Đăk Lăk dang ei 667 dơnou mong đak, lơ̆m noh tơring gah Pơmơ̆t đei 253 tŏ dơnou, tơring gah Hơlĕch 414 tŏ dơnou. Tơ̆ tơring gah Pơmơ̆t, đei 130 dơnou đei lơ đak mong, đei 51%, kơđeh hloh pơkăp 64% kơ khei năr ou sơnăm sơ̆. Tơring gah Hơlĕch, đak tŏ dôm dơnou đak mă lơ đei 70% truh hơla 100% kiơ̆ pơkăp. Đak tơ̆ đak krong Srêpốk, krong Pa, krong Kỳ Lộ păng lơ đak krong, đak glung nai adoi kơđeh hloh dah mă vă jê̆ hơtŏ hăm lơ sơnăm hơdrol.

Yă Đặng Thị Thủy, Phŏ Kơdră Hơnih Choh jang xa păng Cham char dêh char Đăk Lăk ăn tơbăt, El Nino pơm ăn tŏ phang pơđang, ưh kơ mah đak lơ̆m pơyan phang sơnăm 2026–2027. Đak 'mi sơnăm ou 'noh tŏ sĕt hloh kơ lơ sơnăm hơdrol đơ̆ng 20–40%. Tơring gah Hơlĕch 'noh ưh kơ mah đak pơchoh ăn 2.500 ha ƀa pơyan Puih Phang păng 40.000 ha ƀa Pơyan; tơring gah Pơmơ̆t ƀơm răm đơ̆ng 68.000 truh 100.000 ha 'long pơtăm, pơhlom 42.000 unh hnam kon pơlei ưh kơ mah đak sŏ nhă. Hơnih jang choh pơtăm athei hơmet khei năr rei pơtăm ƀa vă gơh đei mah đak pơchoh păng rơih hơdrĕch ƀa mă trŏ ƀlep. Yă Đặng Thị Thủy tơroi gah minh ƀar trong tơlĕch jang:  “Kiơ̆ tơlĕch jang rim sơnăm, đơ̆ng năr 20/12/2026 truh năr 10/01/2027 jĭ khei năr rei pơtăm ƀa pơyan Puih Phang. Mưh đei tŏ pơđang, kon pơlei athei rei pơtăm đơ̆ng rŏng kơ khei năr 'noh vă tang găn răm. Dôm tơring ưh đei ƀơm tŏ phang, đei mah đak pơchoh noh kon pơlei rei pơtăm hrôih hloh khei năr pơkăp. 'Nguaih kơ noh, Hơnih jang hlôi pơjao ăn Hơnih tơm Choh Pơtăm păng Vei lăng 'long pơtăm dêh char jang atŭm hăm rim tơring chă hơlen rơih iŏk hơdrĕch ƀa trŏ ƀlep vă tơplih hăm hơdrĕch ƀa so vă tang găn păng tơjră tŏ pơđang pơrăm”

Ƀok Nguyễn Thiên Văn, Phŏ Kơdră Hơnih vei lăng kon pơlei dêh char Đăk Lăk pơgơ̆r hăm rim hơnih jang, rim tơring pơtoi hơlen lăng păng pơm jang keh đang tơdrong jang, jô̆ hloi năr pơdơh pơdei; kơchăng mong đak tơ̆ dôm dơnou, tang găn huach đak kư kă. Rim tơring hơlen lăng teh đei 'long pơtăm, hơmet khei năr rei pơtăm, păng rơih iŏk hơdrĕch ƀa mă trŏ ƀlep; pơtho kon pơlei ruih 'mơ 'miĕt đak, mong đak păng tenh kuăng hơmet ming dơnou mong đak sŏ nhă. Atŭm hăm noh, tơgŭm tơmam drăm mong đak păng kơchăng tang găn păng pĭt unh xa bri. Ƀok Nguyễn Thiên Văn ră hơdah: “Nhôn athei kơchăng tang găn hơdrol, tơtom tơjră păng hơmŏ tơtenh lơ̆m tơdrong tang găn păng tơjră tŏ phang. Athei jang hơdrol hloh 'noh đak sŏ nhă ăn kon pơlei, mă kăl noh tơ̆ tơring hơtaih yaih, tơring kon pơlei kon kông. Hơnih Choh jang xa păng Cham char jang atŭm hăm rim tơring, rim hơnih jang đei tơrĕk pơtoi chă hơlen kơjăp thong hơbong, vă gơh asong tôm mah ăn tơdrong ming man; akŏm hloi dôm trong jang vă tang găn răm, atŭm hăm noh chih akŏm trong jang tang găn păng pĭt unh xa bri”.