Hơnih jang vei lăng kon pơlei dêh char Đăk Lăk hlôi tơlĕch Tơchơ̆t kơsô̆ 25/2026 athei Hơnih jang Pơtho Pơhrăm atŭm hăm rim tơring hơtŏk hơlen hơdah tơdrong pơm kiơ̆ pơkăp dôm tơdrong tơmơ̆t jên mong tơ̆ hnam trưng hŏk; sek tơlang mă kơhret hăm dôm tơdrong pơm glăi tơchơ̆t tơlĕch. Dôm kơsô̆ jên thu iŏk athei trŏ bơngai, trŏ tơdrong, trŏ tơchơ̆t păng đei tơbang hơdah vă mĕ ƀă hŏk tro, đe hŏk tro gơh băt hơdah.

Lơ̆m khei năr dêh char Đăk Lăk 'nao hơgrop hnam trưng hŏk. Jơ̆p dêh char oei 625 hơnih pơtho pơhrăm kŏng lơ̆p đơ̆ng rŏng kơ tơjur hloh 600 jơnŭm pơgơ̆r. Tơdrong pơgơ̆r sơđơ̆ng ăn tơdrong pơtho pơhrăm athei yak hơdoi hăm tơdrong vei lăng kơjăp jên hu su kăk kơ hnam trưng, tang găn lê̆ đei tơdrong tơgop jên ah blŭng sơnăm hŏk pơm pơngơ̆t kơ đon đe mĕ ƀă hŏk tro.

Hơnih jang Pơtho Pơhrăm Đăk Lăk pơgơ̆r hăm rim hnam trưng hŏk pơm kiơ̆ tôm tơchơ̆t tơgŭm ăn đe hŏk tro, mă kăl noh hŏk tro đei tơdrong hơrih tơnap tap, hŏk tro tơ̆ tơring kon kông; ưh đei lê̆ tơdrong tơgop jên blŭng sơnăm hŏk jing tơdrong tơnap tap hăm rim unh hnam. Atŭm hăm noh, Hơnih jang athei chih tơbang kơsô̆ điê̆n thuăi kăl vă sơng iŏk nơ̆r pơtruh đơ̆ng kon pơlei. 'Nou đei lăng jĭ minh lơ̆m dôm trong vă ƀôh băt tơtom, hơmet dôm tơdrong pơm glăi lơ̆m pơm kiơ̆ pơkăp thu iŏk jên tơgop tơ̆ hnam trưng hŏk.

Yă Lê Thị Thanh Xuân, Kơdră Hơnih jang Pơtho Pơhrăm dêh char Đăk Lăk ăn tơbăt, hơnih jang hlôi tom pơtruh dôm hla bơ-ar pơtho tơbăt gah vei lăng jên hu, mŭk drăm, đei pơjao đơ̆ng rŏng kơ hơgrop păng jên tơgop ah blŭng sơnăm hŏk. Hơnih Pơtho Pơhrăm Đăk Lăk pơgơ̆r hăm rim hnam trưng hŏk athei pơm kiơ̆ trŏ tơchơ̆t đơ̆ng blŭng sơnăm hŏk hloi; mưh đei tơdrong pơm glăi 'noh athei chă dăr lăng, hơmet păng sek tơlang kiơ̆ trŏ tơchơ̆t tơlĕch:  “Dôm tơdrong pơkăp đei tơrĕk truh jên tơgop ah blŭng sơnăm hŏk 'noh nhôn kŭm pơtho ăn rim hnam trưng pơm kiơ̆ trŏ. Dôm kơsô̆ jên tơgop ah blŭng sơnăm hŏk kŭm tom đei hla bơ-ar vă hơmet, vei sơđơ̆ng ưh lê̆ đei tơdrong thu iŏk jên kư̆ kă, dôm tơdrong hơnơ̆ng pơm pơngơ̆t jơhngơ̆m đon păng tơnap tap gah jên hu, pơm tơnap tap ăn đe hŏk tro”.