Iŏk đơ̆ng đei pơjing truh dang ei, yak hlŏh 14 ‘măng hop akŏm, Đảng ling lang ‘moi kiơ̆ tơdrong ‘mĕh vă đơ̆ng kăch mang vă tơlĕch lơ trong jang, tơdrong tơchơ̆t tih ưh đei yoa tơdrong kiơ ‘ngoăih kơ yoa teh đak, yoa kon pơlei. Phó giáo sư – Tiến sĩ Nguyễn Viết Thông, sơ̆ pơm Tổng Thư ký Khul chih tơblang Trung ương akhan, kơtă lơ̆m Nơ̆r chih tơbăt mă blŭng đơ̆ng Đảng sơnăm 1930, Nguyễn Ái Quốc hlôi krao hơvơn chih pơjing nơ̆r tơblang đơ̆ng Chủ nghĩa Mác Lênin lơ̆m rim tơdrong đei tơ̆ yăn âu tơ̆ Việt Nam mưh chih hơdăh thoi âu:

“Tơ̆ Hop akŏm pơjing Đảng hlôi drơ̆ng nơ̆r ăn dôm hla ar kăl đei chih tơbăt; Hla ar chih kơđeh; Tơdrong hơgăt; Tơdrong vă jang đơ̆ng Đảng, dôm hla ar chih kăl mă blŭng tơmât jing tơdrong tơchơ̆t tơm a, tơƀôh hơdăh, đon pơhnŏng đơ̆ng Đảng ‘noh jĭ yoa tơdrong đei yoa ăn kon pơlei, păng đơ̆ng noh truh dang ei bơ̆n hơnơ̆ng adrin jang ăn đon pơhnŏng tih tên ‘nŏh”.

40 sơnăm hlŏh bơih păng lơ bơngai oei vei kơjăp lơ̆m jơhngâm khei ‘năr mă lơ bơngai juăt krao ‘nŏh chăl “ƀao kơ̆p” sơ̆... ‘Nŏh jĭ 1 chăl gĭt kăl lơ̆m jơhnơr arih kơ teh đak hăm lơ tơdrong ưh kơ lai yơ kĕ hiơt. Păng đơ̆ng âu, tơdrong jang tơplih ‘nao hlôi yak hlŏh lơ tơdrong pran ‘lơ̆ng. Lơ̆m noh, hơmet đei trong jang mŭk drăm ‘nao, tơplih ‘nao muk drăm kiơ̆ trong tĕch mơdro xa yoa teh đak pơgơ̆r vei lăng. 

Giáo sư - Tiến sĩ Tạ Ngọc Tấn, Phŏ Kơdră chĕp kơ̆l Khul chih tơblang kơ Trung ương akhan: “’Nŏh jĭ 1 hơyak gĭt kăl vă năm truh lơ tơdrong tih đei tơlĕch nhen: Chih hơdăh Teh đak chĕp kơ̆l pơgơ̆r kiơ̆ khôi luơ̆t, tơƀôh hơdăh hơnăp jang gĭt kăl đơ̆ng tơdrong hơmet ming Đảng, tơƀôh hơdăh tơdrong jŏh ayŏ kơ dŏ xoang, jang tŏk muk drăm tơklep hăm pơjing, tưk tơiung joh ayŏ kơ dŏ xoang, bơ̆ jang gơ̆h hơgei, hơtŏ băl… Dôm nơ̆r chih tơblang tôch gĭt kăl thoi noh đei akŏm, hơlen năng đơ̆ng rŏng 20 sơnăm tơplih ‘nao đơ̆ng Đảng”.

Hla ar chih kăl vă pơjing teh đak lơ̆m chăl jang tŏk chủ nghĩa xã hội (đei hơmet ming, tưk tơiung sơnăm 2011) đei drơ̆ng kiơ̆ tơ̆ Hop akŏm XI kơ Đảng chih hơdăh đon pơhnŏng truh tŏk bŏk chăl ‘nglŏ 21: “đĭ đăng Đảng, đĭ đăng kon pơlei bơ̆n athei adrin pơjing teh đak bơ̆n jing 1 teh đak jang kơmăy kơmŏk ‘nao, kiơ̆ trong xã hội chủ nghĩa”. 8 tơdrong tih đei chih lơ̆m Hla ar kăl 2011 đơ̆ng Đảng tơƀôh hơdăh đon hlôh vao găh “tơpôl, xã hội chủ nghĩa mă kon pơlei bơ̆n oei pơjing” đei vei kơjăp truh dang ei.

