Tơ̆ phương Phan Thiết, phương dơnơm kơ tơring đak dơsĭ kơ dêh char Lâm Đồng, lơ̆m dôm năr ou ki, tơdrong tơroi gah pôk rơih hơnơ̆ng kơ rơ-ông rơ-ang tơ̆ tơring kon pơlei oei xa. Kon pơlei hăt hot chă hơlen lăng hơnăn, tơdrong hơrih jang xa păng tơdrong pơm jang kơ dôm bơngai lĕch măt tơgar vă rơih đei dôm bơngai jang tang măt mă tơgăl. Hăm kon pơlei tơ̆ tơring ou, năm pôk rơih ưh hơdrô̆ jĭ sơnong pơyua mă oei jĭ sơnong jang kơ kon pơlei hăm teh đak. Ƀok Trần Hữu Trung, Kueng kơphô̆ 14, phương Phan Thiết tơroi: “Mă mônh noh lơ̆m unh hnam kon pơlei kueng ƀôt, kueng kơphô̆ ou ah ‘năr tơpơh athei asong jơ năr vă năm pôkr ơih tôm tong. Tơ̆ ou tơdrong juăt jue đơ̆ng sơ̆ truh dang ei ah ‘năr dơ̆ng pôk rơih đang bơih. Kon pơlei, bơngai tah hla hơpơi ‘meh tôm bơngai đei đon ‘lơ̆ng, gơh hơgei pơgơ̆r kon pơlei păng mă kăl noh jăl jang ou athei tơplih đon tơchĕng noh kon pơlei chơt hơ-iă dêh”.

Jơ năr hơmet ăn năr pôk rơih jei tŏk bŏk lang să truh hăm tơring groi kông kơ dêh char Lâm Đồng. Tơ̆ thôn Long Lanh, tơring Lạc Dương, tơring hơrih sa kơ kon pơlei hơdrung K’ho, rim tơdrong kơtơ̆ng ang găh pôk rơih đei kon pơlei lăng kơjăp, pơma dơnuh dih băl rim ‘măng hop akŏm pơlei păng pơma dơnuh dih băl lơ̆m unh hnam. Mŏ Dà Ju K’Tim, tơbăt: “Mưh chă tơƀơ̆p bôl buăl dăh mă chă pơma dơnuh dih băl lơ̆m ŭnh hnam ‘noh ba hơnơ̆ng chă pơma tơroi dơ̆ng mĭnh ƀar tơdrong đei ƀơm truh pôk rơih. Găh jơ năr pôk rơih, rim bơngai đei hơnăn ăn pôk rơih ‘măng mă ou păng hơnih năm tăh hla. Jăl jang ou ‘noh mĭnh jăl jang tôch gĭt kăl, ba hơmŏ kơdih ba păng rim bơngai tăh hla anai gô rơih đei dôm bơngai tơpă đei jơhngơ̆m đon ‘lơ̆ng, bơ̆ jang hơgei păng tơnăp, đei trong jang ‘nao vă tơ iung pơjing Teh đak kơ kon pơlei, kơ yuơ kon pơlei păng yua kon pơlei”.

Đơ̆ng tơring đak dơsĭ truh tơring groi kông kơ dêh char Lâm Đồng, đĭ đăng jei lăng truh năr pôk rơih Kơdră tang măt Kuô̆k hô̆i jăl 16 păng Kơdră tang măt Jơnŭm vei lăng kon pơlei rim jăl jang sơnăm 2026 - 2031 hăm jơhngơ̆m đon lui păng hơmŏ kơtang. Năr 15/3 hloh 2,7 triu ‘nu bơngai tăh hla kơ dêh char Lâm Đồng hăm rim kơphĭu pôk rơih đei hơlen kơjăp ‘noh tơdrong tơbăt ăn jơhngơ̆m đon lui kơjăp đơ̆ng Kon pơlei lơ̆m dôm bơngai tang măt tơgăl hloh, dôm bơngai đei jơhngơ̆m đon ‘lơ̆ng, bơư jang hơgei, tơnăp vă pơvih pơvăn ăn Teh đak păng Kon pơlei.