Tŏk bŏk mir pơgar ‘long găr sơlơ̆k tơ̆ pơlei Bi, tơring Ia Dom, mĭnh pang teh hlôi đei koh hyum rơgoh vă pơvih pơvăn ăn tơchă kơting ƀô̆ đô̆i lôch dŏng teh đak. Dôm dơnơm ‘long găr sơlơ̆k tŏk bŏk plei đei koh hŭt kiơ̆ jơhngơ̆m đon hơpơi ‘meh vă đơ̆ng kơdih tơngla mir pơgar ‘noh kră pơlei Siu Pich, mĭnh ‘nu ƀô̆ đô̆i so hlôi đei vang tơblăh vang tơ̆ tơring sơlam Păh pơmơ̆t pơbăh.

Lơ̆m rim ‘măng jang mir pơgar, ƀok Pich ƀôh rim tơnglĕp koăl tăng, hơnhŭn tơ̆ hơla teh lơ̆m mir pơgar ‘long găr sơlơ̆k. Jou đei ƀŭ ƀô̆ đô̆i lôch dŏng teh đak, ƀok năm tơroi hloi ăn khul bơ̆ jang, đơ̆ng noh ba trong păng chro tơƀôh hơnih vă ƀô̆ đô̆i dăr lăng hơlen. Mă đơ̆ng mir pơgar ‘long găr sơlơ̆k jĭ ‘long pơtăm hơnhăk ăn ŭnh hnam iŏk đei, kră pơlei Siu Pich ưh kơ drơ̆ng drơ̆t koh hŭt hloi dơnơm ‘long, plang teh vă tơchă dôm bơngai ƀô̆ đô̆i oei tơkơ̆l tơ̆ ou.“Dơnơm ‘long ba koh păk mă lei jơhngơm ba oei chơt hơ iă, ăn koh hloi, kơ yuơ bôl boăl ba tơkơ̆l lơ lou lăng mơnat dêh.”

Mơ̆t pơm ƀô̆ đô̆i khei 11/1975, hlôi đei ‘măng vang iung tơblăh tơ̆ tơring sơlam teh đak păh Pơmơ̆t Pơbăh, kră pơlei Siu Pich băt hlôh ƀôh hơdăh tơdrong hiong răm đơ̆ng tơblăh vang păng jơhngơ̆m đon ơh sơ-‘ngon mưh bôl boăl tơkơ̆l. Kơ yuơ lơ loh, mưh ƀô̆ đô̆i Khul K52 chôt vih dơ̆ng tơ̆ tơring sơlam teh đak ou năm tơchă kơting ƀô̆ đô̆i lôch dŏng teh đak, ƀok Siu Pich nhen lĕ tơchă ƀlŏk dơ̆ng dôm tơdrng sơ̆ ki kơ bơ̆n.

Vă jê̆ mĭnh khei kơ ou, mir pơgar ‘long găr sơlơ̆k hơtăih kơ hnam dang 7 kây sô̆ hlôi jing mir pơgar ƀok hơnơ̆ng năm vih vơ̆t. Rim ‘măng rơhơi, ƀok năm lăng, apĭnh jet gia păng pơma dơnuh hăm rim ƀô̆ đô̆i tŏk bŏk bơ̆ jang. Tŏk bŏk lơ̆m ‘năr tŏ hlơ hlĕng, kial jăng tơ̆ tơring sơlam, bơngai ƀô̆ đô̆i so sơnăm ‘lŏ kră ling lang dreng lăng rim tơdrong jang kơ rim ƀô̆ đô̆i hle hrei ou. Ƀok băt akhan, đơ̆ng rŏng tơnglat ‘nhik, rim ‘măng sir tơchă ‘noh jĭ hơmŏ tơchă ƀôh dơ̆ng mĭnh kơl bôl boăl đei blŏk vih hăm pơlei pơla.“Ba hơpơi pơm lơ liơ bôl boăl ba đei brŏk vih hăm ŭnh hnam, roi lơ roi ‘lơ̆ng. Ba ƀôh ‘nhŏng oh ƀô̆ đô̆i bơ̆ jang năm tơchă bôl boăl lơ loh jĭ tôch mơmat tat hrat hrĭn tơpă mơ̆n. Tŏ, kial tôch mơmat, jơhngơ̆m đon băt ‘mêm kơ eng dih băl bôl boăl lơ lou jĭ vă kiơ ƀơm dơ̆ng.”

Đơ̆ng kơtơ̆ng ang mă kră pơlei Siu Pich tơbăt ăn, kang ƀô̆, ƀô̆ đô̆i grŭp 1, Khul K52, Hơnih bơ̆ jang Chinh trĭ kơ Ƀô̆ đô̆i dêh char Gia Lai hlôi iung jang năm dăr lăng, hơlen hơdăh păng iung jang sir tơchă lơ̆m mir pơgar ‘long găr sơlơ̆k.

