Pơgê năr 21/7, tơ̆ Hà Nội, Hơnih jang Măt trâ̆n Tôh kuô̆k Việt Nam pơlei tơm Hà Nội pơgơ̆r tơƀơ̆p, pôk bơnê kơ đe linh so, linh jĭ rơka hơrih pơm jang hơgei păng đe linh đei tơdrong hơrih tơnap ƀơ̆t tơbăt 79 sơnăm Năr Linh jĭ rơka – Linh lôch tang ăn teh đak (27/7). Năm akŏm lêh đei Phŏ Ƀĭ thư Thanh uy Hà Nội Nguyễn Văn Phong atŭm hăm đe  Mĕ Việt Nam Nuih mơng păng 130 'nu linh so, linh jĭ rơka hơrih pơm jang hơgei.

Jĭ tơring đei lơ unh hnam mă teh đak tơchơ̆t tơgŭm lơ hloh kơ jơ̆p teh đak hăm hloh 800.000 'nu, Hà Nội hơnơ̆ng lăng tơdrong jang “Ƀlŏk bơnê” jĭ sơnong jang tơm chĭnh trĭ păng jing sơnong jang grasia hloh.  Sơnăm 2025, pơlei tơm hlôi hơvơn Mong jên “Ƀlŏk tơbăt” đei hloh 26 tih hlj, asong ăn kơ hrĕng tơpu tơmam, hơmet ming lơ tơdrong kăl yua păng tơgŭm hơmet ming hnam oei ăn dôm bơngai mă teh đak tơchơ̆t tơgŭm. Ƀơ̆t tơbăt sơnăm ou, đe kơdră pơlei tơm pơtoi năm hơpong ngôi, pơma dơnuh, asong hloh 114.500 tơpu tơmam hăm kơsô̆ jên hloh 273 tih hlj, tơƀôh tơdrong ƀlŏk bơnê kăp gĭt hăm dôm bơngai tơgŭm jơhngơ̆m ăn kăch mạng.