Lăm pơhrăm maketing yua đơ̆ng Khŭl hơp tak xăh dêh char Đắk Lắk pơgơ̆r hloi tơ̆ hơnih pơdă, roi tơƀôh tơmam đơ̆ng dôm hơp tak xăh. Dôm kon pơlei jang chŭn mir mă hlôi lăp joăt hăm chŭn pơgar, dang ei hơnơ̆ng pơm, jang lơ̆m điên thoăi hơgei. Đe sư rơih, chă hơnih phĭn tơmam đang kơ ‘noh chih nơ̆r tơroi. Tuch luch ‘noh tăh tĕch lơ̆m hơnih tĕch mơdro điện tử. 

Vang hŏk lăm pơhrăm, ‘nhŏng Lê Văn Việt, bơngai jang lơ̆m Hơp tak xăh Bazan, apŭng Krông Pắc, dêh char Đắk Lắk vang tơroi: “Mạng tơpôl păng tĕch mơdro lơ̆m điện tử hrei ‘nâu tŏk bŏk jing trong jang rim năr bơih. Tơdăh bơ̆n ưh kơ mơ̆t hơdai lơ̆m trong jang ‘noh đei tŭn lê̆ tơ̆ rŏng. Tơdrong hơp tak xăh mơ̆t jang lơ̆m trong jang mạng tơpôl dăh mă dôm hơnih tĕch mơdro điện tử gô jing tơdrong pran ăn hơp tak xăh. Yua kơ sư gô roi tơƀôh ăn bơngai răt yua lơ̆m mạng tơpôl găh bơngai tơpă, tơdrong tơpă, tơmam tơpă”.

Ƀok Thân Cư, phŏ Kơdră vei lăng Hơp tak xăh pơvih pơvăn choh jang sa hơtŏ băl Cư Dlê Mnông, apŭng Cư Mgar, dêh char Đắk Lắk roi tơbăt, hơp tak xăh pơjing sơnăm 2012. Truh dang ei, hơp tak xăh đei 114 ‘nu bơngai jang, hăm hloh 230 hec-ta jang cheh phe, tiu, sầu riêng. Tơdăh hơdrol sơ̆, hơp tak xăh lăp joăt hăm tơdrong tĕch hơdrĕch, tơmam, phŏng, tơgŭm khoa hŏk ki thuơ̆t tơgŭm kon pơlei jang chŭn mir pơm đei tơmam ‘lơ̆ng, ‘noh dang ei đe sư tŏk bŏk iŏk jang 1 hơnăp jang ‘nao, jing tơ ‘ngla tơmam ‘lơ̆ng lơ̆m trong jang hơdai kơjă kăp gĭt, tơgoăt hơdai pơm tơlĕch hăm tĕch mơdro, roi tơbbôh tơmam tơring. Tơdrong iŏk yua kơmăy kơmŏk kơsô̆ lơ̆m roi tơƀôh tơmam hlôi tơgŭm hơp tak xăh gơh tĕch lơ̆m anih tĕch mơdro hrĕnh păng să hloh.

Ƀok Thân Cư, lăng hơlen:“Bơ̆n athei hơtŏk trong jang pơm tơlĕch hai hơdai hăm băt kơmăy kơmŏk 4.0, băt trong tĕch tơmam hai, băt hăm anih tĕch mơdro, maketing vă tĕch lơ̆m anih tĕch mơdro vă kơ đe sư băt tơmam đơ̆ng bơ̆n hăm jang ‘lơ̆ng ưh. Tơdăh bơ̆n jang ‘lơ̆ng mă bơ̆n ưh kơ tơƀôh, ưh kơ roi tơbăt ‘noh gô tôch kơ ‘mêm”.

Ƀok Phạm Thanh Tuấn, bơngai pơtho Tơdrong jang tơiung pơjing tơdrong jang sa tơplih ‘nao pơcheh hơgei kơ teh đak, bơngai hlôi vang pơtho kon pơlei jang chŭn mir Đắk Lắk tơgĕch iŏk yua dôm mạng tơpôl, hơnih tĕch mơdro điện tử păng tơmam trực tuyến vă tơjê̆ hăm tơmoi răt tơmam ‘lơ̆ng akhan: Tơplih kơsô̆ tŏk bŏk ƀơm truh rim hlak pơgar, rim tơpang ti kon pơlei jang. Tơplih kơsô̆ kŭm pơm đei 1 đon tơchĕng ‘nao, 1 trong gơh băt ‘nao lơ̆m pơgơ̆r jang sa, lơ̆m vei lăng păng lơ̆m trong pơm hơnăn tơmam ‘lơ̆ng.

