Hnam đei man hăm kon jên mong măi đơ̆ng lơ sơnăm choh jang kơ klo kăn yă Lê Thị Minh Trang, tơ̆ plei Vĩnh Xuân, xăh Tuy An Tây, dang ei păk pơchăh đĭ pă đei yă kiơ đơ̆ng rŏng kơ kông găh rŏng hnam hơlih. Kơsơ̆ 19/11, hnam đei ƀôh tơnăr hơđăh ƀât lơ anih, khul kơdră tơring tơtom chông tơlĕch dôm bơngai lơ̆m hnam. Mă lei lăp đơ̆ng rŏng 1 măng đei ‘mi tih, hnam âu păk pơchăh đĭ hloi: “Unh hnam nhôn kŭm hăm mih ma duch nă tơ̆ kueng nhôn âu hơpơi ‘mĕh teh đak man hnam ăn mih ma duch nă, tơdăh hơnơ̆ng oei xa tơ̆ anih oei pơgia thoi  âu ‘nŏh mơmat dêh”.

Tơdrong arih xa kơ unh hnam yă Trang jĭ tơdrong đei atŭm kơ 35 unh hnam kon pơlei athei pôk hnam tŏk oei tơ̆ nai tơ̆ plei Vĩnh Xuân. Kiơ̆ ƀok Lê Minh Ý, Bí thư chi ƀô̆ pơm hloi ƀok pơgơ̆r plei Vĩnh Xuân, adrol kơ đei ‘mi tih, đak lơ̆p, kon pơlei tơ̆ âu arih xa gơnơm đơ̆ng jang chŭn đĕch, chă pơtăm bơ̆n prit, bơ̆n kơtao. Đơ̆ng rŏng kơ 'mi kial kơsô̆ 13, ƀa hơƀo tam mă kĕ iung 'noh đei 'mi tih đak lơ̆p klăm dơ̆ng pơm hiong răm roi dêh, tŭn lơ unh hnam jing ưh đei hnam oei, tơhiong pơđĭ teh choh jang xa. Dang ei, đon hơpơi dêh hlŏh đơ̆ng kon pơlei 'nŏh jĭ jăh đei anih oei xa sơđơ̆ng 'lơ̆ng: “‘Nao âu Anih vei lăng kon pơlei kŭm chă iŏk nơ̆r tơgop đơ̆ng mih ma duch nă, đe tôch lăp đon kŭm ‘mĕh đei tŏk oei tơ̆ anih sơđơ̆ng ‘lơ̆ng ƀiơ̆. Hơpơi ‘mĕh jăh jang hrôih vă kon pơlei đei anih oei xa kơjăp ‘lơ̆ng, jăh pơm sơđơ̆ng tơdrong arih.”

Ƀok Phan Quang Phi, Kơdră vei lăng kon pơlei xăh Tuy An Tây, ăn tơbăt, khul kơdră pơgơ̆r xăh hlôi hơlen năng, chih akŏm nơ̆r pơma đơ̆ng 49 unh hnam lơ̆m tơring đei teh hơlih, pơ 'nhŏ jên jang hơdrol pơm hơmet ăn oei xa ăn 35 unh hnam tơ̆ anih krê hơmơt hlŏh. Tơring pơm anih oei xa 'nao đei rơih găh xăh Tuy An Nam, atăih kơ anih oei so dang 5km: “Tơring oei jang hơdai hăm xăh Tuy An Nam kŭm nhen Anih vei lăng lai yơ pơm đang hla ar pơjing tơring oei xa ‘nao ‘nŏh pơgơ̆r ming man dôm tŏ hnam âu. Adrin pơm ‘lơ̆ng kiơ̆ nơ̆r pơtho đơ̆ng Thủ tướng teh đak.”

