Ƀar đảng viên đei pôk Mê đai 80 sơnăm jang Đảng 'noh ƀok Nguyễn Đức Chung, 102 sơnăm, oei tơ̆ kueng Vạn Thọ, xah Vạn Phú păng yă La Thị Hoa, 97 sơnăm, oei tơ̆ kueng kơphô̆ 9, phương Tích Lương. Tơ̆ dôm unh hnam, Đại tướng Phan Văn Giang sơkơ̆t hơdah, Mê đai 80 sơnăm jang Đảng jĭ tơmam pôk hơpah ăn tơdrong hơdrin păng plang jang đơ̆ng rim đảng viên, atŭm hăm noh jing tơdrong pơ-ư pơ-ang kơ unh hnam, kơtum kơtŏng, pơlei pơla păng hơnih jang đảng tơ̆ tơring.

Đại tướng hơpơi 'meh rim đảng viên 'lŏ sơnăm pơtoi vei lăng jơhngơ̆m jăn, chĕp vei đon bơnôh 'lơ̆ng kăch mạng, đon pơkăp chĭnh trĭ, jing um rup 'lơ̆ng vă đe kang ƀô̆, đảng viên, mă kăl noh đe sơnăm mơlôh hŏk pơhrăm păng ƀoi kiơ̆.