Iung pơma ah lêh tơbăt, Đại tướng Phan Văn Giang, jang lơ̆m Anih tơm Chĭnh trĭ, Phŏ Ƀĭ thư Kuân uy Trung ương, Ƀô̆ trương Anih tơm pơgơ̆r Khul linh ră hơdah, Lâm Đồng jĭ dêh char gah Pơbah Tây Nguyên, đei anih dơ̆ng kăp gĭt lơ̆m tơdrong jang mŭk drăm, tơpôl, vei sơđơ̆ng teh đak. Tang măt ăn kơdră Đảng, Teh đak, Đại tướng Phan Văn Giang hmach bơnê kơ dôm tơdrong jang đei jơnei tih mă Đảng ƀô̆, jơnŭm pơgơ̆r tơring, khul linh păng tôm kon pơlei dêh char Lâm Đồng hlôi jang đei lơ̆m 50 sơnăm kơ ou. Đại tướng tơbăt, tơ̆ hơnăp Lâm Đồng athei akŏm jơhngơ̆m pơm jang đei jơnei dôm tơchơ̆t hơtŏk mŭk drăm – tơpôl, vei sơđơ̆ng tơpôl teh đak, pơm trong kơjăp vă tơring tŏk jang kiơ̆ anglŏ sơnăm 'nao.

Tơnăp gah hơmet pơ-'lơ̆ng hanh chĭn, hơtŏk khua hŏk kơmăi kơmŏk 'nao, tơplih 'nao gơh hơgei păng tơplih kơmăi kơsô̆, hơmet pơ-'lơ̆ng tơdrong jang tĕch pơdro, hơtŏk tơdrong tơgar pơm jang. Hơnơ̆ng hơtŏk gah tơdrong tơguăt tơguăl tôm kon pơlei, pơm jang tơnăp tơchơ̆t tơgŭm pơyua ăn kon pơlei, mă kăl noh hăm rim bơngai mă teh đak tơchơ̆t tơgŭm, tơring kon pơlei kon kông. Khŏm mă hơ-'nhăk Lâm Đồng jing minh dêh char hơtŏk tơ-iung tenh păng kơjăp sơđơ̆ng.