Năr sơng iŏk Huy hiệu 55 sơnăm jang Đảng, ƀok Nguyễn Hữu Quyền, oei lơ̆m Koeng kơphô̆ 5 Tân Thành, phương Buôn Ma Thuột, ôn kơ hlơp jơhngơ̆m đon mưh ƀlŏk hơdơ̆r dơ̆ng găh dôm sơnăm tơblăh vang hrang tơƀet sơ̆. Sơnăm 1970, ƀok pơm ƀô̆ đô̆i păng đei pôk tơmơ̆t lơ̆m khul Đảng tŏk bŏk lơ̆m bri prit tơ̆ groi teh Campuchia. Lăp pơđăm năr đơ̆ng rŏng, bơngai lơ̆m khul chro ƀok mơ̆t Đảng hlôi lôch hơchăng. Nơ̆r pơkăp kơ bơngai đang viên lơ̆m mă noh sơ̆ tơklep hăm kơdrăn tơblăh, hăm bôl boăl păng hăm tơdrong jang iung tơblăh.

Đơ̆ng rŏng teh đak rơngei, ƀok Quyền hơnơ̆ng bơ̆ jang dơ̆ng vă jê̆ 40 sơnăm. Pơdơ̆h bơ̆ jang sơnăm 2008, ƀok oei hơnơ̆ng vang iung jang tơdrong bơ̆ jang lơ̆m tơring, đei 4 jăl sơnăm pơm Kơ iĕng Ƀĭ thư chi bô̆ păng lơ sơnăm pơm Kơdră chĕp pơgơ̆r Khul bơngai Kră. Hăm sơnăm hloh 80 sơnăm, ƀok Quyền akhan, pơdơ̆h bơ̆ jang ưh khan pơdơ̆h hloi hơnăp nang; bơngai đang viên, oei pran jăng păng rơvơn, oei hơnơ̆ng jang ‘lơ̆ng hơnăp jang, sơnong jang hăm khul păng kon pơlei pơla.“Kiơ̆ Đảng, pơm rơngei hơdrĕch hơdrung păng hlôi đei tơdrong hơrih sa rơngei hiôk hian. ‘Nou jĭ jơhngơ̆m đon hưch hanh hơmanh bơnê tih tên hloh. Hăm tơdrong chĕp pơgơ̆r đơ̆ng Đảng, chăl hrei ou hơnơ̆ng kiơ̆ yok rok jơ̆ng mĕ ƀă yă ƀok vă pơm lơ liơ atŏk ‘lơ̆ng tơdrong joăt joe kơ Đảng vă tơ iung pơjing teh đak bơ̆n kiơ̆ Tơdrong tơchơ̆t Hop akŏm tih mă 14 kơ Đảng tơlĕch ăn ‘noh truh sơnăm 2045 teh đak bơ̆n gô jing mĭnh teh đak atŏk tơ iung”.

Tơdăh nơ̆r pơkăp kơ ƀok Nguyễn Hữu Quyền đei tơƀôh hơdăh lơ̆m chăl tơblăh vang hrang tơƀet, ‘noh jơhngơ̆m đon lui yom kơ đảng viên Y Hạ Niê Kdăm, oei lơ̆m koeng kơphô̆ 2 Tân Tiến, phương Buôn Ma Thuột, đei atŏk tơ iung đơ̆ng dôm sơnăm năm oei tơ̆ tơring găh Tu lơ̆m mă ‘nao lăp 8 sơnăm.

Đơ̆ng sơnăm 1955, ƀok Y Hạ Niê Kđăm đei hŏk pơhrăm tơ̆ Hnam trương Dân tộc Trung ương păng hlôi đei 3 ‘măng tơƀơ̆p Ƀok Hô. Đơ̆ng rŏng ou, ƀok bơ̆ jang tơdrong joăt jang tơ̆ Campuchia, mưh brŏk tơklep kơjăp lơ sơnăm hăm tơdrong jang pơtho pơhrăm păng bơ̆ jang chă tơchĕng hơlen pơtho hŏk pơhrăm hŏk tro kon kông tơ̆ Đắk Lắk. Hăm dôm kơchư̆k phara dih băl, ƀok Y Hạ Niê Kdăm ling lang tơblŏk ăn kơdih vei kơjăp jơhngơ̆m đon ‘lơ̆ng kơ bơngai đang viên păng pơtho tơbăt ăn jơhngơ̆m đon lui yom ‘noh ăn jơhnơr đơ̆ng rŏng.“Lơ̆m chăl hle, hăm bơngai đang viên kăl kơrŭn đĭ ai ăn trong bơ̆ jang trŏ lăp kơ Đảng. Hơdrin vei kơjăp jơhngơ̆m đon kơ bơngai cộng sản, bơngai đảng viên kơ Đảng”.

