Hơnih hop akŏm kơsô̆ 2 kơ Hnam pơgang Đa khoa tơring Tây Nguyên dôm năr âu ƀrŭng ƀrăng hla kơ ƀrê. ‘Nâu jĭ hơnih pôk rơih kơsô̆ 44 găh Anih pơgơ̆r pôk rơih phường Buôn Ma Thuột, dêh char Đắk Lắk. Ƀak si Nguyễn Ngọc Thịnh, Phŏ Kơdră vei lăng hnam pơgang, Kơdră Grŭp pôk rơih tơ̆ Hnam pơgang, tơbăt, truh dang ei rim tơdrong jang ăn tơdrong pôk rơih đĭ hơmet tôm ‘lơ̆ng.

“Pơđĭ bơngai jang kơ hnam pơgang nhôn hlôi iŏk đei kơ the bơngai tăh hla. Tơ̆ hnam pơgang đei 1 tơdrong tôch kơ hơdrô̆ ‘noh jĭ bơngai jĭ păng bơngai lơ̆m ŭnh hnam ƀĭch kơ tă tơ̆ hnam pơgang, yua thoi noh Grŭp pôk rơih kơ hnam pơgang hơmet ăn 2 ‘nu vei lăng kơthŭng kơphiê̆u, hơnhăk ba truh tơ̆ rim lăm jĭ vă dôm bơngai tăh hla ‘noh bơngai jĭ ưh kơ gơh năm vih vơ̆t gơh tăh kơphiê̆u kơtă hloi tơ̆ giơng jĭ.”

Điều dưỡng Nguyễn Thị Cẩm Vân, tơbăt: ‘nâu jĭ ‘măng mă 3 sư vang pôk rơih kơtă tơ̆ hnam pơgang. Mă đơ̆ng tơdrong jang vei lăng bơngai jĭ tôch kơ hrăt hrot, mă lei tơ gĕch jơ pơdơh, sư đa năm truh tơ̆ hơnih pơklep hơnăn bơngai tăh hla păng đŏk hơlen tơdrong chih tơbăt tơdrong jang, tơdrong hơrih sa bơngai lĕch pơjei vă hơlen lăng. Mŏ ‘meh vă rơih iŏk đei dôm bơngai đei jơhngơ̆m đon ‘lơ̆ng, gơh hơgei vă pơtruh jơhngơ̆m đon tơchĕng, ‘meh vă đơ̆ng kơdih.

“Ĭnh ‘meh rơih iŏk đei dôm bơngai tang măt đei jơhngơ̆m đo ‘lơ̆ng, gơh hơgei, jing gơng tơƀưh đơ̆ng anih jang pơgang hăm Đảng, Teh đak. Đe sư ‘noh gô tang măt ăn đon hơdrin, hơpơi ‘meh vă đơ̆ng nhôn; hơdai hăm ‘noh nơ̆r pơma đơ̆ng nhôn ‘moi kiơ̆ đe sư ‘noh gô truh đei hăm Đảng, Teh đak vă bơngơ̆t truh hloh, tơmơ̆t jên jang anih jang, tơmam drăm ăn hnam pơgang ‘lơ̆ng hloh vă pơyua ăn jơhngơ̆m pran kon pơlei dêh char Đắk Lắk ‘lơ̆ng hloh.”

Hnam pơgang Đa khoa tơring Tây Nguyên đei 1.200 tŏ giơng bơngai jĭ ƀĭch păng hloh 1.250 ‘nu kang ƀô̆, y ƀak si, bơngai jang. Lơ̆m tơdrong pôk rơih ‘năr dơning, bơngai tăh hla ‘noh kang ƀô̆, bơngai jang kŭm hăm rơbâu ‘nu bơngai jĭ păng ŭnh hnam bơngai jĭ tŏk bŏk ƀĭch tơ̆ hnam pơgang, hơmet tơ̆ hnam pơgang gô vang tăh kơphiê̆u tơ̆ hơnih pôk rơih kơsô̆ 44, găh Anih pơgơ̆r pôk rơih phường Buôn Ma Thuột, dêh char Đắk Lắk. Hăm tơdrong hơmet ăn tôch kơ ‘lơ̆ng, tơdrong pôk rơih tơ̆ hơnih pôk rơih gĭt kăl âu gô pơgơ̆r jơnei ‘lơ̆ng, sơđơ̆ng hiôk, trŏ tơdrong hơgăt.