Dêh char adoi tơchơ̆t hơdah, asong jên jang kiơ̆ rim jăl jang. Vă jang đei jơnei tơchơ̆t ou, Hơnih jang vei lăng kon pơlei dêh char Lâm Đồng pơgơ̆r hăm rim hơnih jang, rim tơring păng hơnih iŏk ming man athei hơtŏk tơnăp tơdrong pơm jang ăn tơpôl; sơkơ̆t hơdah sơnong jang kơ bơngai chĕp kơ̆l păng kang ƀô̆ dăr hơlen tơdrong jang, kiơ̆ rim tơdrong jang. Hơnih jang vei lăng kon pơlei dêh char Lâm Đồng pơjao ăn Hơnih jang Nô̆i vŭ pơgơ̆r, jang atŭm hăm rim hơnih jang đei tơrĕk vă chă dăr hơlen tơdrong jang hăm rim hơnih jang, rim tơring lơ̆m pơm kiơ̆ pơkăp asong jên jang ăn tơpôl; tơgŭm sek tơlang kơjăp dôm tơdrong pơyoch glăi, jang ưh đei keh đang sơnong jang.

Atŭm hăm noh, chih hơlen tơgŭm ăn Hơnih jang vei lăng kon pơlei dêh char kiơ̆ tơdrong đei jơnei gah asong jên jang ăn tơpôl vă pơkăp hơlen pôk jang hăm kang ƀô̆ lơ̆m khei năr truh. Sơnăm 2026 kơsô̆ jên asong jang ăn tơpôl kơ dêh char Lâm Đồng 'noh hloh 20.000 tih hlj. Truh hơtuch khei 4, dêh char Lâm Đồng pơtơm asong đei hloh 875 tih hlj, tam mă đei 10% tơdrong pơjao jang.