Pơma ah jơ lêh, ƀok Đặng Đức Hiệp, Ƀĭ thư Thanh uy Đà Lạt sơkơ̆t hơdah, lơ̆m tơdrong iung tơjră Mi dŏng teh đak, Đà Lạt – Tuyên Đức hlôi nuih mơng iung tơblah, tơgop kăp gĭt ăn tơdrong tơblah jơnei tơring pơbah, rơngei teh đak. Lơ̆m khei năr truh, Đảng ƀô̆, jơnŭm pơgơ̆r tơring păng kon pơlei pơlei tơm pơtoi iŏk yua jơhngơ̆m pran tơguăt tơguăl, khŏm mă pơjing Đà Lạt jing tơring kơdrơ̆m gơh hơgei, tơring kơdrơ̆m mŭk drăm kơ apŭng plenh teh, iŏk yua tơnăp rim jơhngơ̆m pran, pơm ăn  Đà Lạt hơtŏk tơ-iung kơjăp sơđơ̆ng.

Ƀơ̆t 'măng ou, Anih jang vei lăng kon pơlei dêh char Lâm Đồng adoi pôk Ki niê̆m chương “Kơyuơ tơdrong jang tơ-iung păng hơtŏk dêh char Lâm Đồng” ăn 50 'nu kan ƀô̆, đe kơdră dêh char, pơlei tơm kiơ̆ dôm jăl pơgơ̆r, kon pơlei păng anih jang mŭk drăm lơ̆m tơring, tơgop kăp gĭt ăn tơdrong hơtŏk tơ-iung kơ tơring.