Đơ̆ng khei 7 sơnăm ou, pơlei Tân Hạ, tơring Tà Năng, dêh char Lâm Đồng tih să hloh dơ̆ng, lơ bơngai hloh dơ̆ng, đơ̆ng rŏng hơrop hăm pơlei Chơ Ré. Hăm hơgăt teh să 476ha, hloh 309 ŭnh hnam, găh lơ kon pơlei kon kông, tơdrong jang kơ Kơ iĕng Ƀĭ thư chi ƀô̆, jang hloi Thôn trơng Cil K’Hạnh hlôi jing tơdrong jang trăp drĭn hloh dơ̆ng. Pơm lơ liơ vă kon pơlei ƀar koeng păng đei jơhngơ̆m đon tơchĕng “bơngai so, bơngai hle” yă atŭm hăm khul bơ̆ jang Măt Trân năm truh rim ŭnh hnam chă pơma dơnuh. Lơ̆m rim ‘măng hop akŏm dăh mă jơ ‘năr jang hơdoi, yă hơnơ̆ng pơjao ăn kon pơlei 2 pơlei so vang jang hơdoi.

Ƀlŏk hơdơ̆r hloh lơ̆m jơ iung jang blŭng a chă chong choh hơmet pơ ‘lơ̆ng trong pơlei đơ̆ng rŏng hơgrop pơlei Chơ Ré hăm pơlei Tân Hạ. Bơngai choh teh, bơngai pơtăm pơkao, bơngai hyum rơ̆m rĕk; rim bơngai jang răh pơma dơnuh dih băl răh păng vang nhă đak pơma dơnuh dih băl chơt hơ iă. Lăng trong pơlei Tân Hạ hle rơgoh ‘lơ̆ng hloh dơ̆ng, yă K’Hạnh ƀôh hơdăh tơdrong tơplih ‘nao. “Đơ̆ng rŏng hơgrop, ba tơchĕng tơdrong kăl hloh ‘noh pơm lơ liơ vă kon pơlei pă đei tơchĕng akhan “bơngai so, bơngai hle”, mă lei lăng tôm tơdrong jĭ kơ kon pơlei mĭnh pơlei Tân Hạ. Kơ yuơ lơ loh, ba hơdrin chă tơƀơ̆p, mơ̆ng kon pơlei chă pơma dơnuh lơ liơ pơđĭ lơ̆m ƀar koeng, tơdrong pơlei ‘noh vang pơma dơnuh dih băl, vang jang hơdoi. Ba ưh kơ gơh pơkoĕl kon pơlei tơgoăt mĭnh ƀơ̆r đon hloi, mă lei pơjing rơvơn vă kon pơlei tơƀơ̆p dih băl, hlôh vao dih băl păng vang jang hơdoi dih băl. Mưh hlôi vang jang hơdoi dih băl tơnăp ‘lơ̆ng lei kon pơlei pă đei hrơ dih băl bơih.”

