Tổng Bí thư, Kơdră teh đak bơ̆n Tô Lâm ăn tơbăt, Việt Nam tơlĕch tơchơ̆t jing teh đak jang đei yua kơjung, kŏng ngĭp 'nao hơgei ah sơnăm 2030 păng jing teh đak hơtŏk tơ-iung, đei yua kơjung ah sơnăm 2045. Việt Nam sơkơ̆t hơdah khua hŏk kŏng ngê̆, tơplih tơchăr 'nao hơgei, mŭk drăm kơ̆l 'ngok gơh hơgei păng tơplih jơk jing trong jang kăp gĭt; atŭm hăm noh iŏk kon bơngai jing tơm, vei sơđơ̆ng ăn kon pơlei gơh đei yua tơdrong jang đei hơtŏk hơtŏ hơnơ̆ng, tơpă.

Bơnê kơ tơdrong jang tơbôl lơ̆m 55 sơnăm kơ 2 teh đak, Tổng Bí thư, Kơdră teh đak bơ̆n pơtruh nơ̆r chih akŏm tơchơ̆t jang hơdoi lơ tơdrong păng tôm tong hloh, pơih să trong jang hơdoi gah tĕch pơdro, asong jang, pơtho pơhrăm, khua hŏk kŏng ngê̆, unh hơyuh păng tơplih jơk. Ƀar pah adoi kăl hơtŏk tơdrong asong bơngai juăt jang, pơtho bơngai jang hơgei păng hơtŏk pơtho gah kơmăi kơmŏk trong jang 'nao. Gah hơtŏk tơ-iung kơjăp sơđơ̆ng, Việt Nam hơpơi 'meh atŭm hăm Đan Mạch hơtŏk pơma đam, jang hơdoi vei sơđơ̆ng tơpôl păng hiôk hian lơ̆m vih vơ̆t tơ̆ tơring đak dơsĭ athei trŏ ƀlep hăm khôi luơ̆t apŭng plenh teh, tơgop pơjing apŭng plenh teh rơngei hiôk hian, hơtŏ hơnơ̆ng păng hơtŏk tơ-iung kơjăp sơđơ̆ng.