Đơ̆ng rŏng pơm lêh soh nhang, kơdră chĕp kơ̆l Anih tơm pơgơ̆r khŭl linh Quân khu 7 hơlen lăng tơ̆ hơnih khŭl linh tơchă ‘nao chă ƀôh dơ̆ng 1 hơnih pơsat lơ̆m kơplăh pơih să hơnih tơchă. Hơnih âu oei jê̆ hơnih hlôi chă ƀôh, sir akŏm kơting linh lôch tang ăn teh đak hơdrol ‘noh. Lăp đơ̆ng rŏng kơ chă ƀôh hơnih, Khŭl K74 hlôi vei lăng hơnih âu, akŏm khŭl linh păng gre tơmam tơlĕch jang tơchă kiơ̆ ƀlep trong jang.

Kơdră chĕp kơ̆l Quân khu 7 athei Anih tơm pơgơ̆r khŭl linh pơlei tơm Hồ Chí Minh păng Khŭl K74 hơnơ̆ng tơchĕng hơlen mă hơlen hơnih, pơih să hơnih tơchă, ưh kơ lê̆ lon dôm hơnih đei jâu. Kơting, tơmam păng dôm hơnih ƀơm truh athei đei chih iŏk, vei lăng, chih pơkeh hla ar, pơvih pơvăn mă trŏ, hơlen lăng hơnăn linh lôch tang ăn teh đak.