Hơnih bơ̆ jang pơm hla bơar phương Tân Lập dêh char Dak Lăk hlôi proh hơmet lơ kmăi kmŏk chăl hle,  păng mă kăl ‘noh ƀar kmăi tĭnh đei kai tơmơ̆t ư̆ng yŭng gơh hơgei (AI), tơgŭm ăn kon pơlei chă plôih lăng, ba hô sơ păng lăng hơlen tơdrong pơm hla bơar kiơ̆ trư̆k tuyên. Ƀok Lê Văn Toàn năm pơm hla bơar rơneh ăn kon hơ ‘lơ̆p tơbăt, ‘nhŏng đei dôm bơngai jang tơ̆ ou pơtho tơbăt iŏk yoa ưng yŭng kmăi kmŏk hơgei AI tôch ‘lơ̆ng hơ iă. “Rim boăl đoàn viên hơdruh tơdăm pơtho tơbăt ăn ba chă chih tôm tơdrong, đơ̆ng rŏng ‘noh kmăi in ăn hloi kơphĭu. Tơdrong pơm hla bơar rơneh dang ei đei kloh klech ăn hơnih chih răk hơnih tơring oei păng ƀao hiêm, jĭ tôch kơ rơvơn. Atŭm hăm iŏk yoa AI lơ̆m bơ̆ jang pơm hla bơar pơm ăn tơdrong pơm hla bơar keh đang tĕnh koăng, pơm ƀônh hloh.”

Tơ̆ Hơnih bơ̆ jang Pơm hla bơar phương Tân Lập, đei 9 ‘nu bơngai joăt jang păng 1 ‘nu kang ƀô̆ ƀưu điên iŏk jang sơng iŏk păng pơtruh ăn hô sơ ‘moi kiơ̆ bơ̆ jang ƀưu chinh, atŭm hăm 4 ‘nu đoàn viên hơdruh tơdăm teh kmăi tơgum ăn kon pơlei pơm hla bơar. Mŏ Lê Thị Nguyên Hạnh, kang ƀô̆ ƀô̆ ƀưu điê̆n, tơroi tơbăt mĭnh năr mŏ tơgŭm djru đơ̆ng 30-40 ‘nu kon pơlei iŏk yua kmăi kmŏk AI lơ̆m pơm hla bơar:“Ba plôih mơ̆t lơ̆m phân mêm AI, đơ̆ng rŏng ‘noh kon pơlei ‘meh vă pơm hla bơar yă kiơ ‘noh đe sư kơtĭt lơ̆m pơm hla bơar mă ‘noh lơ̆m kmăi tĭnh đơ̆ng noh tơdrong vă pơm hla bơar ‘noh ƀôh hloi. Pơtih gia, mŏ ou ‘meh vă pơm hla bơar apĭnh tơplih mĭnh ƀar tơdrong mơdro sa ‘noh phân mêm kơ AI tơƀôh ăn trong pơm hla bơar ‘noh, đơ̆ng rŏng ‘noh ba gô pơtho ăn kon pơlei hơmet ăn tôm dôm hla bơar kăl, đơ̆ng rŏng ‘noh ba gô pơtho ăn kon pơlei scan hô sơ đơ̆ng noh pơtruh ăn kiơ̆ trư̆k tuyên pơm dă ƀiơ̆ bơ̆ jang lơ tơdrong pơm hla bơar ăn kang ƀô̆ hơlen kĭ tơchơ̆t ăn tơ̆ lăm.”

