Tơ̆ ving Xuân Đài, lơ thŏng nan kơmăy kiơ̆ băl lĕch tơ̆ dôm hơdrao rong tŏk bŏk ving, chĕp ba tơmam hiĕm ăn hơdang grên. 'Nhŏng Đỗ Xuân Thạnh, Kueng kơphô̆ Phú Mỹ, phường Sông Cầu, jĭ mĭnh lơ̆m dôm bơngai hao thŏng nan kơmăy lĕch tơ̆ âu đơ̆ng hrôih. 'Nhŏng Thạnh tơroi, đơ̆ng rŏng 'mi kial hơbŭt ƀât hơtuch sơnăm sơ̆, ŭnh hnam 'nhŏng đei tŏk iŏk 1 ti hlak jên vă hơmet pơ ‘lơ̆ng hơdrao rong, tăh rong 13.000 tŏ hơdang grên yŏng 'nao. Hlŏh 7 khei vei rong, hơdang tih, gơ̆h rôp tĕch bơih, kŭm đei bơngai apinh răt bơih.

'Nhŏng Thạnh chơt hơiă: "Jô̆ păh lăp hơdang dang ei, dang 2 lang 1 pôm, tĕch đei hlŏh 200.000 hlak jên 1 pôm, dang 800.000 – 900.000 hlak jên 1 kĭ. Akŏm đĭ đăng iŏk yoa đơ̆ng 'măng tĕch mă âu dang hlŏh 2 ti hlak jên. Inh tơchĕng vă kla 1 păh ăn anih mong jên, oei đei dơ̆ng 'nŏh jang xa, răt yŏng rong dơ̆ng hơdang grên lơ hlŏh 2 ‘măng pơting hăm 'măng âu. Tơdăh jang tŏk 'lơ̆ng 'nŏh dang 2 sơnăm dơ̆ng gô tơiung ming dơ̆ng tơdrong jang ‘nâu nhen adrol kơ 'mi kial đak lơ̆p ki."

Kŭm tơ̆ Kueng kơphô̆ Phú Mỹ, phường Sông Cầu mơ̆n, 'nhŏng Đỗ Ngọc Quang dar deh hơmet pơ ‘lơ̆ng ming tơdrong jang rong hơdang grên tơ̆ ving Xuân Đài. 'Măng 'mi kial hơbŭt ƀât hơtuch sơnăm sơ̆ pơm ăn ŭnh hnam hiong răm hloh 2,5 ti hlak jên, ƀât mă ‘nhŏng oei tam mă pơdreo jên ăn anih mong jên kiơ. Gơnơm đei trong jang tơgŭm, 'nhŏng đei pơdui khei ‘năr kla jên, tơjur ƀiơ̆ jên kon păng tŏk iŏk dơ̆ng 800 triu hlak jên vă rong dơ̆ng. Lơ̆m 2 'măng rong đơ̆ng rŏng kơ 'noh, 1 'măng tăh hơdang oei tih ‘lơ̆ng, 'măng mă to ‘noh đĭ truh khei rôp tĕch bơih: "Inh tăh rong 'măng mă mĭnh lơ̆m khei 4 dang 7.000 tŏ; 'măng đơ̆ng rŏng dơ̆ng lơ̆m khei 5 păng khei 8, akŏm đĭ đăng dang 10.000 tŏ. Dang ei oei rôp tĕch hơdang rong 'măng mă blŭng ki, đang kơ 'nŏh rôp tĕch dơ̆ng dôm ‘măng tăh rong đơ̆ng rŏng dơ̆ng, hơnơ̆ng thoi noh."

Tơdrong sar bar, 'mi kial hơbŭt ƀât hơtuch sơnăm 2025 pơm hiong răm lơ ăn tơring tơm rong hơdang grên tơ̆ ving Xuân Đài, hăm vă jê̆ 1.500 ŭnh hnam oei tơ̆ phương Sông Cầu păng Xuân Đài pŭ răm, vă jê̆ 100.000 tŏ hơdrao rong hiong răm, akŏm đĭ đăng đei kơjă dang 1.900 ti hlak jên, lơ̆m noh phương Sông Cầu đei vă jê̆ 2/3. Ƀok Huỳnh Đình Quang, Phŏ Kơdră Anih vei lăng kon pơlei phương Sông Cầu ăn tơbăt, tơring hlôi bơ̆ jang hăm rim anih mong jên vă tơgŭm tơjur ƀiơ̆ jên kon, pơdui khei ‘năr kla jên hre, tơlĕch dơ̆ng kon jên tơgŭm ăn bơngai rong iung jang xa dơ̆ng. Gơnơm đơ̆ng noh, tơring rong hlôi rong hơlơ̆k dơ̆ng đei vă jê̆ 80%. Tơ̆ hơnăp kơnh, phường tơƀôh ăn kon pơlei tơplih ming trong rong, kơchăng jang kiơ̆ khoa hŏk kơmăy kơmŏk vă tang găn tơdrong sar bar, hơtŏk jơhngâm tơjră hăm tŏ 'mi kial kơnê̆, pơrang jĭ, năm truh tơdrong tưk tơiung ming păng jang tŏk pran kơjăp.

