Đơ̆ng rŏng mơ̆ng tơbăt păng rim nơ̆r tơgop pơma dơnuh tơ̆ jơ bơ̆ jang, Tổng Bí thư, Kơdră chĕp pơgơ̆r teh đak Tô Lâm pơma hơdăh, pơm pơkeh tơdrong tơchơ̆t khôi luơ̆t păng hơmet pơ ‘lơ̆ng tư pháp đei tơdrong mơ̆t lĕch dih băl, tơgoăt dih băl kơjăp, kăl đei mĭnh hơnih tơm chĕp pơgơ̆r pơrô̆ iung jang tơ iung pơjing khôi luơ̆t, pơgơ̆r jang kiơ̆ khôi luơ̆t păng hơmet ming tư pháp ‘noh mĭnh trong jang kăl, hrơ̆p mĭnh ‘măng, jơnei. Tổng Bí thư, Kơdră chĕp pơgơ̆r Teh đak pơma hơdăh, tơdrong hơmet pơ ‘lơ̆ng ưh khan lăp proh hơmet trong jang mă lei hơmet pơ ‘lơ̆ng trong chĕp pơgơ̆r, pơrô̆ jang kơ Trung ương hăm tơdrong jang tơ iung pơjing, pơm pơkeh teh đak pháp quyền xã hội chủ nghĩa Việt Nam. Tổng Bí thư, Kơdră chĕp pơgơ̆r teh đak sơkơ̆t hơdăh, tơchơ̆t hơdăh hơnih jang, tơdrong jang kơ Ban Nội chính Trung ương păng Hơnih tơm Tư pháp; adoi kăl tơchơ̆t mă hơdăh, hơdăh hơnăp jang, hơdăh tơdrong jang kơ rim hơnih bơ̆ jang păng hơdăh trong iung jang hơdoi; hơnơ̆ng pơm pơkeh khul bơ̆ jang kơ Hơnih chĕp pơgơ̆r. Tổng Bí thư, Kơdră chĕp pơgơ̆r Teh đak Tô Lâm pơjao ăn Đảng ủy Hơnih tơm Tư pháp pơm tơm,iung jang hơdoi hăm Ban Nội chính Trung ương tơgoăt iŏk tôm tong nơ̆r tơgop lơ̆m hop akŏm, pơm pơkeh hla bơar pơtruh ăn, hla bơar tơroi tơbăt tơdrong bơ̆ jang Hơnih tơm Chinh trĭ.