Phó giáo sư Tiến sĩ Nguyễn Trọng Phúc, tơ̆ Hnam hŏk Chính trị Quốc gia Hồ Chí Minh pơma hơdăh: “Kiơ̆ tơdrong tơchĕng hơlen, chih akŏm đơ̆ng yăn âu păng chih tơblang hơdăh, mă loi ‘nŏh găh chủ nghĩa xã hội păng trong yak tŏk chủ nghĩa xã hội Việt Nam lơ̆m khei ‘năr tơplih ‘nao, atŭm hăm ‘nŏh athei jang đei dôm đon tơchĕng, nơ̆r tơblang, mă loi ‘nŏh 10 tơdrong pơvei tih mă Hop akŏm 13 hlôi chih akom, ‘nŏh jĭ  tơdrong jơnei găh pơjing, hơmet ming Đảng lơ̆m nơ̆r chih tơblang păng đon tơchĕng”.

Ƀât mă apŭng plenh teh oei bơ̆ jang Tơdrong jang kăch mang ‘măng mă 4 tôch tih, bơ̆ jang hrĕnh păng đơ̆ng sơ̆ tam mă biơh đei, hăm dôm tơdrong tŏk pran găh kơmăy kơmŏk ‘nao, ƀơm truh tơ̆ rim teh đak ‘nŏh tơplih ‘nao rơgei ‘nŏh jĭ đon tơchĕng ‘nao lơ̆m tơdrong jang tŏk đơ̆ng rim teh đak.

Tơdrong jơnei đơ̆ng Hop akŏm bơngai tang măt lơ̆m teh đak mă XIV, jĭ tơdrong gĭt kăl pơtoi dơ̆ng 40 sơnăm tơplih ‘nao, chih tơbăt chăl jang đơ̆ng rŏng dơ̆ng kơ tơdrong jang tơplih ‘nao, mât hơdai, jĭ hơyak gĭt kăl lơ̆m tơdrong jang tŏk muk drăm teh đak; lơ̆m noh, iŏk tơplih ‘nao rơgei pơm jơhngâm pran, iŏk kon bơngai păng joh ayŏ kơ dŏ xoang pơm tơm, iŏk tơdrong rơngei chĕp kơ̆l pơgơ̆r kơdih hơdai hăm tơdrong mât jang hơdoi kơjăp ‘lơ̆ng pơm trong vă bơ̆jang. ‘Nâu jĭ jơnăr Việt Nam tơƀôh hơdăh đon pơhnŏng jang tŏk, pơih đei đon hlôh vao, hơtŏk đon rơgei, kơsư̆k pơjei păng năm truh tơdrong jang tŏk hrĕnh, pran kơjăp.

Hop akŏm XIV ưh lăp tơdrong tơchơ̆t chinh trĭ đĕch mă oei jing jơhngâm đon chăl ‘nao, jơhngâm đon hơnhăk Việt Nam yak mât lơ̆m chăl ‘nao nhen nơ̆r pơma đơ̆ng TBT Tô Lâm: “Hop akŏm bơngai tang măt lơ̆m teh đak ‘măng mă XIV jĭ 1 tơdrong chinh trĭ gĭt kăl kơ Đảng păng hơdrĕch hơdrung bơ̆n, jĭ 1 khei ‘năr tôch gĭt kăl lơ̆m chăl arih kơ teh đak, chăl Hồ Chí Minh, akŏm đei rim tơdrong ‘lơ̆ng đơ̆ng rơbâu sơnăm kơ hơdrĕch hơdrung vă jang tŏk lơ̆m chăl ‘nao”.

Yak hlŏh 96 sơnăm pơjing păng jang tŏk, đơ̆ng Hla ar chih kăl blŭng a truh dôm tơdrong jơnei tih tên đơ̆ng 40 sơnăm Tơplih ‘nao păng tơdrong Hop akŏm mă XIV, Đảng bơ̆n ling lang chĕp vei, druh kiơ̆ đon pơhnŏng jang yoa Teh đak, yoa kon pơlei, hơnơ̆ng tơplih ‘nao, hơmet ming vă chĕp kơ̆l pơgơ̆r teh đak jang tŏk. Hăm đon hơpơi ‘mĕh jang tŏk lơ̆m chăl ‘nao, iŏk tơplih ‘nao pơm jơhngâm pran, iŏk kon bơngai păng tơdrong joh ayŏ kơ dŏ xoang pơm tơm, Việt Nam hơđơ̆ng jơhngâm yak mât lơ̆m chăl jang tŏk hrĕnh, pran kơjăp.