‘Măng pơlong đei 2 Khul: Khul tơchăr păng Khul Pơjing tơdrong vă jang. Khul tơchăr đei dôm trong tơchăr pơjing tơdrong jang hlôi đei dăh mă tim mă đei tơmam drăm, tĕch răt, yă rup tơmam drăm (demo), mă lei tim mă đei ƀôh tơ̆ hơnih mơdro xa păng tim mă đei tơdrong đei iŏk yoa. Starup đei trong tơchăr hơ iă gô đei pơgơ̆r hok pơhrăm, tơgŭm djru pơm pơkeh trong tơchăr, tơgoăt hăm khul joăt jang, bơngai tơmơ̆t jên jang vă gơh pơjing đei rim tơdrong vă jang ‘lơ̆ng hơ iă hloh.

Khul pơjing Tơdrong vă jang đei rim tơdrong vă jang pơjing tơdrong jang hlôi đei tơmam drăm, tĕch mơdro ou to dăh mă jang pơlong năng hăm rim tơmoi păng hlôi iŏk đei iŏk yoa sa hơpăh; dăh mă tim mă đei iŏk yoa sa hơpăh mă lei hlôi đei kon jên tơmơ̆t jang, đei tôm tơdrong pơkăp vă hơlen iŏk đei jơnei dang yơ bơih.

Rim tơdrong vă jang hơ iă gô đei rơvơn sơng iŏk đei tơgum djru tôm tong trong jang mơdro sa, pơm hơtŏk hlôh vao tơblang hơdăh, tơchă khul vang jang păng vang pơlong ‘măng pơgơ̆r pơjing tơdrong jang kơtang hloh dơ̆ng.

Phŏ Giáo sư, Tiến sĩ Lê Đức Niêm, Phŏ Kơdră chĕp pơgơ̆r Hnam trương Đại học Tây Nguyên, hơlen trong tơlĕch ăn ‘măng Pơlong sơnăm ou jĭ tôch trŏ lăp, pơma hơdăh athei pơjing trong tơchăr jing đei iŏk jơnei hơdăh:  “Hơnăn ‘Đơ̆ng tơdrong tơchăr truh đei iŏk yoa’ jĭ nơ̆r pơtruh ăn tôch hơdăh, tơƀôh hơdăh jơhngơ̆m đon tơplih ‘nao tơchăr kiơ̆ rim tơdrong tơchơ̆t đơ̆ng Đảng, nhen Tơdrong tơchơ̆t 57. ‘Noh jĭ hơnhăk dôm trong vă jang, kmăi kmŏk mơ̆t lơ̆m tơdrong jang yan ou vă iŏk đei jơnei kơjăp. ‘Nou jĭ jơ rơvơn vă rim bơngai pơjing tơdrong jang, hơnih mơdro sa ‘nao vang iung jang, mă blŭng ‘noh hŏk pơhrăm dih băl, đơ̆ng rŏng ‘noh tơƀôh tơbăt tơmam drăm, adoi pôk pơ ư dôm trong tơchăr hơ iă păng đei jơnei mă hơnih mơdro sa pơjing đei”.

Hăm sinh viên, ‘măng pơlong pơih đei rơvơn hŏk pơhrăm, koăt iŏk dôm tơdrong hơgei păng pơlong chă tơchăr. Oh Trần Thị Thiện Hạnh, sinh viên Hnam trương Đại học Tây Nguyên, tơbăt: “ ‘Măng pơlong jĭ tôch gĭt kăl. Hăp tơgŭm ăn kơ ĭnh koăt iŏk dôm tơdrong hlôh vao, rơvơn, pơlong năng jơhngơ̆m kơdih, đơ̆ng noh vă kơ ba hlôh vao ƀiơ̆ păng pơvih pơvăn ăn tơdrong jang đơ̆ng rŏng ou kơnh”.

Ƀok Trần Thanh Sơn, Kơ iĕng Kơdră chĕp pơgơ̆r Hơnih jang Khoa hŏk păng Kmăi kmŏk dêh char Đắk Lắk tơbăt bơ̆ jang tơplih ‘nao tơchăr tŏk bŏk đei trong kơnăl păng pơchoh trong hơdăh hloh dơ̆ng hăm Tơdrong tơchơ̆t 57 păng Khôi luơ̆t Khoa hŏk, Kmăi kmŏk păng Tơplih ‘nao tơchăr. ‘Măng pơlong lăng truh pơm hơtŏk jơhngơ̆m đon tơchăr, tơdrong vă jang tơklep hăm tơdrong pơjing hơnih mơdro sa kĕ pơjing đei tơmam drăm păng tơgop ăn tơpôl. Hơnih bơ̆ jang Khoa hŏk păng Kmăi kmŏk dêh char gô hơdrin tơgoăt hăm hơnih mơdro sa, bơngai tơmơ̆t jên jang, bơbgai tơgŭm djru vă vang yak hơdoi hăm rim tơdrong vă jang iŏk đei tơmam hơpăh, tơgŭm djru atŏk tơ iung hơnih mơdro sa păng lang sa dôm hơnih jang iŏk đei jơnei kơjăp.