“Dang ei bơngai răt yua đei lăng lui lơ̆m dôm bơngai pơm tơlĕch tơmam, lăp đei đe sư mă đei roi hơdăh găh tơdrong gơh hơgei kơ tơring. Yua kơ lơ sơnăm bơ̆jang ‘noh đe sư hlôi jing bơngai joăt jang đơ̆ng tơmam đe sư pơm tơlĕch kơdih. Tơdrong tơm mă 2 lơ̆m tơplih đon hlôh vao đơ̆ng kon pơlei ‘noh đe sư ưh kơ gô truh păih mă 3 vă răt pơđĭ tơmam ăn kơ dih dơ̆ng bơ̆ih. Tơdăh đunh kơ âu 5 sơnăm mă tơroi kon pơlei tĕch tơmam lơ̆m mạng, dăh mă livestream, dăh mă tơgoăt hăm bơngai răt yua jơ̆p plei teh ‘noh jĭ tơdrong ưh kơ đei hơnhŏ. Mă lei dang ei tŏk bŏk ƀôh tôch kơ ‘lơ̆ng”.

Kiơ̆ kơ ƀok Lê Văn Dần, Phŏ kơdră Khŭl jang Hơp tak xăh dêh char Đắk Lắk, lơ̆m khei ‘năr anih tĕch mơdro pơjei băl nhen hrei ‘nâu, kŭm hăm tơdrong pơm tơlĕch ‘nao, rim hơp tak xăh kŭm tŭn pran iŏk yua kơmăy kơmŏk kơsô̆ lơ̆m tơdrong roi tơƀôh, tĕch tơmam lơ̆m lơ hơnih tĕch mơdro điện tử. Khei ‘năr âu ki, khŭl jang hơp tak xăh dêh char hlôi pơgơ̆r lơ lăm pơhrăm găh tơdrong băt tĕch mơdro lơ̆m kơmăy kơsô̆, hơtŏk tơiung hơnăn, pơjing um rup ăn anih tĕch mơdro, hơp tak xăh. Tơ̆ hơnăp kơnh, Khŭl jang hơp tak xăh gô hơnơ̆ng pơgơ̆r dôm lăm pơhrăm tơdrong gơh hơgei jrŭ găh dôm tơdrong jang pha ra băl vă pơm lăp hăm ‘meh vă hơtŏk tơiung đơ̆ng anih tĕch mơdro.

Ƀok Lê Văn Dần, roi tơbăt: “Hơnơ̆ng pơtho pơhrăm klăih song jing lơ lăm vă kơ dôm hơp tak xăh gơh băt dôm tơdrong ‘lơ̆ng hloh đơ̆ng tĕch mơdro điện tử đơ̆ng AI, đơ̆ng rŏng ‘noh dôm lăm gơh hơgei hloh ăn kơ rim tơmam. Yua kơ rim tơmam gô đei dôm trong jang ‘moi kiơ̆ tơdrong tĕch mơdro lơ̆m điện tử pha ra băl. Vă kơ rim hơp tak xăh gô oei tơ̆ hơp tak xăh kơdih oei gơh roi tơƀôh păng tĕch tơmam online ‘moi kiơ̆ dôm kơmăy kơsô̆ hrei ‘nâu. Mă loi ‘noh jĭ tơgŭm ăn kơ dôm hơp tak xăh tơ̆ tơring hơtăih đei gơh tĕch tơmam tơ̆ dôm anih tĕch mơdro”.

Dôm tơdrong hơdrin tơplih kơsô̆ đơ̆ng dôm hơp tak xăh tơ̆ dêh char Đắk Lắk tŏk bŏk tơgop pơm tơdrong hiôk lơ̆m tơdrong vei lăng, tơgŭm tơ jur jên jang, hơtŏk iŏk yua ăn kơ dôm hơp tak xăh. Mă loi ‘noh, iŏk yua kơmăy kơmŏk kơsô̆ lơ̆m roi tơƀôh tơmam tŏk bŏk pơih ăn lơ tơdrong hiôk ‘nao, anih tĕch mơdro ‘nao, hơtŏk kơjă kăp gĭt păng pơjing hơnăn tơmam kơ Đắk Lắk./.