Lơ̆m noh, 2 tơdrong jang găh jăl trong Phạm Văn Đồng, phường Sông Cầu hlôi pơdui đunh hlŏh 4 sơnăm, ‘nao jang đei lăp 30%. 3 tơdrong jang man anih jang, trong nơnăm tơ̆ tơring kon pơlei oei xa Đồng Bàu Neo, Thôn 3 păng Hòa Lợi oei tơhlăk găh teh, dôm tơdrong jang ‘nâu ‘nao jang đei lăp 23%, 3% păng 15%. Tơdrong jang pơm hơmet, pơih xă trong ĐH.31 kŭm hiơ̆ hyĭn ‘năi, hăm tơdrong jang pơm trong ‘nao jang đei lăp 45% đĕch.

Pơma nơ̆r pơtho lơ̆m jơ bơ̆ jang, Phŏ Kơdră vei lăng kon pơlei dêh char Đào Mỹ athei dôm tơring bơ̆ jang mă pran tơdrong chưk pơ ‘ngoăih teh; dôm tơ ‘ngla tơmât jên jang păng anih iŏk jang kơchăng jang hơdoi, hơmet pơ ‘lơ̆ng pơmat tat, pơm kiơ̆ tơdrong hơgăt đơ̆ng luơ̆t. Dôm anih iŏk jang pơrơ̆ng jang hiơ̆ hyĭn, ưh đei pơm kiơ̆ nơ̆r pơkăp gô đei tơlĕch hŭt lơ̆m dôm tơdrong jang nai.