Sơnăm 2026, Đắk Lắk đei 5 tơdrong vă jang ODA tŏk bŏk tơlĕch jang, hăm akŏp kon jên tơmơ̆t jang hloh 2.836 ti hlak jên. Trong pơprŏ ăn kon jên teh đak đe đei pơjao lơ̆m sơnăm vă jê̆ 704 ti hlak jên, hlôi klăh asong 100% ăn rim tơdrong vă jang. Mă lei, truh năr 30/9, kon jên tơlĕch ăn jang ‘nao lăp jơnei vă jê̆ 174 ti hlak jên, hơtŏ hăm vă jê̆ 25% trong tơlĕch ăn. Jăl jang 2026-2030, Đắk Lắk pơchoh trong tơlĕch jang kơtang hơvơn kon jên jang ODA păng kon jên tŏk iŏk đơ̆ng teh đak đe ăn pơm trong nơnăm lơ̆m tơring, pơnơ̆t đak, cham char, tơjră tang găn tơpih tŏ ‘mi kial păng atŏk tơ iung tơring kơdrơ̆m. Vă iŏk đei jơnei lang să kon jên jang ODA, Kơ iĕng Kơdră chĕp pơgơ̆r Hơnih vei lăng kon pơlei dêh char Đắk Lắk Nguyễn Thiên Văn  athei tơdrong chă hơvơn kon jên jang kăl jang ‘lơ̆ng, trŏ lăp hăm tơdrong ‘meh vă atŏk tơ iung kơ dêh char păng hơlen dôm bơngai tơgŭm djru.