Đơ̆ng hlŏh 1 puăt khei ‘nâu, ƀok A Kiêu, plei Kon Long, xăh Đăk Tơ Lung, apŭng Kon Rẫy, dêh char Kon Tum tôch chơt hơiă. Dơ̆ng lơ̆m hnam oei man vă jê̆ đang bơih, ƀok tơroi, hnam đei 6 ‘nu bơngai, kră đei, ‘lơ̆p đei, hnam so găh noh đĭ hiăh hiok đĭ bơih kơna mưh ‘mi hnam hnăt, athei chơ chă anih hrĕng vă tơkơ̆l hơkâu tep. Đei Bí thư Chi ƀô̆ pơlei A Tẻ krao hơvơn, unh hnam ƀok A Kiêu hơđơ̆ng ƀiơ̆ jơhngâm mă đơ̆ng “kơdih kâu ưh đei kiơ” vă man hnam ‘nao: “Adrol ki unh hnam nhôn arih xa lơ̆m hnam hiăh hiok, ‘mi ‘nŏh hnăt hơ ‘yuih đĭ, ưh đei anih tep hloi. Dang ei hnam nhôn đei teh đak tơgŭm 60 triu vă man hnam. Đang kơ ‘nŏh mih ma duch nă vang tơgŭm hnam nhôn chơ chuĕn bơ̆n tơmo, chuơh vă pơm hnam. Đei hnam asong bơ̆n xi măng, vang năm man tơgŭm ưh đei iŏk jên. Hnam ‘nao vă đang bơih, pơyan ‘mi sơnăm ‘nâu hnam nhôn hơđơ̆ng jơhngâm pă đei pơngơ̆t kiơ bơih”.

Bơ̆ jang tơdrong pơjei băl vang sut pơđĭ hnam hiăh hiok, Chi ƀô̆ plei Kon Long chih hơdăh lơ̆m pơlei đei 2 unh hnam kăl đei tơgŭm man hnam ‘nao, đei unh hnam ƀok A Kiêu păng mŏ Y Seng. Hăm tơdrong pơih trong chong glung vang tơgŭm ăn 2 unh hnam pơm hnam đơ̆ng 9 ‘nu đảng viên lơ̆m chi ƀô̆, 96 unh hnam lơ̆m pơlei kum vang jang kiơ̆ ‘năi. Bí thư Chi ƀô̆ A Tẻ, tơroi, gơnơm iŏk đei tơdrong vang tơgŭm đơ̆ng kon pơlei kiơ̆ trong “hnam yơ đei kiơ tơgŭm ‘nei”, 1 pôm hnam đei teh đak tơgŭm 60 triu hlak jên mă lei mă tơpă kơjă hnam vă man đang tŏk vă truh kơhrĕng triu ‘mơ̆i. Hnam ‘nao kơ 2 unh hnam pơmat tat hlŏh lơ̆m pơlei yoa thoi noh kŭm kơjăp ‘lơ̆ng ƀiơ̆: “Mih ma duch nă vang tơgŭm tôch pơneh ăn dôm unh hnam tơnuh. Vang tơgŭm hơnơ̆ng, tơgŭm yuih hnam, sir kơmŏng. Dôm khul grŭp lơ̆m pơlei krao hơvơn mih ma duch nă vang tơgŭm bơ̆n jên, 1 unh hnam vang tơgop 5 rơbâu. Mih ma duch nă vang chơ bơ̆n tơmo, pơdŭ gŏch. Đe vang tơgŭm tôch pơnĕh”.

Dêh char Kon Tum đei 2.752 tŏ hnam hiăh hiok, lơ̆m noh kăl man ‘nao vă jê̆ 2.200 tŏ hnam păng pơm hơmet ming hlŏh 560 tŏ hnam. Tơ̆ hơnăp jên mong đơ̆ng dêh char ưh kơ măh, lơ unh hnam tơ̆ tơring hơtăih yăih pơmat tat mưh chă chơchuen tơmam, goch, chuơh vă man... Anih pơgơ̆r jang sut pơđĭ hnam hiăh hiok tơ̆ jơ̆p tơring lơ̆m dêh char Kon Tum hơtŏk đon jang tơnăp đơ̆ng đe đảng viên păng Khul chĕp kơ̆l đảng lơ̆m rim anih jang đảng tơ̆ tơring vă tơgŭm ăn kon pơlei man, pơm hơmet ming hnam.

