Năr 9/11/1946, tơ̆ 'Măng hop akŏm mă 2, Kuô̆k hô̆i jăl 1 hlôi hơlen lăng Khôi luơ̆t mă blŭng kơ teh đak Việt Nam Dân chủ Cộng hòa, pơm gru kăp gĭt ăn tơdrong hơtŏk tơ-iung lơ̆m jơhnơr hơrih chih akŏm khôi luơ̆t kơ teh đak. Khôi luơ̆t sơnăm 1946 iung jing, sơkơ̆t hơdah tơdrong rơngei hiôk hian păng tơdrong pơgơ̆r kơdih kơ teh đak, sơkơ̆t hơdah dôm tơchơ̆t gah pơm jang kơ jơnŭm pơgơ̆r teh đak, atŭm hăm noh sơkơ̆t hơdah sơnong jang tơm kơ kon pơlei.

Khôi luơ̆t sơnăm 1946 tơbang hơdah đon tơchĕng gơh hơgei gah pơjing Teh đak kơ kon pơlei, tơgĭt tơdrong pơm tơm đơ̆ng kon pơlei, tơdrong rơngei hiôk hian păng tơchơ̆t hơtŏ hơnơ̆ng kiơ̆ khôi luơ̆t. Găn ga 80 sơnăm, atŭm hăm tơdrong pơjing, vei lăng păng hơtŏk tơ-iung teh đak, tơdrong jang khôi luơ̆t Việt Nam hơnơ̆ng kơ keh đang, pơtrŏ hăm tơdrong jang vei lăng kơ teh đak, hơtŏk mŭk drăm – tơpôl păng jang hơdoi lơ̆m apŭng plenh teh. Dôm kơjă kăp gĭt gah tơdrong rơngei hiôk hian, vei sơđơ̆ng 'lơ̆ng hăm sơnong pơm tơm kơ kon pơlei, păng hơnih jang pơgơ̆r kơpal hloh kiơ̆ Khôi luơ̆t pơtoi đei iŏk jang, hơtŏk lơ̆m dôm Khôi luơ̆t kiơ̆ rim jăl pơgơ̆r.