Tơdrong hơiă hlŏh mưh pơjing tơring oei xa ‘nao ‘nŏh jĭ tơdrong drơ̆ng mĭnh nơ̆r đơ̆ng kon pơlei tơ̆ tơring sơng iŏk kon pơlei. Tơ̆ plei Quảng Đức, xăh Tuy An Nam – tơring đei rơih vă pơjing anih oei xa ‘nao – hlôi đei 17 unh hnam pơjao teh vă pơm hnam, pơjing anih oei xa ăn dôm unh hnam đơ̆ng tơring đei tĕh hơlih tŏk oei.

Yă Nguyễn Thị Chín, Bơngai pơgơ̆r pơlei Quảng Đức, xăh Tuy An Nam tơroi: “Pơlei krao hơvơn mih ma duch nă tơ̆ âu vang tơgŭm, chĕng song teh pơjing tơdrong ‘lơ̆ng ăn dôm unh hnam tơ̆ tơring teh hơlih tŏk oei tơ̆ âu vă kŭm hăm băl arih xa hiôk chơt, kon pơlei tơ̆ âu kŭm tôch tơgŭm. Mih ma duch nă tơ̆ âu pơjing tơdrong 'lơ̆ng, chă tơgŭm ăn dôm unh hnam pơmat tat ƀiơ̆, nhen thoi hla 'lơ̆ng, bơ̆ng hla hiăh 'nŏh.”

Tơdrong tơgŭm băl ‘nŏh đei tơƀôh hơdăh kiơ̆ tơdrong pơm đơ̆ng yă Trương Thị Nhung, tơ̆ plei Quảng Đức, xăh Tuy An Nam, mưh vă jê̆ 2 sao teh kơ unh hnam yă đei ƀât anih vă iŏk pơdreu vă man hnam oei ăn kon pơlei tŏk oei tơ̆ plei hle: “Inh chu ăn ưh đei kiơ ôh, ba năng ‘nŏh nhen thoi tơgŭm ăn dôm bơngai tơ̆ tơring teh hơlih sŭng, lăp kăl kla tôm jên ăn kon pơlei đĕch, ưh kơ pơmat kiơ ôh.”

Vă hơtŏk hrĕnh tơdrong jang, kơdră chĕp kơ̆l dêh char Đắk Lắk kŭm hăm dôm anih jang kơpal đei ƀơm truh păng kơdră chĕp kơ̆l 2 xăh Tuy An Tây păng Tuy An Nam jur dăr lăng ƀât anih teh đei rơih vă pơm anih oei xa ‘nao ăn 35 unh hnam kon pơlei. Tơring âu đei teh xă dang 3 ha, đei 52 pơgar kơ 20 unh hnam. Tơ̆ jơ bơ̆ jang, ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk athei dôm anih jang kơpal vang jang hơdoi mă kơjăp, pơjing grŭp jang tơgŭm vă pơm bơ̆n hla ar kiơ̆ trong jang gĭt kăl, tơjur ƀiơ̆ năr pơm vă tơmât jên jang, pơm ‘lơ̆ng lăp hăm khôi luơ̆t vă jăh tơlĕch man hnam ăn kon pơlei:“Bơ̆n jang kiơ̆ trong jang gĭt kăl, mưh bơ̆ jang kŭm athei bơ̆ jang ming man mă hrĕnh, man kơjăp 'lơ̆ng. Mă lei athei gơ̆h 'mơ 'met, vă gơ̆h đei yoa dêh hlŏh, ưh lê̆ đei tơdrong brăh brư, pơhuach kư̆ kă, veh ver tơdrong pơm glăi.”

Tơdrong pơjing dơ̆ng anih oei xa ‘nao ăn 35 unh hnam tơ̆ tơring teh hơlih tơ̆ xăh Tuy An Tây ưh lăp trong jang ƀât măt dang ei vă vei lăng ‘lơ̆ng tơdrong arih ăn kon pơlei đĕch, mă oei tơƀôh hơdăh đon tơnăp đơ̆ng khul kơdră pơgơ̆r dôm tơring, kŭm hăm tơdrong mât 1 ƀơ̆r đon, tơgŭm băl lơ̆m tơpôl hai.