Dôm tơdrong tơroi găh ƀok Nguyễn Hữu Quyền, Y Hạ Niê Kdăm tơƀôh hơdăh, hăm lơ bơngai đang viên sơnăm ‘lŏ kră, sơnăm ‘lŏ kră kĕ pơmăn tơplih hơnih jang, tơdrong jang, mă lei ưh kơ lai yơ pơm tơhiong hơnăp jang hăm hơnih jang păng kon pơlei pơla.

Tơdrong tơchơ̆t 21 kơ Hơnih chĕp pơgơ̆r Trung ương Đảng jăl XIII năr 16/6/2022 xơkơ̆t hơdăh khul đang viên ‘noh ji khul gĭt kăl hloh sơkơ̆t hơdăh tơdrong kĕ chĕp pơgơ̆r, jơhngơ̆m pran iung tơjră kơ hơnih Đảng; athei rim đang viên hơdrin pơhrăm, pơm jŭk yŭk trong hơlou, vei kơjăp jơhngơ̆m đon ‘lơ̆ng păng jang kiơ̆ kơjăp nơ̆r pơkăp mưh mơ̆t lơ̆m Đảng.

Hăm đảng viên pơdơ̆h bơ̆jang, mưh oei pran jăng grăng akou, tơdrong hlôh vao păng tơnăp, tơdrong atŏk kơtang hơnăp jang rŏ năng đei đơ̆ng dôm tơdrong yan ou: vang hop akŏm chi ƀô̆, tơgop nơ̆r dôm tơdrong jang lơ̆m koeng kơphô̆ pơlei pơla, pơrô̆ pơrôp kon pơlei jang kiơ̆ ‘lơ̆ng trong bơ̆ jang đơ̆ng đang teh đak, dăh mă pơtho tơbăt dôm tơdrong hlôh vao kơdih ăn jơhnơr mơlôh.

Dôm tơdrong tơgop ‘noh ưh kơ rơ ông rơ ang mă lei jing trong bơngai đang viên hơnơ̆ng vei kơjăp nơ̆r pơkăp hăm Đảng lơ̆m tơdrong hơrih kơ ‘năr. Yă Tào Thị Nga, kang ƀô̆ so Viện Kiểm sát Nhân dân dêh char Đắk Lắk, akhan, tơdrong pơm jŭk yŭk trong hơlou mă blung kăl đơ̆ng tơdrong vei kơjăp ƀlep nơ̆r pơkăp hăm Đảng păng kon pơlei.“Ba ưh kơ lai yơ hiơt mưh dơ̆ng tơ̆ hơla hla kơ Đảng ĭnh pơma pơkăp prăt jơhnơr hơrih hơdrin iung jang ăn kơ Teh đak, ăn kơ kon pơlei, ăn kơ Đảng. 45 sơnăm ou ki, kơdih kou ba ling lang tơchĕng bơngai đang viên nhen nhôn kăl hơdrin hŏk pơhrăm păng pơm jŭk yŭk trong hơlou vă jơhnơr đơ̆ng rŏng hơdrin tơgoăt iŏk, hơdrin hloh dơ̆ng druh tom chăl hle, tơgăl vă teh đak atŏk tơ iung lơ̆m chăl hle”.

Lơ̆m chăl sơnăm tơblăh vang hrang tơƀet, hơnăp jang kơ bơngai đang viên đei long lơ̆m kơdrăn tơblăh. Lơ̆m chăl rơngei hiôk hian, tơdrong pơm jŭk yŭk trong hơlou đei tơƀôh hơdăh đơ̆ng dôm tơdrong yan ou: Nơ̆r pơma tơ-‘ngla iung jang hloi, tơjê̆ hăm kon pơlei păng hơnăp jang kơtang hăm kon pơlei pơla.

Tơdrong tơchơ̆t 21 kơ Hơnih chĕp pơgơ̆r Trung ương Đảng jăl XIII tơlĕch ăn pơm hơtŏk ‘lơ̆ng khul đang viên tơ klep hăm pơhrăm, pơm jŭk yŭk trong hơlou păng vei kơjăp tơgoăt kơjăp hăm kon pơlei. Nơ̆r pơma pơtôch 58 năr 26/6/2026 kơ Hơnih tơm Chinh trĭ jăl XIV hơnơ̆ng jang kiơ̆ Tơdrong tơchơ̆t 21, pơma hơdăh tơ iung pơjing khul đang viên tơgăl hăm tơdrong pơkoel lơ̆m chăl hle.

Hăm dôm bơngai đang viên sơnăm ‘lŏ kră tơ̆ Đắk Lắk, nơ̆r pơkăp hăm Đảng đei trơ trơp kơjung dơ̆ng hăm dôm tơdrong jang hơdăh, đơ̆ng hop akŏm chi ƀô̆, tơgop nơ̆r lơ̆m tơdrong atŭm truh pơtho pơhrăm dôm tơdrong hlôh vao ăn jơhnơr mơlôh.