Ƀok Điểu Ngăm (66 sơnăm, bơngai M’nông, oei lơ̆m bon Bu Gia, tơring Quảng Trực) tơbăt, dôm năr ou ki ƀok hơnơ̆ng năm truh hnam hop akom pơlei vă lăng hơlen hơnăn dôm bơngai vă pôk tơmơ̆t jang lơ̆m Jơnŭm vei lăng kon pơlei tơring, jăl jang truh. Kiơ̆ đơ̆ng ƀok Điểu Ngăm, rim bơngai đei hơnăn jei hŏk jrŭ, bơ̆ jang đunh sơnăm, kơ yuơ lơ loh ƀok hơpơi rơih đei bơngai ‘lơ̆ng, hơgei, bơ̆ jang tơnăp, tơpă jing bơngai tang măt ăn nơ̆r pơma kơ kon pơlei, jing bơngai pơm gơng tơroh kloh klĕch ƀar păh Đảng, Teh đak hăm Kon pơlei, tơgop lơ̆m hơnhăk dôm tơdrong bŏ jang teh đak găh tơ iung pơjing tơring sơlam teh đak roi năr roi pơdrŏng ‘lơ̆ng liĕm, gơh hơgei.“Ba tih vơ̆ djơ ‘lơ̆ng tơ̆ ou. Dôm năr ou, năr ayơ ba jei năm truh tơ̆ Hnam hop akom pơlei vă lăng hơlen dôm hơnăn rim bơngai đei hơnăn ăn pôk tơmơt jang lơ̆m Jơnŭm vei lăng kon pơlei tơring. Ba tôch hưch hanh hơmanh bơnê đei năm tăh hla, hơpơi pôk rơih đei bơngai “Pơma gơh, jang gơh”, tơpă jing bơngai tang măt ăn pơlei, tơgop hơnhăk pơlei pơla Quảng Trực roi năr roi atŏk tơ iung.”

Mŏ Thị Huynh (hơdrung M’nông), Tổ trơng Khul pôk rơih kơsô̆ 2 (bon Bu Prâng 2), tơring Quảng Trực tơbăt, khul pôk rơih đei 300 ‘nu bơngai tăh hla, 98% ‘noh bơngai M’nông. Đơ̆ng rŏng Hop akŏm pơdrơ̆ng dih băl ‘măng mă 2 lơ̆m năr 3/2, mŏ atŭm hăm 8 ‘nu đảng viên lơ̆m pơlei hơdrin chă pơrô̆ tơbăt Khôi luơ̆t pôk rơih, pơtho tơbăt ăn bơngai tăh hla chă lăng hơlen mă tôm tong tơdrong oei sa, bơ̆ jang kơ dôm bơngai vă pôk tơmơ̆t, vă sơđơ̆ng vang năm pôk rơih ƀlep khôi luơ̆t, hơtŏ hơnơ̆ng, rơih đei dôm bơngai ‘lơ̆ng, bơ̆ jang hơgei, tơgăl jĭ bơngai tang măt jơhngơ̆m đon păng tơdrong hơpơi ‘meh vă đơ̆ng kon pơlei. “Hrei ou, Hnam hop akom pơlei hlôi đei pơklep hla bơar chih hơnăm dôm bơngai ăn pôk tơmơ̆t jang lơ̆m Jơnŭm vei lăng kon pơlei tơring vă kon pơlei lăng hơlen, rơih đei dôm bơngai đei jơhngơ̆m đon ‘lơ̆ng, bơ̆ jang hơgei, pơm gơng tơroh kloh klĕch ƀar păh Kon pơlei hăm Đảng, hăm Teh đak. Đơ̆ng noh, tơgop lơ̆m hơnhăk dôm trong bơ̆ jang tơgŭm djru đơ̆ng kơdră kơpal găh tơmơ̆t jên jang, tơdrong jang tơ iung pơjing tơgŭm ăn pơlei păng kon pơlei roi năr roi atŏk tơ iung.”

‘Măng pôk rơih Kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei rim kâp, jăl jang 2026–2031, tơring sơlam teh đak Quảng Trực đei hloh 7.200 ‘nu bơngai tăh hla, tăh hla tơ̆ 12 hơnih pôk rơih găh 11 bon păng Trung đoàn 726. Ƀok Đoàn Lê Anh, Kơdră chĕp pơgơ̆r Hơnih bơ̆jang MTTQ Việt Nam tơring Quảng Trực, tơbăt, bơ̆ jang vei lăng sơđơ̆ng, proh hơmet rim hơnih pôk rơih, hơmet ăn bơ̆n hla bơar, kơthŭng tăh hla păng dôm tơdrong pơvih pơvăn ăn pôk rơih hlôi đei tơlĕch jang ‘lơ̆ng hơ iă, sơđơ̆ng ăn năr pôk rơih. Dang ei tơring tŏk bŏk iung jang keh đang rim hơyak tuch luch, hơmet ăn hop akŏm pơdrơ̆ng dih băl ‘măng mă hơtuch, yak truh chih hơnăn tơpă dôm bơngai tang măt Jơnŭm vei lăng kon pơlei tơring jăl truh ou kơnh. Ƀok Đoàn Lê Anh, tơbăt.“Pôk rơih jăl jang 2026–2031, nhôn tŏk bŏk bơ̆ jang hăm rim hơnih vă gô chang đơ̆ng rŏng Hop akŏm pơdrơ̆ng dih băl ‘măng mă pêng sơng iŏk hơnăn dôm bơngai tang măt Kuô̆k hô̆i adoi nhen kơdră tang măt Jơnŭm vei lăng kon pơlei dêh char pơtruh ăn kơ tơring, vă tơlĕch tôm tong dôm hla bơar bơ̆ jang, sơđơ̆ng ăn bơ̆ jang pôk rơih đei jang kiơ̆ ƀlep tơdrong tơchơ̆t. Hơdrô̆ hăm Jơnŭm vei lăng kon pơlei tơring, hrei ou nhôn tŏk bŏk dăr lăng hơlen, hơmet ăn vă tơ̆ Hop akŏm pơdrơ̆ng dih băl ‘măng mă hơtuch, sơkơ̆t hơdăh hơnăn đơ̆ng 40 ‘nu bơngai tang măt lê̆ pă 33 ‘nu bơngai đơ̆ng noh tăh hla pôk rơih iŏk 20 ‘nu bơngai tang măt ăn Jơnŭm vei lăng kon pơlei tơring iung bơ̆ jang lơ̆m jăl truh ou kơnh.”

Hăm tơdrong hơmet ăn ‘lơ̆ng, ‘măng pôk rơih tơ̆ tơring sơlam teh đak Quảng Trực lui akhan gô pơgơ̆r hơtŏ hơnơ̆ng, ƀlep tơdrong tơchơ̆t, pơjing đei jơ ‘năr chơt hơ iă ‘nă hal lơ̆m kon pơlei. Kon pơlei rim hơdrung M’nông pơtruh ăn tôm tong jơhngơ̆m đon lui kơjăp lơ̆m hla kơphĭu, hơpơi rơih đei dôm bơngai tang măt đei jơhngơ̆m đon ‘lơ̆ng, gơh hơgei, bơ̆ jang tơnăp, tơjê̆ tơklep hăm kon pơlei, hlôh vao kon pơlei. Đơ̆ng noh, tơgop lơ̆m tơ iung pơjing pơlei pơla Quảng Trực roi năr roi pơdrŏng ‘lơ̆ng liĕm, gơh hơgei.