Lơ̆m noh, Tơdrong tơlĕch jang 3 lơ̆m Tơdrong asong ming man jăl trong kơdou hrĕnh Khánh Hòa – Buôn Ma Thuột jăl 1 hơtaih 48km, đơ̆ng Km69+500 (xah Ea Kar) truh Km117+593 (xah Ea Knuếc), găn 7 xah đei Ea Ô, Vụ Bổn, Tân Tiến, Krông Pắc, Ea Knuếc, Ea Ning păng Ea Ktur. Tơdrong ming man pơjing trong găn dơnơm tơroh Tây Nguyên hăm tơring Pơbah Tŏk bŏk, tơroh dôm trong pơdơ̆ng, iŏk yua tơdrong đei jơnei kơ dôm tơdrong tŏk bŏk oei ming man, kiơ̆ đơ̆ng noh pơih să tơdrong hơtŏk tơgar jang, vei sơđơ̆ng tơpôl păng hơtŏk pơyua ăn tơpôl.

Atŭm hăm noh, Tơdrong ming man jăl trong Hồ Chí Minh trong veh gah Hlĕch Buôn Ma Thuột hơtaih 39,6km, hơnih tơm ah xah Cuôr Đăng păng hơnih mă hơtuch noh ah xah Hòa Phú, găn 5 xah, phương đei Cuôr Đăng, Ea Kao, Hòa Phú, Ea Knuếc păng Ea Ktur. Tơdrong ming man tơgop tơjur ƀiơ̆ hrăt hrot ăn jăl trong lơ̆m tơring kơdrơ̆m, hơtŏk sơđơ̆ng hloh ăn tơdrong iŏk yua jăl trong Hồ Chí Minh, hơtŏk tơroh đơ̆ng dôm dêh char Tây Nguyên, vă jang ăn hơtŏk mŭk drăm – tơpôl păng hơmet vei sơđơ̆ng tơpôl lơ̆m tơring.

Adoi lơ̆m 'năr ou, tơ̆ tơring gah Hlĕch kơ dêh char Đăk Lăk (dêh char Phú Yên so), minh ƀar tơdrong ming man nai adoi đei pơtơm ming man, đei Tơring tơmang pơhiơ̆ pơdơh pơdei Cù Lao Mái Nhà tơ̆ xah Ô Loan păng 2 tơdrong ming man hnam oei tơpôl tơ̆ phương Bình Kiến păng tơring gah Tu jăl trong Trần Phú, phương Tuy Hòa, tơgop keh đang ming man tơdrong kăl ăn tơring kơdrơ̆m păng pơtrŏ tơdrong pơyua tơpôl ăn kon pơlei tơ̆ tơring.