Dang ei dêh char Dak Lăk tŏk bŏk tơlĕch jang ming man 3 hnam trương tơ̆ rim tơring sơlam teh đak Ia Lốp, Ia Rvê hăm Ea Bung, hăm akŏp kon jên tơmơ̆t jang vă jê̆ 127 ti hlak jên. Truh dang ei, lơ hơnih ming man tơm hlôi ming man keh đang dang 47% tơdrong jang ming man. Tơ̆ hơnăp tơdrong pơkoel pơm keh đang rim hram trương vă tơtom tơmơ̆t iŏk yoa lơ̆m sơnăm hŏk ‘nao, Bí thư Đảng dêh char Dak Lăk Lương Nguyễn Minh Triết athei rim hơnih ming man dăr lăng hơlen tơdrong jang ming man, ăn dơ̆ng khul jang, kmăi kmŏk; adoi pơjao ăn Hơnih vei lăng hnam trương pơtho pơhrăm krao tơmơ̆t, pơjao jang ăn ƀok thây kô, hơmet ăn kmăi kmŏk tơmam drăm pơtho hŏk pơhrăm, hnam tep pơdơ̆h ăn hŏk tro păng pơjing trong jang pơrô̆ pơrôp, hơvơn hŏk tro năm hŏk đơ̆ng blŭngs sơnăm hŏk hloi. Dêh char Dak Lăk jei athei hơmet ăn tôm tong phe sa, tơmam drăm sa sơđơ̆ng rơgoh ‘nhĕm ‘nhot ăn hŏk tro oei sa kơtă tơ̆ hnam trương, mưh hnam trương ming man keh đang ‘noh gơh iung jang pơtho pơhrăm hloi. Mă kăl, Ƀí thư Đảng dêh char Dak Lăk athei iung jang kơtang hơvơn bơngai jang tơgŭm djru ming man tơdăh kăl, lơ̆m ou đei trong jang iung jang hơdoi hăm khul ƀô̆ đô̆i vă ming man keh đang tĕnh koăng hơdrol năr 30/7.