Jăl trong 27 găn thôn Phi Jút (xah Đạ Rsal so, dang ei noh Đam Rông 3, dêh char Lâm Đồng) hơtaih hloh minh kơsô̆ ƀenh kơ hơlŭng hŭt đak lơ̆p. Gre tih chơ tơmam, gre chơ tơmoi, gre hơyuh păng gre hon đa yak găn dôm hơnih hơlŭng hŭt ƀenh kơ đak lơ̆p. 'Nhŏng Phan Mười, bơngai đei hnam ah jih trong ou ăn tơbăt, trong hư răm đunh 3–4 sơnăm kơ ou bơih, pơm tơnap tap ăn tơdrong vih vơ̆t, chơ tơmam drăm, atŭm hăm noh hơmŏ tơdrong ưh kơ sơđơ̆ng hăm trong nơnăm: “Pơyan 'mi noh ưh kơsŭk ôh, đak lơ̆p ƀenh nhen chŭn na. Gre kơdou găn pơm tơprah đak păng teh trôk đom lơ̆m chơnĕng hnam, oei pơyan phang noh inh athei tang 'măng, hơrih xa tơnap tap dêh. Đei lơ tơdrong vih vơ̆t pơ̆k gre, phơ phŏ đei bơngai lôch kơtă ah hơnăp hnam inh hloi. Adoi hơpơi 'meh hơnih jang kơpal dah hrôih chă ming hơmet jăl trong ou ăn kon pơlei vih vơ̆t ƀônh ƀŏ hloh, ăn đe kon mon năm hŏk pơhrăm sơđơ̆ng hloh”

'Nhŏng Bùi Tuấn Anh, vơ̆r gre chơ tơmoi jăl trong Gia Lai - Lâm Đồng tơroi, hnam 'nhŏng oei tơ̆ Jăl trong 27 jê̆ 10 sơnăm ou. Hơdrol ki, jăl trong đơ̆ng Đăk Lăk năm truh Lâm Đồng hơdrô̆ lơ̆m 5 jơ, dang ei jăl trong hư răm noh kơdou đunh truh 6 dah mă 7 jơ hloi. Lơ̆m khei năr tơmơ̆t hơdai dêh char, kơsô̆ tơmoi vih vơ̆t tŏk truh 30-40%, pơm ăn hơnih jang gah gre vih vơ̆t athei hơtŏk 'măng kơdou. Mă lei trong ưh kơ 'lơ̆ng, gre kơdou pŏng lŏng pơm ăn tơmoi glep lap, noh jên hao gre tŏk hloh ƀar 'măng: “Bơngai hao gre hơnơ̆ng kơ soai; gre kơdou pŏng lŏng noh ƀônh răm, mă hăt gah pah ah hơnăp păng pah gah rŏng gre; lôp gre noh hơnơ̆ng ƀơm tơmo kăt, noh jơ̆ng gre och. 'Nguaih kơ noh, hơdrol ki trong  'lơ̆ng noh ưh đei huach đak dou, dang ei trong ưh kơ 'lơ̆ng huach atăm dơ̆ng 15–20 lit đak dou lơ̆m rim 'măng kơdou, kơlih athei kơdou ah kơsô̆ kơđeh, ưh gơh kơdou hrĕnh ô, pơm ăn đak dou tŏk pơhlom 500.000 hlj”

Ƀok Trương Trung Thắng – Phŏ Kơdră Hơnih jang Ming man dêh char Lâm Đồng sơkơ̆t hơdah, dang ei đei pơhlom 21 km Jăl trong 27 găn apŭng Đam Rông (so), lơ̆m jăl Km85+500 - Km106 ƀơm hư răm kơdêh. Tơdrong tơm noh kơyuơ dôm sơnăm tơjê̆ ou 'mi tih đunh năr, gre vih vơ̆t noh tơtă gre trăp, lơ gre kơdou păng tơdrong ming hơmet jăl trong ưh đei tơtom.

Ƀok Trương Trung Thắng ăn tơbăt, Hơnih jang hlôi pơtruh nơ̆r hăm Hơnih jang vei lăng kon pơlei dêh char Lâm Đồng apinh asong hơdrol 10 tih hlj vă ming hơmet trong nhen: Choh chong jih trong, hơmet hơbong pơchoh đak, hơmet ah hơnih hơlŭng hŭt. Gah đunh khei năr, hlôi chih akŏm tơdrong vă jang pơtruh ăn Hơnih jang vei lăng kon pơlei dêh char păng Hơnih tơm Ming man kĭ pơkăp asong 110 tih hlj vă hơmet ming pơkeh tôm 21km jăl trong hư răm, khei năr pơtơm ah sơnăm 2026. Ƀok Trương Trung Thắng tơroi: “ 'Nou jĭ jăl trong kông krang kuĕch kuĕl, trong hư răm kơdêh kăl kơ ming hơmet tơtenh. Kiơ̆ kơ noh, nhôn hlôi keh đang dôm tơdrong chih akŏm vă jang, bieh pơtơm jăl trong mă hơdah, păng dang ei hlôi rơih hơnih iŏk ming hơmet. Ah mă rơih đei hơnih iŏk ming man bơih noh pơtơm asong ming man”

Jăl trong 27 dang ei ưh pă đei hơdrô̆ pơtoi Đăk Lăk - Lâm Đồng, mă oei pơtoi hăm jăl trong 725 găn dôm xah gah Pơmơ̆t kơ Lâm Đồng hăm hơnih tơm jang hanh chĭnh Đà Lạt. Hơmet jăl trong ou gô pơklaih tơdrong tơhlăk tơhlĭn hơtŏk tơ-iung lơ̆m dêh char, tơgŭm vei sơđơ̆ng hloi ăn kon pơlei. Lơ̆m hơtŏk tơroh dôm tơring, đei atăm dơ̆ng minh jăl trong Hlĕch – Pơmơ̆t hơtŏk tơ-iung kơ jơ̆p tơring Pơbah Tŏk bŏk.