Tơdrong pơm ăn kon pơlei lui yom ưh khan đơ̆ng dôm nơ̆r pơma hơgei, mă lei iŏk đei đơ̆ng jang tơnăp. Yă K’Hạnh pơchoh trong ăn khul kơdră chĕp pơgơ̆r tơring Tà Năng pơih lăm pơtho khoa hŏk kih thuơ̆t rong kon tơrong, choh jang sa ăn kon pơlei, ăn kon pơlei năm lăng rim mir pơgar đe jang sa iŏk yoa kơjăp ... Yă K’Hạnh pơrô̆ hơvơn kon pơlei tơplih rim mir pơgar ‘long pơtăm plei tŏ sĕt chă pơtăm dôm ‘long pơtăm trŏ lăp hloh dơ̆ng. Hăm dôm ŭnh hnam oei tơnap tap, mŏ chă pơtho tơbăt ăn năm tok iŏk jên. Truh dang ei, pơlei đei 78 ŭnh hnam tŏk iŏk jên đơ̆ng Hơnih mong jên tơgŭm djru Tơpôl, akŏm kon jên tŏk iŏk hloh 6 ti 200 triu hlak jên; hơgăt teh mir pơgar đei 8ha, să hloh 3 ‘măng pơtêng hăm blŭng sơnăm. Pơlei jei iŏk vei lăng hloh 780 ha bri. Kơdih mŏ K’Hạnh iŏk lăng tông nông gia mon Ka Să Ha Cường (hŏk tro lăm 3) kơ yuơ ŭnh hnam tơnap tap. Mŏ Cil Yŭ K’ Im oei lơ̆m pơlei Tân Hạ tơroi tơbăt găh yă Cil K’Hạnh:“Mŏ Cil K’Hạnh jĭ bơngai drŏ kăn jang Thôn trơng tôch tơnăp, ling lang pơm jŭk lơ̆m dôm tơdrong lơ̆m pơlei. ‘Nou jĭ bơngai mă nhôn kăl kiơ̆ yok rok jơ̆ng. Gơnơm đơ̆ng mŏ kơna nhôn mă băt chă pơma sa rơhao dih băl, hlôh vao hloh dơ̆ng dôm tơdrong lơ̆m tơpôl. Sơ̆ lơ̆m mă mŏ K’Hạnh bơ̆ jang găh tơdrong jang pơgang pơlei, mưh đei tơdrong yă kiơ ‘noh mŏ tôch tơnăp chă ming hơmet ăn, tơgŭm đei lơ bơngai, adoi nhen tơgŭm pơm hla bơar ăn dôm bơngai ưh kơ gan hlôh vao”.

Ƀok Bùi Ngọc Nghiễm, Kơdră chĕp pơgơ̆r Khul bơngai kră pơlei Tân Hạ, tơbăt, yă K’Hạnh ‘noh bơngai Thôn trơng tơnăp, hơbĕch hơbal păng tôch tơjê̆ hăm kon pơlei. Mă kăl, đơ̆ng rŏng hơgrop, dôm tơdrong jang yă kiơ yă jei jang klĕp klĕp ngăl.“Tim mă hơgrop ‘noh Hạnh oei lơ̆m pơlei Tân Hạ so tôch hơbĕch hơbal, tơnăp. Đơ̆ng năr hơgrop, mŏ K’Hạnh oei hơnơ̆ng tơnăp đĕch, dôm tơdrong jang jĭ klep klĕp ngăl. Chă bơ̆ jang, oei sa jĭ tôch phăl hơlăng, tơjê̆ hăm kon pơlei. Tơ̆ jơ hop akom, K’Hạnh pơma tơgop nơ̆r tôch kơ lăp, kon pơlei tôch lăp đon. Dang ei ‘noh kơdră chĕp pơgơ̆r pơlei Tân Hạ păng Chơ Ré so jing Tân Hạ hle, jĭ bơ̆ jang đĭ ai, ƀơ̆t pôk rơ̆ih ou ki kon pơlei tôch lăp đon, pôk tơmơ̆t yă đei 97, 98% kơphĭu hloi văi.”

Vă jê̆ 17 sơnăm bơ̆ jang lơ̆m pơlei, yă Cil K’Hạnh, Kơ iĕng Ƀĭ thư jang hloi Thôn trơng pơlei Tân Hạ, tơring Tà Năng, dêh char Lâm Đồng ƀôh hơdăh jơhngơ̆m đon tơgoăt pôm nơ̆r ƀơ̆r đon ‘noh jĭ jơhngơ̆m pran pơjing đei dôm tơdrong jơnei. Đơ̆ng dôm tơdrong jang iĕ mă lei tôch trŏ lăp hăm tơdrong hơrih, mŏ tŏk bŏk roi năr roi tơgop kơtang lơ̆m tơdrong pơm hoei kơdơ̆ mơlou dih băl ƀar păh pơlei so; vă pơlei Tân Hạ đơ̆ng rŏng hơgrop jing pơlei tơgoăt tơgoăl pôm nơ̆r ƀơ̆r đon, tơ iung pơjing hơrih sa ‘nao.