Pơgê năr 18/12, Phŏ Thủ tướng teh đak bơ̆n Hồ Quốc Dũng atŭm hăm khul kơpal hlôi truh hơpong ngôi, asong tơmam păng thơ thou hơ-iă Pơyan Nô-el tơ̆ Hnam Khop tơm Tơring khop Huế, atŭm hăm noh năm hơpong ngôi, thơ thou hơ-iă hăm kon pơlei kiơ̆ khop lơ̆m pơlei tơm Huế. Tang măt ăn Khul kơpal kơ Đảng păng Teh đak, Phŏ Thủ tướng hlôi pôk kơvang pơkao, pơtruh nơ̆r thơ thou hăm Ƀok soi tih Đặng Đức Ngân, rim bơngai pơgơ̆r tơdrong khop păng tôm kon pơlei kiơ̆ khop tơ̆ Tơring khop Huế sơng minh pơyan Nô-el sơnăm 2025 sơđơ̆ng sơnêp sơnoi, tơnŏ, sơnăm 'nao 2026 sơđơ̆ng 'lơ̆ng hiôk chơt, pơtoi chĕp vei tơdrong băt 'mêm kơ teh đak, hơrih “Hơ-iă 'lơ̆ng trŏ hăm Êbiang khop”.

Atŭm năr noh, Phŏ Thủ tướng hlôi năm hơpong ngôi, asong tơmam ăn 2 unh hnam kiơ̆ Kŏng yăo đei tơdrong hơrih tơnap tap tơ̆ phương Thuận Hóa păng năm hơlen tơdrong jang ming hơmet hnam oei ƀơm răm đơ̆ng 'mi kial đak hơbông, jang kiơ̆ pơkăp “Tơdrong jang Quang Trung” tơgŭm ăn kon pơlei sơđơ̆ng tơdrong hơrih tơ̆ xah Lộc An, pơlei tơm Huế.