Tơlĕch jang kiơ̆ AI lơ̆m bơ̆ jang pơm hla bơar, phương Tân Lập iŏk yoa ƀar ưng yŏng kơ Viettel hăm VNPT. Mă mĭnh ‘noh ưng yŭng tơgŭm ăn kang ƀô̆ bơ̆ jang chă lăng dôm tơdrong kơtơ̆ng ang pơm hla bơar tĕnh koăng; mă mĭnh ư̆ng yŭng ‘noh tơgŭm ăn kon pơlei plôih lăng pơm hla bơar lơ̆m kmăi kmŏk bơ̆ jang trư̆k tuyên. Jô̆ đơ̆ng năr 1/7 truh dang ei, hloh 900 hô sơ hlôi đei sơng iŏk, lơ̆m ou đei hloh 400 hô sơ hlôi pơm keh đang kơtă hloi, mĭnh ƀar hô sơ ‘noh ‘moi kiơ̆ bơ̆ jang lơ̆m kmăi kmŏk păng kiơ̆ ƀưu chinh ba ăn. Ƀok Nguyễn Mạnh Hà, Kơ iĕng Kơdră chĕp pơgơ̆r Hơnih bơ̆ jang vei lăng kon pơlei phương, Kơdră chĕp pơgơ̆r Hơnih bơ̆ jang pơm hla bơar phương Tân Lập sơkơ̆t hơdăh, tơdrong iŏk yoa AI lơ̆m sơng iŏk păng pơm hla bơar hô sơ ưh khan lăp tơgŭm ăn kang ƀô̆ bơ̆ jang ƀônh mă oei pơm hơtŏk bơ̆ jang ‘lơ̆ng chă pơvih pơvăn ăn kon pơlei:“Nhôn hlôi pơrô̆ pơrôp, tơroi tơbăt jơ̆p jang ăn kon pơlei băt. Kon pơlei năm truh tơ̆ Hơnih bơ̆ jang, nhôn ăn rim bơngai jang chă pơtho ăn kon pơlei pơm hla bơar tĕnh koăng hloh. Hrei ou, tŏk bŏk pơm hla bơar chih hăm ti, đơ̆ng rŏng ou kơnh gô lăng truh iŏk yoa kmăi kmŏk ngăl, bơ̆n pơm hla bơar hăm lăp pơma tơbăt đĕch đơ̆ng noh kmăi kmŏk gô pơm keh đang hloi.”

Tơdrong iŏk yoa ưng yŭng AI tơ̆ phương Tân Lập jĭ mĭnh lơ̆m trong jang kiơ̆ tơplih kơsô̆ lơ̆m dêh char. Năr 10/7 ou ki, Dak Lăk hlôi iung jang kiơ̆ 4 trong jang kmăi kmŏk kăl tơgŭm ăn trong bơ̆ jang khul kơdră chĕp pơgơ̆r ƀar kâp: jang kmăi kmŏk hơgei tơgŭm ăn kon pơlei chă hơlen lăng, ba ăn hô sơ; kmăi kmŏk bơ̆ jang pơm hla bơar trư̆k tuyên; dashboard (bảng điều khiển) kmăi kmŏk tơgŭm ăn kơdră chĕp pơgơ̆r rim hơnih jang; păng kmăi kmŏk hơlen hơdăh nơ̆r tơbăt đơ̆ng kon pơlei pơla.

Đơ̆ng rŏng lăng hơlen yan ou tơdrong jang kiơ̆ kmăi kmŏk gơ̆h hơgei lơ̆m pơm hla bơar tơ̆ rim tơring, phương, ƀok Đỗ Hữu Huy, Kơ iĕng Kơdră chĕp pơgơ̆r Đảng dêh char, Kơ iĕng Kơdră Hơnih bơ̆ jang Chĕp pơgơ̆r găh atŏk tơ iung khoa hŏk, kmăi kmŏk, tơplih ‘nao tơchăr păng tơplih kơsô̆ dêh char Dak Lăk sơkơ̆t hơdăh, ‘nou jĭ hơyak gĭt kăl hloh vă pơm hơtŏk bơ̆ jang ‘lơ̆ng-jơnei kơ bơ̆ jang teh đak lơ̆m chăl hle:“Mưh hơgrop phương, tơring ‘noh hơnih tih să hloh, măt bơngai jang ƀô̆ lơ hloh mălei hăm tơdrong bơ̆ jang đei pơjao ăn tơring, phương jei tôch kơ lơ ‘noh tơdrong iŏk yoa AI jĭ tôch gĭt kăl. Tơdrong tơlĕch jang ‘noh phương jĭ hơnih pơtho ăn kơtă hloi, jĭ bơngai bơ̆ jang pơm rim hla bơar kơna kăl băt hơdăh păng pơtho ăn kon pơlei tơchă ƀlep hăm dôm tơdrong mă kon pơlei ‘meh vă păng bơ̆n bơ̆ jang keh đang tĕnh hloh.”

Tơdrong Dak Lăk iung jang tơlĕch jang kiơ̆ AI lơ̆m bơ̆ jang pơm hla bơar, iŏk đơ̆ng tơring, ƀôh hơdăh tơdrong hơdrin đĭ ai jang kiơ̆ khul kơdră bơ̆ jang hăm kmăi kmŏk kơsô̆, tơplih kơsô̆ atŭm hăm bơ̆jang pơvih pơvăn ăn kon pơlei. ‘Nou jĭ hơyak gĭt kăl hlŏh lơ̆m tơ iung pơjing khul bơ̆ jang gơ̆h hơgei, tơpăt ‘lơ̆ng, iŏk đei jơnei kơtang.