Roi tơbăt Việt Nam tơlĕch tơdrong hơgăt jang tŏk 8,3- 8,5% lơ̆m sơnăm ‘nâu păng 2 kơsô̆ lơ̆m jăl jang truh, Thủ tướng Phạm Minh Chính athei dôm anih mơdro sa iŏk jang dôm teh rơkăh oei tôch kơ să đơ̆ng pơvei mŭk drăm, tĕch mơdro, tơmơ̆t jên jang 2 teh đak; tơgŭm Việt Nam gơh iŏk yua dôm jên tơmơ̆t jang rĭ tơplih, jên rơgoh; pơtrŭt tơdrong jang pơm tơlĕch chíp bán dẫn, ŭnh hơyuh rơgoh, hydrogen, hơtŏk tơiung choh jang sa kơmăy kơmŏk ‘nao, kơmăy kơmŏk tơgŭm, anih jang ŭnh hơyuh.

Thủ tướng Phạm Minh Chính athei dôm anih mơdro sa Nhật Bản tơgŭm Anih mơdro sa Việt Nam vang jang jrŭ lơ̆m trong jang pơtruh, trong jang pơm tơlĕch jơ̆p plei teh đơ̆ng dôm anih mơdro sa Nhật Bản, hơdai hăm tơgŭm pơjao kơmăy kơmŏk, hơtŏk tơiung bơngai jang ‘lơ̆ng, vei lăng hơgei.