Tơ̆ hop akŏm, Hơnih jang Tĭnh uy hlôi pơjao 11 tơchơ̆t gah asong jang, pơtruh jang păng pôk kang ƀô̆ kơpal. Hơdah noh, ƀok Trần Xuân Túc iŏk jang Phŏ Kơdră Hơnih jang Dăr hơlen kơ Tĭnh uy; ƀok Trần Văn Tân iŏk jang Ƀĭ thư Đảng uy phương Phú Yên; ƀok Ya Toan Ênuôl iŏk jang Phŏ Kơdră Hơnih jang Tuyên giáo păng Pơrô̆ pơrôp Tĭnh uy. Atŭm hăm noh, Jơnŭm vei lăng kon pơlei pôk ƀok Hoàng Trọng Hùng păng ƀok Lê Phúc Long iŏk jang Phŏ Kơdră Hơnih jang Khŭl Tang măt Kuô̆k hô̆i păng Jơnŭm vei lăng kon pơlei dêh char.

Ƀơ̆t 'măng ou, Kơdră Hơnih jang vei lăng kon pơlei dêh char adoi pơjao tơchơ̆t pơtruh jang, pôk jang hăm 5 kang ƀô̆ kơpal tơ̆ rim hơnih jang tơ̆ tơring păng hơnih jang mŭk drăm, lơ̆m noh ƀok Y Hương Niê jang kơchư̆k Phŏ Kơdră Hơnih jang Khua hŏk păng Kŏng ngê̆, ƀok Nguyễn Hoàng Phúc iŏk jang Phŏ Kơdră Jơnŭm Vei lăng Hơnih jang mŭk drăm Phú Yên.