hăm Trung ương pơjao; choh jang xa hơnơ̆ng tơƀôh hơdăh hơnăp jang mŭk drăm tơm kơ dêh char hăm hlŏh 107.000ha teh choh jang xa hăm kơmăy kơmŏk păng vă jê̆ 150.000ha teh choh jang xa sơđơ̆ng ‘lơ̆ng; dôm anih jang unh hơyuh rơgoh, kơmăy kơmŏk bô xít alumin hơnơ̆ng tơgop ‘lơ̆ng ăn tơdrong jang tŏk atŭm kơ dêh char… Tơ̆ hop akŏm mă 7, Jơnŭm pơgơ̆r kon pơlei dêh char Lâm Đồng jăl X pơma nuh, tơchơ̆t ăn 32 hla ar chih tơroi păng 21 tơdrong tơchơ̆t nai, lơ̆m noh đei lơ tơdrong tơchơ̆t gĭt kăl, đunh đai.

Tơ̆ phường Pleiku, ‘măng hop akŏm 5 Jơnŭm pơgơ̆r kon pơlei dêh char Gia Lai jăl XII, apĭnh jet găh tơdrong jang tang găn ‘mi kial đak lơ̆p, hơnăp jang vei lăng, tơdrong jang pơchoh đak lŏk păng dôm trong jang vă vei sơđơ̆ng đunh đai lơ̆m khei ‘năr ‘mi kial đak tih roi ‘năr roi kơnê̆ hlôi sơng đei tơdrong bơngơ̆t truh đơ̆ng bơngai tăh hla.

Tơl nơ̆r apĭnh, ƀok Cao Thanh Thương – Kơdră Anih vei lăng găh Choh jang sa păng Cham char Gia Lai – pơma hơdăh ưh kơ đei tơdrong pơchoh đak tơ̆ đak krong Hà Thanh. Tơring pơbăh âu ưh kơ đei dơnâu mong; 2 dơnâu đak tih tơ̆ păih hơlĕch kơ dêh char ‘noh Núi Một păng Định Bình lơ̆m ‘măng ‘mi tih đak lơ̆p âu ki tă kơ đak ƀĕnh ngăl păng tơdrong pơchoh đak dơnâu lăp ƀơm ưh kơ ‘lơ̆ng truh đak krong Côn đĕch. Ƀok Cao Thanh Thương kŭm tơƀôh ăn ưh kơ ‘lơ̆ng lơ̆m pơchoh đak lŏk nhen tơdrong ming man tơ gar iŏk jih đak krong, pơtăm keo lơ̆m tơring pơchoh đak pơm iĕ đak ro, mĭnh bơnơ̆ găn đak Hà Thanh đĭ pơchăh dôm jĭt mét yua đơ̆ng đak tih păng pơm glăi tơ̆ jih bơnơ̆. Găh trong vă jang đunh đai, rim tơring athei dăr hơlen trong jang pôk rĭ kon pơlei kiơ̆ rim tơdrong tih iĕ đơ̆ng ‘mi kial pơrăm.