Tơ̆ plei Bàu Trúc, xăh Ninh Phước, hơnih đei hloh 95% kơsô̆ kon pơlei ‘noh bơngai Chăm, tơdrong jang roi tơbăt pôk rơih đei tơlĕch jang truh tơ̆ rim ŭnh hnam kon pơlei. Bơngai đei đe lui yom lơ̆m pơlei nhen ƀok Đàng Chí Quyết hơdrin năm truh tơ̆ rim ŭnh hnam vă krao hơvơn kon pơlei vang tăh kơphiê̆u. Ƀok kŭm pơtho bơngai tăh hla chă hơlen lăng tơdrong bơ̆jang, tơdrong hơrih sa đơ̆ng dôm bơngai lĕch pơjei kiơ̆ rim kênh kơtơ̆ng ang trŏ ƀlep hơdrol kơ pôk rơih. Ƀok Đàng Chí Quyết tơbăt:

“Jĭ bơngai tơring kơna ĭnh hlôh tơdrong joăt oei sa kơ kon pơlei. Yua thoi noh năm tơ̆ rim trong, tơteh ‘măng rim hnam vă krao hơvơn, mă loi ‘noh jĭ tơƀơ̆p dôm tơ ‘ngla hnam, bơngai vei lăng tơdrong lui khop păng bơngai vei lăng hơdrĕch hơdrŭng. Kiơ̆ đơ̆ng noh đe sư hơnơ̆ng tơroi dơ̆ng ăn bơngai lơ̆m ŭnh hnam, kon sâu găh jơ năr, hơnih kŭm nhen trong pôk rơih, vă kon pơlei băt rơih iŏk dôm bơngai tang măt đei jơhngơ̆m đon ‘lơ̆ng, gơh rơgei, tang măt ăn đon hơdrin păng hơpơi ‘meh vă đơ̆ng bơngai tăh hla.”

Kŭm hăm tơring bơngai Chăm, jăl jang âu rim tơring groi kông kơ Khánh Hòa kŭm tŭn pran roi tơbăt, krao hơvơn bơngai tăh hla vang pôk rơih. Tơ̆ xăh Trung Khánh Vĩnh, lơ trong jang roi tơbăt pơgơ̆r trŏ lăp hăm tơring kon kông. Anih pơgơ̆r pôk rơih kơ xăh jang hơdai hăm kră pơlei, bơngai pơgơ̆r pơlei vă roi tơƀlang hơdăh Luơ̆t pôk rơih hăm nơ̆r Raglai, hơdai hăm ‘noh pơtho kon pơlei chă hơlen lăng hơnăn păng tơdrong bơ̆jang đơ̆ng dôm bơngai lĕch pơjei. Lơ tơdrong pơtih ăn mưh đei ƀôh kŭm đei tơlĕch ăn vă dôm grŭp pơhrăm tơdrong gơh hơmet ‘lơ̆ng lơ̆m yan âu. Yă Cao Thị Ngọc Thanh, Kơdră Anih vei lăng kon pơlei xăh Trung Khánh Vĩnh tơbăt:

“Nhôn pơgơ̆r joh ayŏ kơdŏ soang, tôn chĭng chêng vă sơng đei kon pơlei truh vang akŏm, kiơ̆ đơ̆ng noh tơgep roi tơbăt găh tơdrong ‘lơ̆ng đơ̆ng tơdrong pôk rơih. Kiơ̆ đơ̆ng dôm tơdrong jang âu, kon pơlei hlôh akhan pôk rơih ưh khan lăp jing hơnăp jang kơ kon pơlei mă oei jing năr chơt hơiă tih kơ đĭ đăng kon pơlei.”

Dôm tơdrong jang hơbĕch hơbal, rơgei tơ̆ Khánh Hòa hlôi tơgŭm kon pơlei kơchăng chă hơlen lăng tơdrong bơ̆jang, băt rơih iŏk dôm bơngai tang măt đei jơhngơ̆m đon ‘lơ̆ng păng gơh rơgei. Tơdrong hơiă lăng găh năr pôk rơih păr ang đơ̆ng tơring groi kông truh anih kơdrơ̆m tơter đak dơsĭ kơ Khánh Hòa, hơmet tôm ‘lơ̆ng ăn năr chơt hơiă tih kơ đĭ đăng kon pơlei./.