Ƀok Nguyễn Văn Thuỷ, Phŏ Kơdră vei lăng kon pơlei apŭng Kon Rẫy, tơroi, ưh lăp tơgŭm kon pơlei đơ̆ng nơ̆r pơlung, roi tơƀôh ki thuơ̆t man đĕch, mă đe Bí thư Chi ƀô̆ păng đảng viên lơ̆m apŭng oei krao hơvơn vang tơra  tơgop, mong akŏm jên, tơmam vă dôm tŏ hnam đei man, pơm hơmet ming kơjăp 'lơ̆ng păng đei kơjă lơ ƀiơ̆ kơsô̆ jên teh đak tơgŭm: “Hăm tơdrong pơgơ̆r đơ̆ng Anih chĕp kơ̆l Đảng apŭng, Khul kơdră chĕp kơ̆l Đảng apŭng găh sut pơđĭ hnam hiăh hiok, đei tơdrong vang tơgŭm đơ̆ng đe kăn ƀô̆, đảng viên đang kơ ‘nŏh jĭ kon pơlei păng tơpôl tơ̆ pơlei pơla. Kăn ƀô̆, đảng viên năm truh rim hnam vang chă tơgŭm ăn”.

Mă tơpă ăn ƀôh hlŏh 440 ‘nu Bí thư Chi ƀô̆ pơm hloi ƀok Pơgơ̆r pơlei, vei lăng Kueng kơphô̆ kŭm hăm rơbâu ‘nu đảng viên tơ̆ dêh char Kon Tum vang tơgop tôch pơnĕh lơ̆m tơdrong adrin sut pơđĭ hnam hiăh hiok ăn kon pơlei. Truh đĭ khei 3, dêh char Kon Tum man ‘nao păng pơm hơmet ming đei 1.776 tŏ hnam. Ƀok Nguyễn Khắc Thời, Bí thư Chi ƀô̆ pơm hloi Ƀok pơgơ̆r plei Kon Jri Xút, xăh Đăk Blà, plt Kon Tum tơroi: “Chi ƀô̆ đei 9 ‘nu đảng viên tơtă đảng viên bơngai lơ̆m pơlei ngăl. Đảng viên athei athei năm hơdrol jang mă tơnăp vang tơgŭm ăn bơngai tơnuh sut pơđĭ hnam hiăh hiok. Jơ chao kơ rim giĕng, rim khei chi ƀô̆ roi tơbăt, krao hơvơn kon pơlei vang tơgop kŏng man hnam vă sut pơđĭ hnam hiăh hiok”.

Ƀok Nguyễn Duy Lơ, Bí thư Chi ƀô̆, pơm hloi ƀok Pơgơ̆r plei Đăk Tang, xăh Rờ Kơi, apŭng Sa Thầy, ăn tơbăt: “Hăm hơnăp jang jĭ Bí thư Chi ƀô̆- pơm hloi Ƀok pơgơ̆r pơlei inh chă krao hơvơn mih ma duch nă păng đe druh dăm vang truh tơgŭm, bu đei kiơ tơgŭm ‘nei, đei năr rơhơi ‘nŏh năm jang tơgŭm ăn, đei tơmam ‘nŏh tơgop tơmam. Hơdai hăm kơsô̆ jên đơ̆ng kơpal tơgŭm vang tơgŭm ăn bơngai tơnuh man đei hnam kơjăp ‘lơ̆ng ƀiơ̆ vă kon pơlei hơđơ̆ng jơhngâm choh jang xa lơ̆m dôm pơyan 'mi truh”.

Tơdrong pơjei băl “Vang tơgŭm sut pơđĭ hnam hiăh hiok lơ̆m teh đak sơnăm 2025” yoa dêh char Kon Tum tơlĕch ưh lăp dơ̆ng ƀât man, pơm hơmet ming hnam đech mă oei jing 1 tơdrong gĭt kăl vă pơjing păng hơmet kơjăp đon lui đơ̆ng kon pơlei hăm Đảng. Dôm tơdrong jang rơđăh ‘lơ̆ng, đei yoa đơ̆ng đe Bí thư Chi ƀô̆ păng đảng viên tơ̆ Kon Tum hlôi tơƀôh hơdăh hơnăp jang năm hơdrol, đon jang tôch tơnăp đơ̆ng đảng viên lơ̆m tơdrong hue lăng truh tơdrong arih xa ăn dôm unh hnam pơmat tat. Dêh char Kon Tum adrin truh đĭ khei 6/2025 vă jang đang tơdrong ‘man ‘nao, pơm hơmet ming hnam hiăh hiok, tơgŭm ăn đĭ đăng unh hnam kon pơlei đei tơdrong arih xa pơmat tat lơ̆m dêh char đei tơdrong arih xa ‘lơ̆ng ƀiơ̆ păng sơđơ̆ng jơhngâm lơ̆m dôm pơyan 'mi kial tơ̆ hơnăp ning mônh kơnh.