Vă hơlen lăng tơpă iŏk yua tơlĕch jang păng pơm hơdăh ‘lơ̆ng dôm trong jang tơgŭm tih đơ̆ng Trung ương lơ̆m tơdrong hơrih sa pơlei pơla, âu ki, Anih vei lăng hơdrĕch kon kông kơ Jơnŭm pơgơ̆r kon pơlei dêh char Đắk Lắk hlôi pơgơ̆r ‘măng hơlen lăng yan âu tơ̆ dôm tơdrong jang chă tơmang lăng lơ̆m tơpôl lơ̆m tơring. Khŭl dăr hơlen hlôi kơtă bơ̆jang tơ̆ plei Kli A (phường Buôn Hồ), plei Tuôr (xăh Hòa Phú), plei Tơng Jú (xăh Ea Kao) păng plei Akŏ Dhông (phường Buôn Ma Thuột). Kiơ̆ đơ̆ng dăr hơlen lăng ăn ƀôh, tơdrong jang tơgŭm đơ̆ng dêh char hlôi pơm hơtŏk gĭt kăl tơgŭm kon pơlei kơchăng đei kon jên jang, pơih să tơmơ̆t jên jang păng pơjing lơ tơmam lăng vă kơbăt tơklep hăm joh ayŏ joăt joe, tơdrong jang pơm hăm ti, pơm tơdrong jang sa kơjăp ăn kon pơlei. ‘Nâu jĭ tơƀôh hơdăh ăn tơdrong tơplih tơmam joh ayŏ jing jên jang hơtŏk tơiung kiơ̆ ƀlep trong vă jang tơm đơ̆ng tơdrong tơchơ̆t 80.

Mă lei, vă hơnơ̆ng jang kiơ̆ ‘lơ̆ng đei yua dôm tơdrong athei đơ̆ng Anih tơm Chĭnh trĭ găh chĕp vei joh ayŏ lơ̆m jăl jang ‘nao, rim tơring apĭnh dêh char kăl kơ hơnơ̆ng hơtŏk ‘lơ̆ng tơdrong jang tơgŭm. Tơm ‘noh jĭ tơgŭm chĕp vei tơdrong joh ayŏ kơdŏ soang, pơtho tơdrong gơh jang păng tŭn pran jang hơdai tơring. Ƀok Y Kle Knul, Phŏ Kơdră Anih jang joh ayŏ kơdŏ soang xăh Hòa Phú tơroi nơ̆r tơgop:

“Kăl kơ hơnơ̆ng bơngơ̆t truh tơgŭm kon jên vei lăng hnam kơjung joăt joe, tơdrong jang tanh brai via khăn, tơdrong tôn chĭng chêng, dôm tơdrong et soi joăt joe pămg pơjing tơmam chĕp lăng ‘lơ̆ng hơiă kơ tơring. Hơtŏk loi dơ̆ng tơdrong jang pơtrŭt, roi tơƀôh, pơjing tour jang hơdai Plei Tuôr hăm dôm hơnih chă tơmang lăng lơ̆m dêh char vă pơih să tơmoi chă tơmang lăng păng hơtŏk ‘lơ̆ng đei yua dôm tơmam chă tơmang lăng lơ̆m tơpôl”.

Kiơ̆ Hơnih jang gah Kon kông kơ Jơnŭm pơgơ̆r kon pơlei dêh char Đăk Lăk, tơdrong jang kiơ̆ Tơchơ̆t 80 'noh iŏk kon pơlei pơm tơm vang jang păng sa yua đơ̆ng tơdrong joh ayŏ kơdŏ soang kơdih po. Dôm tơdrong đei lơ̆m tơdrong hơrih jing trong jang kăp gĭt vă keh đang tơdrong jang kiơ̆ tơchơ̆t tơgŭm hơtŏk tơ-iung. Ră hơdah gah tơdrong vă 'nhăk Tơchơ̆t đơ̆ng Đảng lơ̆m tơdrong hơrih, yă Đỗ Thị Như Tình, Kơdră Hơnih jang gah Kon kông kơ Jơnŭm pơgơ̆r kon pơlei dêh char Đăk Lăk ăn tơbăt:

“Khul jang hơlen băt hơdah dôm tơdrong đei lơ̆m pơtơm jang kiơ̆ tơchơ̆t păng rim tơchơ̆t tơlĕch jang lơ̆m tơring. Kiơ̆ đơ̆ng 'noh, gô hơlen chih akŏm păng tơlĕch minh ƀar tơchơ̆t 'nao gah hơtŏk tơmang pơhiơ̆ pơlei pơla tơgoăt hăm vei răk tơƀăk mong tơdrong joh ayŏ lơ̆m jăl jang 'nao, 'noh mă gơh jang đei jơnei hloh”.

Tơdrong tĕnh kuăng chă hơlen, chih akŏm Tơchơ̆t 'nao kơ Jơnŭm pơgơ̆r kon pơlei dêh char trŏ hăm tơdrong hơrih jĭ trong tơlĕch jang hơdah, khŏm mă hơnhăk Tơchơ̆t 80 đơ̆ng Anih tơm Chĭnh trĭ đei pơm jang 'lơ̆ng; pơjing mŭk drăm joh ayŏ Tây Nguyên jing jơhngơ̆m pran vă hơtŏk mŭk drăm – tơpôl kơtang hloh ăn Đăk Lăk lơ̆m khei năr truh.