Năr akŏm pơdah, tơbang tơmam drăm iung pơm jang, pơtoi tơmam drăm OCOP đei pơgơ̆r tơ̆ xah Phú Thiện, dêh char Gia Lai đei 17 hơnih akŏm tơmam kơ 10 xah, tơroi gah lơ tơmam choh pơtăm, tơmam đei pơm tơlĕch kiơ̆ trong jang so juăt jue. Tôm adoi đei gru grua kơdih kơ bơngai drăkăn păng tơdrong joh ayŏ kăp gĭt kơ tơring teh Gia Lai.

Vang pơtruh hăm năr akŏm, Kou lak ƀô̆ tanh brai thôn Plơi Amil, xah Phú Thiện đei 6 ngê̆ nhơ̆n; tơroi păng pơdah gah tơmam drăm tanh đei. Yă Kpă H’Uyên, Kơdră Khul Tanh brai thôn Plơi Amil, xah Phú Thiện tơroi:  “Đei yă ƀok, mĕ ƀă pơtho tanh brai đơ̆ng oei 'lơ̆p noh đunh khei năr inh jing lŭ lăp. Inh hơpơi 'meh vei răk tơdrong tanh brai ăn kon sou ning nai kơnh, noh atŭm hăm pơmai oh jang rah, pơtho rah tơdrong tanh brai hăm ti. Tơmam drăm đei keh đang, nhôn chŭp rup, tơbang lơ̆m mạng tơpôl vă chă tĕch. Rim khei, đei yua pơhlom 10 triu hlj”.

Ưh hơdrô̆ tanh brai, 'nhot xa juăt jue kơ kon pơlei kon kông adoi oei jing trong jang hơtŏk mŭk drăm kơ đe drăkăn tơ̆ dêh char Gia Lai. Pơmai Rcom H’Liên, tơ̆ thôn Plơi Knông, xah Phú Thiện hơnơ̆ng chih tơbang lơ̆m  Facebook gah trong pai pơjing 'nhot xa kơ bơngai Jarai nhen 'nhot hla ƀlang, ka trĭch hla ĕch, iĕr pơhang chŭ ƀoh hơmrĕ peh hăm hla ĕch. Gơnơm đơ̆ng mạng tơpôl, dôm tơmam xa juăt jue lơ̆m tơdrong hơrih kơ kon pơlei đei lơ tơmoi tơ̆ jơ̆p tơring băt truh. Pơmai Rcom H’Liên tơroi gah tơmam drăm xa ah Năr akŏm thoi ou:  “Unh hnam inh hlôi tĕch đei dôm 'nhot xa nhen ka trĭch hla ĕch, hla ƀlang sao, iĕr pơhang đơ̆ng đunh. Đơ̆ng đei mạng tơpôl, nhôn đei bôl buăl păng tơmoi tơ̆ jơ̆p tơring răt tơgŭm lơ hloh. Kơyuơ đơ̆ng noh, unh hnam chă đei jên atăm, atŭm hăm noh tơroi tơbang đei lơ 'nhot xa kăp gĭt kơ kon pơlei kon kông tơ̆ tơring”.

Đơ̆ng dôm tơmam drăm akŏm ƀenh joh ayŏ truh dôm trong jang pơyua tơ̆ tơring, đe drăkăn kon kông Gia Lai tŏk bŏk oei hơtŏk tơ-iung, hơtŏk tơdrong hơrih hăm kơdih jơhngơ̆m jang păng tơdrong gơh hơgei kơ po. Dôm tơdrong hơdrin noh tơgop sơkơ̆t hơdah sơnong jang kơ đe drăkăn lơ̆m tơdrong hơtŏk mŭk drăm unh hnam, vei răk tơƀăk mong joh ayŏ juăt jue păng pơjing pơlei pơla roi năr roi hơtŏk tơ-iung.