Thượng tá Hoàng Viết Ngọc, Chính trị viên Khul K52, tơbăt, truh dang ei, hơnih hlôi kôch akom đei 16 kơl ƀô̆ đô̆i lôch dŏng teh đak atŭm hăm lơ tơmam drăm nhen kơting, sơnĕnh, koăl tăng, hơnhŭn kơ ƀô̆ đô̆i. Mă kăl, lơ̆m kơsô̆ ou đei mĭnh lŏk pơsat đei hloi kơƀang chih hơnăn ƀô̆ đô̆i lôch dŏng teh đak Nguyễn Thanh Trì, lôch lơ̆m năr 18 khei 5 sơnăm 1970. ‘Nou jĭ kơtơ̆ng ang tôch gĭt kăl, tơgŭm ăn rim hơnih bơ̆ jang hơnơ̆ng hơlen hơdăh hơnăn păng tơchă ŭnh hnam kơ ƀô̆ đô̆i lôch dŏng teh đak.“Đơ̆ng kơtơ̆ng ang mă ƀok Siu Pich tơbăt ăn, nhôn năm dăr lăng, lăp đơ̆ng rŏng sơkơ̆t hơdăh. Ƀok Siu Pich tơroi akhan lơ̆m dang sơnăm 1973 hlôi đĭ băt bro ou. Lăp đơ̆ng rŏng hơlen đei ƀôh hơdăh tôm tơdrong trŏ lăp kơna khul hlôi iung jang sir tơchă đơ̆ng năr 5/10 dĭng truh dang ei.”

Tơ̆ tơring Ia Dom, Khul kơdră tơring tŏk bŏk iung jang hơdoi hăm Khul K52 chă pơrô̆ hơvơn kon pơlei tơbăt ăn kơtơ̆ng ang, tơgŭm djru bro teh păng pơjing rơvơn ăn bơ̆ jang năm tơchă, kôch akŏm kơting ƀô̆ đô̆i lôch dŏng teh đak. Đơ̆ng rŏng tơchă ƀôh rim kơting ƀô̆ đô̆i lôch dŏng teh đak, tơring proh hơmet hơnih soi yôk tơ̆ Hơnih bơ̆ jang kơ Ƀô̆ đô̆i tơring vă kon pơlei năm soh hlôt nhang, ƀlŏk hơdơ̆r ‘mêm kơ eng dôm bơngai hlôi plang ăn pham lĕch sĕch huŏng.

Ƀok Trần Ngọc Phận, Ƀĭ thư Đảng tơring Ia Dom, tơbăt, dôm tơdrong kơtơ̆ng ang mă rim kră pơlei, thôn trơng păng bơngai ‘lŏ kră chă tơbăt ăn tŏk bŏk tơgop tôch gĭt kăl lơ̆m tơdrong jang năm tơchă dôm ƀô̆ đô̆i oei tơkơ̆l lơ̆m groi teh kơ tơring.“Dôm bơngai so, rim kră pơlei, thôn trơng, dôm bơngai kră hlôi tơroi tơbăt ăn kơtơ̆ng ang tôch gĭt kăl, nhôn hơnơ̆ng iung jang hơdoi hăm Khul K52, Ƀô̆ đô̆i dêh char gô iung jang dôm tơdrong yă kiơ ‘lơ̆ng hơ iă hloh vă chông ba rim đe mih ma brŏk vih hăm kon pơlei, brŏk vih hăm groi teh mĕ, tơbăt ăn jơhngơ̆m đon ‘mêm tôch bach hăm rim ƀô̆ đô̆i hlôi plang ăn pham lĕch sĕch huŏng vă hơnhăk đei tơdrong pơm tơm kơdih, rơngei hiôk hian ăn teh đak”.

Tơ̆ Ia Dom, tơdrong tơroi kơ kră pơlei, ƀô̆ đô̆i so Siu Pich oei jing tơdrong tơroi găh jơhngơ̆m đon ƀlŏk hơdơ̆r dơ̆ng chăl sơnăm tơblăh vang hrang tơƀet oei gei kơjăp lơ̆m jơhngơ̆m đon kon pơlei, găh jơhngơ̆m đon ƀlŏk hơdơ̆r, ‘mêm kơnat dih băl bôl boăl ƀô̆ đô̆i ưh kơ lai yơ hiơt hiong păng jơhngơ̆m đon tơgoăt tơgoăl dih băl ƀô̆ đô̆i kon pơlei ling lang gei kơjăp iăp kơtang tơ̆ tơring sơlam teh đak. Tơ̆ groi teh tơring sơlam teh đak Gia Lai, ‘măng iung jang năm tơchă ‘noh oei hơnơ̆ng iung jang. Dôm ƀô̆ đô̆i Khul K52 oei hơngŭr druh kiơ̆ gru gra, kon pơlei oei hơnơ̆ng tơgŭm jơhngơ̆m đon hăm dôm tơdrong bơ̆n băt. Đĭ đăng jei lăng truh minh tơdrong hơpơi ‘meh vă chông ba dôm bơngai hlôi plang ăn pham lĕch sĕch huŏng brŏk vih hăm groi teh mĕ, vă jơhngơ̆m đon gô chang kơ lơ ŭnh hnam đei chhơp jơhngơ̆m, vă jơhngơm đon lăng ba dih băl ƀôl boăl ƀô̆ đô̆i păng jơhngơ̆m đon tơgoăt tơgoăl ƀô̆ đô̆i kon pơlei ling lang pơchrang hơdăh ang rang ‘lơ̆ng tŏk bŏk lơ̆m tơdrong hơrih sa hrei ou.