“Tơring pơlung kon pơlei rong trŏ anih, trŏ kơsô̆ păng tơring pơkăp; atŭm hăm noh jang kiơ̆ khoa hŏk kơmăy kơmŏk, tơplih đơ̆ng hơdrao tơ̆r 'long jing hơdrao pơm hăm HDPE kơjăp ƀiơ̆, găn ƀiơ̆ tơdrong hiong răm mưh đei 'mi kial hơbŭt. Mưh pơyan 'mi kial hơbŭt truh, kon pơlei kơchăng rôp tĕch, hơmet kơjăp hơdrao rong. Hăm hơdang rong ưh kơ pŭn đei jĭ, athei jăh roi tơbăt vă Khul kơdră tơring păng anih choh jang xa jur tơgŭm ăn kon pơlei.”

Rong ka hơdang jĭ tơdrong jang mŭk drăm tơm tơ̆ găh Hơlĕch dêh char Đắk Lắk mă lei hơnơ̆ng tơƀâp tơdrong krê đei hiong răm lơ̆m pơyan ‘mi kial hơbŭt, athei ‘măn tôm jên jang vă hơmet pơ ‘lơ̆ng hiong hrăm, rong hơlơ̆k dơ̆ng. Lăp hơdrô̆ hăm dôm kơsô̆ jên đei tŏk iŏk vă rong ka hơdang đơ̆ng Agribank tơ̆ Phú Yên, ‘măng ‘mi kial hơbŭt ƀât hơtuch sơnăm sơ̆, pơm ăn đe sư hre đom ưh đei kla trŏ năr truh 6.000 ti. Yak hơdoi hăm bơngai tŏk iŏk jên vang hơmet pơ ‘lơ̆ng pơmat tat, anih mong jên pơdui dơ̆ng khei ‘năr kla hre, tơjur jên kon kŭm hăm tơlĕch thim kon jên asong tŏk iŏk. Hơdrô̆ hăm tơring rong hơdang grên tơ̆ ving Xuân Đài, hlŏh 300 ‘nu bơngai đei tơjur jên kon, atŭm hăm ‘nŏh asong tŏk iŏk dơ̆ng 240 ti hlak jên.

Ƀok Phan Thông Thái, Kơdră chĕp kơ̆l Agribank Phú Yên, ăn tơbăt: "Nhôn pơkăp hơnơ̆ng ‘măn tôm kơsô̆ jên asong tŏk iŏk kŭm nhen khei 'năr asong tŏk iŏk vă tơgŭm dôm ŭnh hnam rong hơdang grên kŭm nhen anih pơm tơlĕch tơmam tŏk iŏk jên jang sa. Tơdrong iŏk yua jên đơ̆ng kon pơlei kŭm đei nhôn vei lăng kơjăp, vă kon pơlei tơmơ̆t jên jang trŏ ƀlep, đei yua hloh. Hăm trong jang thoi âu, anih rong hơdang grên gô đei jang tŏk 'lơ̆ng thoi đêl dơ̆ng iŏk đơ̆ng sơnăm 'nâu truh đĭ sơnăm đơ̆ng rŏng."

Pơyan hơdang mă blŭng đơ̆ng rŏng kơ 'mi kial hơbŭt oei ăn ƀôh lơ tơdrong ‘lơ̆ng hơiă hăm bơngai rong hơdang grên tơ̆ ving Xuân Đài. Đơ̆ng iŏk yua 'lơ̆ng kon jên đei tŏk iŏk vă jang xa dơ̆ng truh trong jang đơ̆ng tơring păng tơdrong adrin đơ̆ng bơngai rong, đĭ đăng đei ƀôh hơdăh hăm lơ hơdrao rong hơdang grên tih ‘lơ̆ng vă gơ̆h rôp tĕch bơih, ưh khan lăp ăn ƀôh tơdrong rong hơdang oei tŏk pran 'lơ̆ng đĕch mă oei pơih trong jang kơjăp ăn tơdrong rong ka hơdang âu.