Mŏ Đinh Thị Trang (25 sơnăm), oei lơ̆m thôn Nước Vuông, tơring Sơn Tây Thượng jĭ bơngai choh jang sa lơ̆m ŭnh hnam. Đơ̆ng mă mơ̆t jang lơ̆m Hơp tak xah Choh jang sa bri ‘long păng Mơdro sa Sơn Bua (Hơp tak xah Sơn Bua), tơring Sơn Tây Thượng, dêh char Quảng Ngãi, mŏ hlôi hŏk pơhrăm iŏk yoa kmăi kmok, pơm joăt hăm trong pơm tơlĕch tơmam drăm choh jang sa. Mơ̆t jang lơ̆m Hơp tak xah, mŏ Trang hlôi jang sa iŏk yoa kơjăp, adoi đei rơvơn hŏk pơhrăm tơdrong jang, pơm hơtŏk gơh hơgei tơdrong jang sa:“Ĭnh năm tơ̆ ou găh tơm ‘noh vă jang, hŏk pơhrăm dôm tơdrong mă ĭnh tim mă băt, vă pơm tơlĕch đei tơmam drăm ‘lơ̆ng liĕm hloh dơ̆ng”.

Trong jang kơ Hơp tak xah Sơn Bua ‘noh choh jang sa, pơm tơlĕch tơmam drăm choh jang sa kơtă, pơjing tơdrong jang ăn kon pơlei păng roi năr roi pơjing đei dôm tơmam choh pơtăm ăn pơm tơlĕch tơmam drăm sơđơ̆ng tơ̆ tơring groi kông. Bơngai pơjing Hơp tak xah ou ‘noh mŏ Lê Thị Ánh (45 sơnăm), bơngai Ca Dong, oei tơ̆ tơring Sơn Tây Thượng. Sơnăm 2020, mŏ Ánh tơchơ̆t pơdơ̆h bơ̆ jang Teh đak, brok vih tơ̆ pơlei pơjing Hơp tak xah Choh jang sa Bri ‘long păng Mơdro sa Sơn Bua hăm hơpơi ‘meh vă hơnhăk tơmam drăm choh pơtăm tơring đei tĕch mơdro tơ̆ ou tơ̆ to. Đơ̆ng kon jên jang kơ Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông jăl jang 2021-2030, Hơp tak xah Sơn Bua đei tơgŭm djru kmăi kmŏk pơm tơlĕch tơmam drăm, kmăi kmŏk choh jang sa.

Mŏ Lê Thị Ánh tơbăt, ‘măng mă blŭng, Hơp tak xah pơm tơlĕch tơmam drăm đơ̆ng prit nhen: Prit sơ̆k, hơlăk prit, đak prit; đơ̆ng rŏng ‘noh pơih să truh tơ-‘mơ̆ng ôi, tơƀăng klat, plei pơlou păng mĭnh ƀar ‘long pơgang. Truh dang ei, hơp tak xah hlôi đei 7 tơmam drăm OCOP:“Dang ei, tơlĕch jang truh ăn kon pơlei ‘noh kăl pơih să hnam kmăi pơm tơlĕch. Pơm hnam kmăi ‘noh kăl răt iŏk kơna kon pơlei mă pơ̆n pơtăm, pơ̆n jang. Tơdăh bơ̆n lăp pơma kơ ƀơ̆r lei kon pơlei ưh kơ pơ̆n ôh. Prăt chăl sơnăm ưh kơ đei tơchă trong jang sa hle ăn kơ dih ôh”.

Sơ̆, lơ ŭnh hnam kon pơlei lê̆ prit chăt mĭnh hơnih đơ̆ng 5 truh 6 tơm. Tơm plei rong răh kon, rong răh hơnglŭng kơna plei prit iĕ, ưh kơ gan ‘lơ̆ng. Đảng viên Lê Văn Hiền (37 sơnăm), bơngai Ca Dong, pơtho ăn kon pơlei lăp rong mĭnh dơnơm prit đơ̆ng mĭnh truh ƀar tơm đĕch, tơgŭm ăn tơm đei plei akŏm kơchơ̆t ‘lơ̆ng ăn hơnglŭng prit. ‘Nhŏng Lê Văn Hiền tơbăt, mĭnh hơnglŭng prit tĕch ăn kơ bơngai mơdro đơ̆ng 20.000 - 30.000 hlak jên, dang ei đei hơp tak xah răt iŏk măt hloh 3 ‘măng: “Mưh đĭ tơchơ̆t hơdăh brŏk tơ̆ ou ‘noh ba ling lang tơchĕng kăl pơm jŭk yŭk trong hơlou, pơm lơ liơ vă kon pơlei gơh hŏk pơhrăm dôm tơdrong mă ba hlôi đei hŏk pơhrăm, chă tơchĕng hơlen. Hăm rim tơmam drăm choh jang sa lơ̆m tơring, pơm lơ liơ vă iŏk đei ƀlep pơkăp ‘lơ̆ng ‘noh ba kăl chă hơlen mă brĕ, tơmơ̆t jên jang păng ling lang dăr lăng kon pơlei chă pơtăm vei lăng năng tông lơ liơ”.

Ƀok Nguyễn Xuân Thọ, Kơdră chĕp pơgơ̆r Hơnih bơ̆ jang vei lăng Mŭk drăm tơring Sơn Tây Thượng, dêh char Quảng Ngãi tơbăt, dôm trong jang hơp tak xah tơlech jang tơgoăt dih băl jang hơdoi choh jang sa, pơm tơlĕch păng tĕch mơdro tơmam drăm, tơgop pơjing đei tơdrong jang sa sơđơ̆ng ăn kon pơlei. Mĭnh ƀar hơp tak xah đei dôm đang viên pơm juk yŭk trong hơlou choh jang sa gô tơgop lơ̆m pơm tơplih jơhngơ̆m đon tơchĕng, trong jang sa ăn kon pơlei: “Hrei ou, lơ̆m tơring jei hlôi đei lơ hơp tak xah. Mĭnh hơp tak xah đei tơdrong jang sa phara dih băl. Hơdrô̆ Hơp tak xah Sơn Bua đei trong jang tơgoăt dih băl jang sa, hăm rim tơmam drăm nhen tra ôi, prit bri, tơƀăng klat păng lơ tơmam drăm anai. Đơ̆ng rŏng ou, mưh tơmơ̆t hơdoi hăm rim hơp tak xah lơ̆m tơring, nhôn gô pơjing đei lơ tơmam drăm ăn tơring, adoi tơgoăt jang hơdoi hăm rim tơring anai vă pơjing đei trong choh jang sa đei tơmam drăm ‘lơ̆ng pơvih pơvăn ăn bơngai răt yoa”.

Đơ̆ng dôm tơmam drăm joăt joe kơ bri kông, rim đang viên bơngai Ca Dong tŏk bŏk tơgop pơih đei trong jang sa ‘nao tơ̆ Sơn Tây Thượng, dêh char Quảng Ngãi.